ជាតិ
សេដ្ឋកិច្ច
USAID បានផ្ដល់មូលនិធិសិក្សាដល់សាស្រ្តាចារ្យ និងនិស្សិតកសិកម្ម ១៥រូប ក្នុងទឹកប្រាក់ ៣៤ម៉ឺនដុល្លារ
× ភ្នំពេញ៖ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) បានផ្ដល់អាហារូបករណ៍ និងមូលនិធិស្រាវជ្រាវ ដល់មន្រ្តីសាស្ត្រាចារ្យ និងនិស្សិតនៃសាកលវិទ្យាល័យភូមិន្ទកសិកម្មចំនួន ១៥ រូបឲ្យបានបន្តការសិក្សានៅកម្ពុជា តាមរយៈកម្មវិធីអាហារូបករណ៍ និងមូលនិធីស្រាវជ្រាវថ្មីលើជំនាញកសិកម្ម។
បន្ទាប់ពីធ្វើការជ្រើសរើសបេក្ខភាពរួចរាល់ កម្មវិធីអាហារូបករណ៍ និងមូលនិធិស្រាវជ្រាវថ្មីលើជំនាញកសិកម្ម ត្រូវបានប្រកាសបើកនៅថ្ងៃទី១៨តុលា។ បេក្ខជនដែលទទួលអាហារូបករណ៍នេះមាន ៥រូបបន្តការសិក្សាថ្នាក់បណ្ឌិត, ៤រូបថ្នាក់អនុបណ្ឌិត និងអ្នកកាន់គម្រោងស្រាវជ្រាវចំនួន ៦រូបទៀត។ ការផ្ដល់មូលនិធិសិក្សានេះ មានតម្លៃសរុបជាង ៣៤ម៉ឺនដុល្លារអាមេរិក។
កម្មវិធីអាហារូបករណ៍នេះ ត្រូវបានគាំទ្រដោយកម្មវិធីសន្តិសុខស្បៀងសម្រាប់អនាគត (Feed The Future) របស់រដ្ឋាភិបាលអាមេរិក តាមរយៈមជ្ឈណ្ឌលឧត្តមភាពប្រពលវប្បកម្មកសិកម្មនិរន្តភាព និងអាហារូបត្ថម្ភ (CE SAIN) ។ CE SAIN ត្រូវបានបង្កើតឡើងកាលពីឆ្នាំ២០១៦ ក្រោមកិច្ចសហការរវាង USAID និងសាកលវិទ្យាល័យភូមិន្ទកសិកម្ម។
CE SAIN ទទួលបានហិរញ្ញវត្ថុពី USAID ដែលមូលនិធិដំបូង គឺមានចំនួន ២,៥លានដុល្លារ សម្រាប់រយៈពេល ៥ឆ្នាំ។ មជ្ឈមណ្ឌលនេះធ្វើការជំរុញការស្រាវជ្រាវ និងកសាងសមត្ថភាពវិស័យសាធារណៈ ដោយផ្ដោតការធ្វើឲ្យប្រសើរឡើងនូវសន្តិសុខស្បៀង និងអាហារូបបត្ថមនៅកម្ពុជា៕
© រក្សាសិទ្ធិដោយ thmeythmey.com