UCL ៖ Man Utd, PSG និង Barca សុទ្ធតែឈ្នះ៣ប្រកួតជាប់គ្នាឈរកំពូលតារាង

កីឡាអន្តរជាតិ

អន្តរជាតិ

UCL ៖ Man Utd, PSG និង Barca សុទ្ធតែឈ្នះ៣ប្រកួតជាប់គ្នាឈរកំពូលតារាង

19, Oct 2017 , 2:02 pm

រូបភាព

ដោយ: ទេព ពិទូរ្យ

ក្រុម Manchester United, Paris Saint Germain និង Barcelona អាចរកបាន៩ពិន្ទុពេញ ក្រោយឈ្នះទាំង៣ប្រកួតជាប់គ្នា នៃការប្រកួតវគ្គសន្សំពិន្ទុពាន UEFA Champion League នៅរាត្រីទី១៨ ខែតុលានេះ។

ក្រុម Manchester United បានយកឈ្នះ Benfica ក្នុងលទ្ធផល ១-០ នៃការប្រកួតលើកទី៣ វគ្គជម្រុះពូល A។ គ្រាប់បាល់ជ័យជម្នះរបស់បិសាចក្រហមធ្វើបានដោយការទាត់បាល់ Free Kick ចម្ងាយឆ្ងាយរបស់ Marcus Rashford ដែលអ្នកចាំទី Mile Svilar របស់ Benfica ចាប់បានហើយ តែវផុតខ្សែទី។

ការប្រកួត៣លើកចុងក្រោយនៅ Champions League របស់កូនក្រុមលោក Jose Mourinho គឺឈ្នះគ្រប់ប្រកួតមាន៩ពិន្ទុឈរនៅលេខ១ និងមានភាគរយច្រើនដើម្បីបន្តទៅវគ្គ១៦ក្រុមចុងក្រោយ។ ចំណែក Basel ដែលឈ្នះ CSKA Moscow ២-០ បន្តឈរលេខ២ មាន៦ពិន្ទុ។

រីឯក្រុមខ្លាំងមកពីលីកកំពូលបារាំង Paris Saint Germain ក៏អាចរកជ័យជម្នះទាំង៣ប្រកួតដែរ ក្រោយលត់ Anderlecht ៤-០ ក្នុងពូល B មាន៩ពិន្ទុ ស្ថិតនៅចំណាត់ថ្នាក់ទី១ តាមពីក្រោយដោយម្ចាស់ជើងឯកលីកកំពូលអាល្លឺម៉ង Bayern Munich ដែលមាន៦ពិន្ទុ។

៤គ្រាប់របស់ PSG ធ្វើបានដោយកីឡាករ៤រូបរួមមាន Kylian Mbappe, Edinson Cavani, Neymar និង Angel Di Maria។

ដោយឡែកក្រុមមកពីតំបន់ស្វយ័ត Catalonia នៃប្រទេសអេស្ប៉ាញ FC Barcelona បានយកឈ្នះ Olympiacos នៃប្រទេសក្រិក ៣-១ និងជាជ័យជម្នះលើកទី៣ផងដែរ ដើម្បីបន្តឈរកំពូលតារាង សម្រាប់ការប្រកួតវគ្គសន្សំពិន្ទុពូល D ខណៈ Juventus មាន៦ពិន្ទុក្រោយឈ្នះ Sporting ២-១ ស្ថិតនៅលេខ២។

លទ្ធផលគូដ៏ទៃទៀតនៃពានរង្វាន់ Champion League៖
ពូល A
Benfica ០ - ១ Manchester United
CSKA Moscow ០ - ២ Basel
ពូល B
Anderlecht ០ - ៤ Paris Saint Germain
Bayern Munich ៣ - ០ Celtic
ពូល C
Qarabag FK ០ - ០ Atletico Madrid
Chelsea ៣ - ៣ Roma
ពូល D
Barcelona ៣ - ១ Olympiacos
Juventus ២ - ១ Sporting CP