ព្រះបរមរតនកោដ្ឋ៖«យើងមិនចង់ធ្វើមហាអំណាចទេ តែចង់ឲ្យពិភពលោកដឹងថាយើងរួមគ្នា»

ជាតិ

ព្រះបរមរតនកោដ្ឋ៖«យើងមិនចង់ធ្វើមហាអំណាចទេ តែចង់ឲ្យពិភពលោកដឹងថាយើងរួមគ្នា»

15, Oct 2022 , 10:52 am

រូបភាព

ដោយ: សារព័ត៌មានថ្មីៗ

ក្នុងឱកាសនៃព្រះរាជពិធីចម្រើនព្រះជន្មយាងចូល៩០ព្រះវស្សានៃសម្តេចតា នរោត្តម សីហនុ នាឆ្នាំ២០១១ កម្ពុជាបានរៀបចំព្រះរាជពិធីយ៉ាងអធិកអធម នៅមុខព្រះបរមរាជវាំង ដោយមានទាំងព្រះរាជវត្តមានសម្តេចតា សម្តេចយាយ និងព្រះមហាក្សត្រ ព្រះបរមនាថ នរោត្តម សីហមុនីផង។ ព្រះរាជបន្ទូលជាង២០នាទី នាវេលានោះ គឺជាព្រះរាជបន្ទូលចុងក្រោយនៃអតីតព្រះមហាក្សត្រ នរោត្តម សីហនុ នៅកាន់ជនរួមជាតិរបស់ព្រះអង្គ។

សូមស្តាប់ព្រះរាជឱង្ការរបស់ព្រះបរមរតនកោដ្ឋ

នាចុងខែតុលាក្នុងឆ្នាំ២០១១ រដ្ឋាភិបាលកម្ពុជាបានរៀបចំព្រះរាជពិធីពីររួមគ្នា។ ទីមួយគឺព្រះរាជពិធីចម្រើនព្រះជន្មអតីតព្រះមហាក្សត្រនរោត្តម សីហនុ ៨៩យាងចូល៩០ព្រះវស្សា និងទីពីរ គឺព្រះរាជពិធីខួប២០ឆ្នាំនៃការយាងនិវត្តរបស់សម្តេចឪ នរោត្តម សីហនុ មកព្រះរាជណាចក្រកម្ពុជាទី២វិញ។

ពីលើព្រះទីន័ងច័ន្ទឆាយា ដែលអមដោយសម្តេចព្រះមហាក្សត្រីយ៍ ព្រះមហាក្សត្រ ថ្នាក់ដឹកនាំកំពូលៗរបស់ជាតិ សម្តេចឪ នរោត្តម សីហនុ បានមានព្រះរាជឱង្ការច្រើនសរសើរ ព្រះករុណា រដ្ឋាភិបាល រដ្ឋសភា និងប្រជាពលរដ្ឋដែលបានរួមគ្នាកសាងកម្ពុជា។

សម្រាប់ព្រះបរមរតនកោដ្ឋ ព្រះអង្គចង់តែបង្ហាញឲ្យពិភពលោកបានដឹងអំពីការរួបរួមគ្នានៃប្រជាជាតិខ្មែរ ហើយព្រះអង្គមានព្រះរាជបន្ទូលបញ្ជាក់ថា សាមគ្គី ជាកម្លាំង។

១៥ តុលា ឆ្នាំ២០១២ ជាថ្ងៃដ៏សោកសង្រែងរបស់រាស្ត្រខ្មែរ ក្រោយដំណឹងនៃការសោយព្រះទិវង្គត ព្រះករុណា ព្រះបាទសម្តេច នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ក្នុងព្រះជន្ម៨៩ព្រះវស្សានៅទីក្រុងប៉េកាំង ប្រទេសចិន។

១០ឆ្នាំទៅហើយ តែស្នាព្រះហស្ត ព្រះរាជបណ្តាំ និងព្រះទ័យយកចិត្តទុករបស់ព្រះអង្គ ធ្វើឲ្យប្រជារាស្ត្រនៅតែចងចាំ និងនឹកដល់ព្រះវររាជបិតាជានិច្ច។