អន្តរជាតិ
លោក ស៊ី ជិនភីង ៖ ចិនប្រឆាំងជានិច្ចទម្លាប់ «អ្នកខ្លាំងគំរាមកំហែងអ្នកខ្សោយ» រូបភាព៖ xinhua
× ប៉េកាំង៖ អគ្គលេខាធិការបក្សកុម្មុយនីស្តចិនលោក ស៊ី ជិនភីង នៅថ្ងៃទី១៨ ខែតុលា បានប្រកាសថា បក្សកុម្មុយនីស្តចិនខិតខំយ៉ាងខ្លាំងដើម្បីសុខុមាភាពរបស់ប្រជាជនចិន និងប្រជាជនទូទាំងពីភពលោក ព្រោះការរួមចំណែកដើម្បីពិភពលោក ជាបេសកកម្មមួយរបស់បក្ស។ បើតាមសម្ដីលោក ស៊ី ជិនភីង ចិនប្រកាន់នយោបាយកាបរទេសឈ្នះ-ឈ្នះ ដើម្បីប្រយោជន៍ប្រទេសទាំងអស់ ហើយចិនប្រឆាំងដាច់ខាតការប្រើប្រាស់កម្លាំងពីប្រទេសមួយដើម្បីធ្វើបាបប្រទេសមួយទៀត។
ក្នុងរបាយការណ៍ទៅកាន់មហាសន្និបាតលើកទី១៩ នៃបក្សកុម្មុយនីស្តចិន លោក ស៊ី ជិនភីង និយាយថា មនុស្សជាតិទាំងអស់បានជួបបញ្ហាប្រឈមរួមគ្នាជាច្រើនដូចជាគម្លាតរវាងអ្នកមាន និងអ្នកក្រ បញ្ហាសន្តិសុខ ភេរវកម្មនិយម និងបម្រែបម្រួលអាកាសធាតុជាដើម។ យ៉ាងណា ចិននឹងនៅតែបន្តគាំទ្រសន្តិភាព ការអភិវឌ្ឍ កិច្ចសហប្រតិបត្តិការ ការរក្សាប្រយោជន៍ទៅវិញទៅមកក្នុងចំណោមប្រទេសនានាជុំវិញពិភពលោក។
ជាមួយបញ្ហាទាំងអស់នេះ អគ្គលេខាធិការបក្សរូបនេះបានស្នើឲ្យពិភពលោកទាំងមូលធ្វើ្វការរួមគ្នាដើម្បីកសាងសហគមន៍ដែលចែករំលែកអនាគតរួមគ្នា ក៏ដូចជាកសាងពិភពលោកមួយដែលស្រស់ស្អាត បើកចំហរ ស្មើមុខស្មើមាត់ មានសន្តិភាព និងការគោរពគ្នាទៀតផង។ លោកបន្តថា ក្នុងទំនាក់ទំនងរវាងប្រទេសនានា ទំនាស់គួរជំនួសដោយការរៀនពីគ្នា ហើយប្រទេសតូចធំគួរជំនួសដោយការរស់នៅជាមួយគ្នាដោយសហវិជ្ជមានវិញ។
ក្នុងសុន្ទរកថាបីម៉ោងកន្លះនៅថ្ងៃទី១៨ ខែតុលា លោក ស៊ី ជិនភីង អះអាងថា ចិននៅតែរក្សាជំហរម៉ឺងម៉ាត់ក្នុងការអនុវត្តនយោបាយការបរទេសសន្តិភាព គោរពសិទ្ធិប្រជាជនប្រទេសផ្សេងក្នុងការជ្រើសរើសផ្លូវអភិវឌ្ឍប្រទេសរៀងៗខ្លួន។ លើសពីនោះ ក្រុងប៉េកាំងក៏គោរពឲ្យបានខ្ជាប់ខ្ជួននូវការស្មើភាព និងយុត្តិធម៌ ប្រឆាំងដាច់ការលូកលាន់កិច្ចផ្ទៃក្នុងប្រទេសផ្សេង ព្រមទាំងប្រឆាំងទម្លាប់អ្នកខ្លាំងធ្វើបាប ឬសម្លុតកំហែងអ្នកខ្សោយដែរ។
ទោះជាចិនប្រកាន់នយោបាយការបរទេសឯករាជ្យ មិនកេងចំណេញប្រទេសផ្សេងក្ដី លោក ស៊ី ជិនភីង ក៏សង្កត់ធ្ងន់ដែរថា ចិនក៏បោះបង់សិទ្ធិស្របច្បាប់ និងផលប្រយោជន៍របស់ខ្លួនដែរ។ លោកថ្លែងបែបព្រមានប្រទេសដទៃថា កុំរំពឹងចិនសុខចិត្តលេបថ្មលេបគ្រួសដែលប៉ះពាល់ប្រយោជន៍ខ្លួនឯងឲ្យសោះ ហើយការអភិវឌ្ឍរបស់ចិន ក៏មិនមែនជាការគំរាមកំហែងប្រទេសណាដែរ ឯការអភិវឌ្ឍវិស័យការពារជាតិវិញ គឺជាការការពារខ្លួនសុទ្ធសាធ។
ឆ្លៀតឱកាសនោះដែរ មេដឹកនាំចិនរូបនេះក៏សន្យាបង្កើនជំនួយបន្ថែមទៀតទៅកាន់ប្រទេសកំពុងអភិវឌ្ឍ ជាពិសេសប្រទេសដែលអភិវឌ្ឍតិចតួច និងបំពេញតួនាទីរបស់ខ្លួនដើម្បីបង្រួមគម្លាតរវាងប្រទេសលោកខាងជើង និងក្រុមប្រទេសលោកខាងត្បូងដែរ។ សម្រាប់កិច្ចការពិភពលោក ចិនគោរពគោលការណ៍ប្រជាធិបតេយ្យ និងគោលការណ៍៍ស្មើភាពគ្នា មិនថាប្រទេសតូចឬធំ ប្រទេសក្រីក្រឬមាន ប្រទេសខ្លាំងឬខ្សោយអ្វីឡើយ៕
Tag:
19thCPC
ចិន
ស៊ី ជិនភីង
© រក្សាសិទ្ធិដោយ thmeythmey.com