កីឡាជាតិ
ជាតិ
លីកលំដាប់ទី២៖ វិសាខាប្រជែងដណ្តើមជើងឯកជាមួយយុវជនសាលាបាល់ទាត់ជាតិនៅល្ងាចនេះ
× ក្រោយប្រកួតអស់រយៈពេលជាង៧ខែកន្លងមក ព្រឹត្តិការណ៍ប្រកួតបាល់ទាត់លីកលំដាប់ទី២កម្ពុជា(Cambodian League 2)ប្រចាំឆ្នាំ២០១៧ បានឈានដល់ការប្រកួតវគ្គផ្តាច់ព្រ័ត្រនៅល្ងាចថ្ងៃអាទិត្យទី១៥ ខែតុលានេះនៅពហុកីឡដ្ឋានជាតិ។ ក្រុមយុវជនសាលាបាល់ទាត់ជាតិបាទីត្រូវប្រជែងដណ្តើមជើងឯកជាមួយក្រុមវិសាខាដែលជាក្រុមលេខ១ប្រចាំវគ្គជម្រុះ។
ក្រុមកីឡាករសាលាបាល់ទាត់ជាតិបាទីត្រូវប្រជែងដណ្តើមជើងឯកជាមួយក្រុមវិសាខាក្នុងពានរង្វាន់ខេមបូឌានលីក២នាវេលាម៉ោង៦ល្ងាចថ្ងៃទី១៥ ខែតុលានេះនៅពហុកីឡដ្ឋានជាតិ។ មុនឡើងមកជួបគ្នានៅវគ្គផ្តាច់ព្រ័ត្រនេះក្រុមយុវជនសាលាបាល់ទាត់ជាតិបាទីបានយកឈ្នះក្រុមយុវជនក្រសួងការពារជាតិ ៥-៣ នៅវគ្គជម្រុះ Play off ដែលជាវគ្គប្រកួតរវាងក្រុមឈ្នះនាការប្រកួតរវាងក្រុមលេខ៣ និងលេខ៤ ជាមួយក្រុមលេខ២ដែលបានឈរចាំ។
សម្រាប់រូបមន្តប្រកួតនៃពានរង្វាន់ខេមបូឌានលីក២ គឺដូចគ្នានឹងរូបមន្តប្រកួតពានរង្វាន់ក្របខណ្ឌលីកកំពូលកម្ពុជា ពោលគឺយកក្រុមទាំង៤ដែលមានពិន្ទុខ្ពស់ជាងគេក្នុងវគ្គជម្រុះទាំងពីរជើងឡើងទៅលេងវគ្គ Play off ដំណាក់កាលផ្តាច់ព្រ័ត្រ។ នៅក្នុងវគ្គនេះក្រុមឈរលេខរៀងទី៤ត្រូវប្រកួតជាមួយក្រុមឈរលេខរៀងទី៣ដើម្បីរកក្រុមឈ្នះឡើងទៅប្រកួតជាមួយក្រុមឈរលេខរៀងទី២។ ក្រុមឈ្នះក្នុងវគ្គនេះត្រូវឡើងទៅប្រកួតជាមួយក្រុមឈរលេខរៀងទី១ក្នុងវគ្គផ្តាច់ព្រ័ត្រ ដើម្បីដណ្តើមជើងឯកតែម្តង។
ដូច្នេះក្រុមយុវជនក្រសួងការពារជាតិដែលយកឈ្នះក្រុមសូលទីឡូអង្គរ ៥-០ នាការប្រកួតរវាងក្រុមលេខ៣ និងលេខ៤ ទទួលបានចំណាត់ថ្នាក់លេខ៣ប្រចាំពានរង្វាន់ខេមបូឌានលីក២ឆ្នាំ២០១៧ ខណៈសូលទីឡូបានចំណាត់ថ្នាក់លេខ៤៕
Tag:
Cambodian League 2
វិសាខា
យុវជនសាលាបាល់ទាត់ជាតិ
© រក្សាសិទ្ធិដោយ thmeythmey.com