កីឡាអន្តរជាតិ
អន្តរជាតិ
ដោយសារឈ្នះ Pacquiao ធ្វើឲ្យ Horn ក្លាយជាអត្តពលិកគួរឲ្យសរសើរជាងគេនៅអូស្ត្រាលី
× អ្នកប្រដាល់ Jeff Horn ទទួលបានកិត្តិយសជាកំពូលអត្តពលិកឆ្នើមជាងគេបំផុតប្រចាំឆ្នាំនៅអូស្ត្រាលី ដោយសារការផ្តួល Manny Pacquiao ដែលជាកំពូលអ្នកប្រដាល់ដ៏ល្បីល្បាញលើលោក។
អ្នកប្រដាល់សញ្ជាតិអូស្ត្រាលី វ័យ២៩ឆ្នាំ Jeff Horn បានធ្វើឲ្យពិភពលោកមានការភ្ញាក់ផ្អើលយ៉ាងខ្លាំងដោយសារអាចយកឈ្នះលើស្តេចប្រដាល់អាស៊ី Pacquiao បាននាការប្រកួតលើសង្វៀនក្នុងទីក្រុង Brisbane ប្រទេសអូស្ត្រាលី កាលពីថ្ងៃទី២ ខែកក្កដាកន្លងទៅ។
ជ័យជម្នះនេះ បានធ្វើឲ្យរូបគេក្លាយជាអត្តពលិកដែល«បំផុសគំនិត»និងមានការចាប់អារម្មណ៍ជាងគេបំផុតនៅអូស្ត្រាលីប្រចាំឆ្នាំនេះ។
បើតាមការផ្សាយរបស់សារព័ត៌មាន Rappler អ្នកប្រដាល់អតីតគ្រូបង្រៀននេះបានឈ្នះពាន «The Don» នៅក្នុងកម្មវិធី Sport Australia Hall of Fame Awards ដែលជាកម្មវិធីផ្តល់ពានរង្វាន់ដល់អត្តពលិករបស់អូស្ត្រាលីប្រចាំឆ្នាំកាលពីថ្ងៃព្រហស្បតិ៍ទី១២កន្លងទៅនៅទីក្រុងមែលប៊ន។ ក្រោយទទួលពាននេះ អ្នកប្រដាល់មិនស្គាល់ចាញ់បាននិយាយថា៖«វាជាកិត្តិយសដ៏ធំ។ ខ្ញុំអាចចាំថាមានអ្នកឈ្នះពាននេះពីមុនមកដូចជាកីឡការិនី Cathy Freeman និងកីឡាករហែលទឹក Ian Thorpe។ ខ្ញុំបានក្លាយជាអត្តពលិកដែលបំផុសគំនិតដ៏មានសក្តានុពលសម្រាប់អត្តពលិកជំនាន់ក្រោយដូចជាអ្នកទាំងពីរនេះគឺជាអារម្មណ៍ដែលមិនគួរឲ្យជឿ»។
អ្នកប្រដាល់ដែលធ្លាប់ឡើងវាយ១៧លើក ឈ្នះ១៦ដងមិនដែលចាញ់រូបនេះបន្ថែមទៀតថា ជួនកាលរូបគេនៅតែមិនជឿលើខ្លួនឯងថាអាចយកឈ្នះអ្នកប្រដាល់ដ៏អស្ចារ្យបំផុតម្នាក់របស់ពិភពលោក និងជាម្ចាស់ខ្សែក្រវាត់៨ស្ថាប័ណផ្សេងគ្នានោះ។
Horn អាចនឹងជួបអ្នកប្រដាល់សញ្ជាតិអង់គ្លេស Gary Corcoran ទីក្រុង Brisbane ដដែលក្នុងខែធ្នូខាងមុខនេះ បន្ទាប់ពីជំនួបសងសឹករវាងរូបគេជាមួយ Pacquiao ត្រូវបានច្រានចោល៕
Tag:
ប្រដាល់
Jeff Horn
Manny Pacquiao
© រក្សាសិទ្ធិដោយ thmeythmey.com