អន្តរជាតិ
ស្ត្រីវៀតណាមម្នាក់បង្កើតបានកូនប្រុសដែលមានទម្ងន់ជាង៧គីឡូក្រាម
× ស្ត្រីជនជាតិវៀតណាមម្នាក់ ប្រសូតបានកូនប្រុសទម្ងន់ ៧.១គីឡូក្រាម ដែលត្រូវបានចាត់ទុកថា ជាទារកដ៏ធ្ងន់ម្នាក់ដែលបានកើតនៅតំបន់អាស៊ីអាគ្នេយ៍។ នេះបើតាមការផ្សាយរបស់ទីភ្នាក់ងារព័ត៌មានបារាំង AFP។
«នៅពេលដែលគ្រូពេទ្យបានប្រាប់ខ្ញុំថា កូនប្រុសខ្ញុំមានទម្ងន់ ៧.១គីឡូ យើងទាំងអស់គ្នាមិនជឿឡើយ»។ លោក Tran Van Quan ឪពុករបស់ទារកឈ្មោះ Quoc និយាយយ៉ាងដូច្នេះក្នុងបទសម្ភាសមួយជាមួយ AFP ដោយបញ្ជាក់ថា ការប្រសូតធ្វើឡើងតាមរយៈការវះកាត់នៅក្នុងមន្ទីរពេទ្យមួយក្នុងខេត្ត Vinh Phuc របស់វៀតណាម។
នៅមុនប្រសូត ក្រុមគ្រូពេទ្យ បានប្រាប់អ្នកស្រី Nguyen Kim Lien ថា កូនរបស់គាត់អាចមានទម្ងន់ប្រមាណ៥គីឡូក្រាម ប៉ុន្តែខុសស្រឡះ និងធ្វើឲ្យម្តាយរូបនេះ ភ្ញាក់ផ្អើលយ៉ាងខ្លាំង។ លោក Tran Van Quan បានបញ្ជាក់ថា៖ «កូនខ្ញុំមានទម្ងន់ ៧.២គីឡូក្រាម បើបូកទាំងទម្ងន់សម្លៀកបំពាក់បន្តិចចន្តួច»។
បុគ្គលិកមន្ទីរពេទ្យ អះអាងថា ទារកពិតជាមានទម្ងន់មិនធម្មតា ប៉ុន្តែគាត់មិនបានរៀបរាប់អ្វីបន្ថែមទៀតឡើយ។ Quoc មានសុខភាពល្អធម្មតា ហើយទារកនេះជាកូនទីពីរនៅក្នុងគ្រួសារ ដោយបងរបស់គេ ដែលបានកើតកាលពីឆ្នាំ២០១៣ មានទម្ងន់តែ៤.២គីឡូក្រាមប៉ុណ្ណោះ។
កាសែតជាច្រើននៅវៀតណាម បានចុះព័ត៌មានរបស់ Quoc នៅលើទំព័រមុខរបស់ខ្លួន។ កាលពីឆ្នាំ២០០៨ ទារិកាម្នាក់បានកើតមកដោយមានទម្ងន់ជិត៧គីឡូក្រាម។ ទោះបីជាយ៉ាងណាក៏ដោយ Quoc មិនអាចស្ថិតក្នុងសៀវភៅកំណត់ត្រា Guinness World Records បានឡើយ ដោយកំណត់ត្រានេះ ធ្លាក់ទៅលើទារកអ៊ីតាលីម្នាក់កាលពីឆ្នាំ១៩៥៥ ដែលកើតមកក្នុងទម្ងន់១០.២គីឡូក្រាម៕
© រក្សាសិទ្ធិដោយ thmeythmey.com