លោក អូស្មាន ហាស្សាន់៖ នឹងមានក្រុមកីឡាបាល់ទាត់អាជីពពីសហគមន៍ខ្មែរឥស្លាម

កីឡាជាតិ

ជាតិ

លោក អូស្មាន ហាស្សាន់៖ នឹងមានក្រុមកីឡាបាល់ទាត់អាជីពពីសហគមន៍ខ្មែរឥស្លាម

18, Oct 2017 , 7:59 am

រូបភាព

លោក អូស្មាន ហាស្សាន់ ផ្តល់បទសម្ភាសដល់អ្នកអ្នកសារព័ត៌មានក្រោយចប់ការប្រកួតនៅពហុកីឡដ្ឋានជាតិកាលពីពេលកន្លងទៅ

ដោយ:

រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ បានគូសបញ្ជាក់ថា យុវជនខ្មែរឥស្លាមក៏ដូចជាយុវជនកម្ពុជាទូទៅ សុទ្ធតែកម្លាំងដ៏រឹងមាំក្នុងការអភិវឌ្ឍប្រទេសជាតិ។ លោក អូស្មាន ហាស្សាន់ បានថ្លែងបែបនេះ នាពិធីបិទការប្រកួតកីឡាបាល់ទាត់ដណ្តើមពានរង្វាន់សម្តេច ហេង សំរិន កន្លងមក ដោយអះអាងថា សហគមន៍មូស្លីមនឹងមានក្រុមបាល់ទាត់អាជីពមួយនៅកម្ពុជាក្នុងរយៈពេលដ៏ខ្លីខាងមុខ។

យុវជនខ្មែរឥស្លាមបាននិងកំពុងដើរតួនាទីយ៉ាងសំខាន់ក្នុងការរួមចំណែកអភិវឌ្ឍប្រទេសឆ្ពោះទៅរកវឌ្ឍនភាព ដោយពួកគេកំពុងបម្រើការងារនៅតាមស្ថាប័នរដ្ឋ និងឯកជនក្នុងប្រទេសកម្ពុជា។ នេះបើតាមការបញ្ជាក់របស់រដ្ឋលេខាធិការក្រសួងការងារ លោក អូស្មាន ហាស្សាន់។ ចំពោះវិស័យកីឡា លោកក៏បានមើលឃើញពីការរួមចំណែកដ៏ធំធេងពីសំណាក់យុវជនក្នុងសហគមន៍ខ្មែរឥស្លាមផងដែរ។

កាលពីថ្ងៃទី៨ ខែតុលា នៅពហុកីឡដ្ឋានជាតិ ក្រុមបាល់ទាត់សម្ព័ន្ធយុវជនមុស្លីមកម្ពុជា បានប្រកួតចាញ់ក្រុមអាណាចក្របៃតង ២-១ យ៉ាងប្រផិតប្រផើយ និងបានក្លាយជាក្រុមជើងឯករងនៃពានរង្វាន់សម្តេច ហេង សំរិន ប្រចាំឆ្នាំ២០១៧ ។

ក្រុមសម្ព័ន្ធយុវជនមុស្លីមថតជុំគ្នាជាមួយថ្នាក់ដឹកនាំនៅពហុកីឡដ្ឋានជាតិក្រោយទទួលបានជើងឯករងពានរង្វាន់សម្តេច ហេង សំរិន លើកទី១

ទោះបីក្រុមសម្ព័ន្ធយុវជនមូស្លីមកម្ពុជាមិនបានគ្រងជើងឯកពានរង្វាន់សម្តេច ហេង សំរិន លើកទី១ក៏ដោយ តែតាមរយៈការឡើងមកដល់វគ្គផ្តាច់ព្រ័ត្រសម្រាប់ក្រុមដែលទើបបង្កើតត្រឹម១ឆ្នាំមួយនេះត្រូវបានលោក អូស្មាន ហាស្សាន់ ចាត់ទុកជាជោគជ័យមួយដ៏ធំធេងសម្រាប់យុវជនមូស្លីម។ លោករំពឹងថា ក្នុងរយៈពេលដ៏ខ្លីខាងមុខ ពោលគឺពី២ទៅ៣ឆ្នាំទៀតសហគមន៍ខ្មែរអ៊ីស្លាមនិងមានក្រុមបាល់ទាត់អាជីពមួយរបស់ខ្លួន។

លោក អូស្មាន ហាស្សាន់ បានបន្ថែមថា៖«យុវជនមូស្លីមភាគច្រើនស្ទើរជាងពាក់កណ្តាលសុទ្ធសឹងជាយុវជនរបស់សហភាពសហព័ន្ធយុវជនកម្ពុជា(ស.ស.យ.ក)ក្រោមការគ្រប់គ្រងរបស់លោក ហ៊ុន ម៉ានី ដែលភាគច្រើនក្នុងចំណោមពួកគេមកពីខេត្តកំពង់ចាម កំពត និងកំពង់ឆ្នាំងជាដើម»៕