ក្រោយរំដោះពីភេរវជន ក្រុងម៉ារ៉ាវីនឹងត្រូវស្ថាបនាឡើងវិញដោយចំណាយទឹកប្រាក់ច្រើនជាង ៥៨៤លានដុល្លារ

អន្តរជាតិ

ក្រោយរំដោះពីភេរវជន ក្រុងម៉ារ៉ាវីនឹងត្រូវស្ថាបនាឡើងវិញដោយចំណាយទឹកប្រាក់ច្រើនជាង ៥៨៤លានដុល្លារ

19, Oct 2017 , 9:39 pm

រូបភាព

រូបភាព៖ ABS-CBN

ដោយ: សៅ ផលនិស្ស័យ (Sao Phal Niseiy)

រដ្ឋាភិបាលហ្វីលីពីនបានប្រកាសពីគម្រោងសាងសង់ទីក្រុងម៉ារ៉ាវី (Marawi) ដែលរងគ្រោះដោយសារការប្រយុទ្ធគ្នារវាងកម្លាំងរដ្ឋាភិបាលនិងក្រុមភេរវជនបណ្តាញក្រុមរដ្ឋឥស្លាមឬដែស្ហឡើងវិញ។ គម្រោងនឹងចាប់ផ្តើមនៅដើមឆ្នាំក្រោយដោយចំណាយទឹកប្រាក់សរុប ៥៩៤ លានដុល្លារអាមេរិកឯណោះ។

រដ្ឋមន្ត្រីទទួលបន្ទុកកិច្ចការងារគ្រប់គ្រងថវិកាហ្វីលីពីនលោក Benjamin Diokno បានប្រកាសថា គម្រោងសាងសង់ទីក្រុងម៉ារ៉ាវីឡើងវិញអាចនឹងត្រូវអនុវត្តនៅដើមឆ្នាំ ២០១៨ ខាងមុខនេះ។

យោងតាមទីភ្នាក់ងារព័ត៌មាន Reuters មន្ត្រីជាន់ខ្ពស់ខាងលើបានរៀបរាប់ថា រដ្ឋាភិបាលហ្វីលីពីនកំពុងស្វះស្វែងរកថវិកាឲ្យបាន ៣០ពាន់លានប៉ឺសូ ដែលស្មើ ៥៨៤ លានដុល្លារអាមេរិកដើម្បីយកមកប្រើប្រាស់ក្នុងគម្រោងកសាងទីក្រុងនេះឡើងវិញផងដែរ។ ដើម្បីរកបានលុយគ្រប់ចំនួននេះ រដ្ឋាភិបាលហ្វីលីពីនក៏បានប្រកាសលក់សញ្ញាប័ណ្ណក្នុងស្រុករយៈពេល ២០ឆ្នាំ។

បើតាមទីភ្នាក់ងារព័ត៌មានខាងលើដដែល ធនាគារពិភពលោកបានប្រកាសសហការជាមួយរដ្ឋាភិបាលហ្វីលីពីនដើម្បីជំរុញគម្រោងសាងសង់ទីក្រុងឡើងវិញ និងជំរុញការកសាងសន្តិភាពនៅក្នុងតំបន់ភាគខាងត្បូងទាំងមូល។ ធនាគារនេះអាចនឹងជួយផ្តល់ជំនួនជាពិសេសផ្នែកបច្ចេកទេសដល់ហ្វីលីពីនដើម្បីកសាងទីក្រុងនេះឡើងវិញដែរ។

កន្លងមក លោក ឌូទើតេ បានថ្លែងការដើម្បីកសាងទីក្រុងទាំងមូលបាន វាត្រូវចំណាយយ៉ាងហោចណាស់ក៏ ៥០ពាន់លានប៉ឺសូដែរ ព្រោះវាមានការខូចខាតធ្ងន់ធ្ងរនៅក្នុងទីក្រុងដែលមានប្រជាជនម៉ូស្លីមរស់នៅច្រើននាកោះ មិនដាណាវនេះ។

ចំណែករដ្ឋមន្ត្រីការពារជាតិហ្វីលីពីន បានលើកឡើងដែរថា គេអាចចាប់ផ្តើមគម្រោងសាងសង់ទីក្រុងម៉ារ៉ាវីនៅដើមខែមករាបាន ព្រោះនៅពេលនេះទីក្រុងនេះនៅមិនទាន់មានស្ថិរភាព ហើយផ្នែកខ្លះនៅមានគ្រាប់បែក ឬគ្រឿងផ្ទុះនៅឡើយ។

អត្ថបទទាក់ទង

ឌូទើតេ ប្រកាសថា ក្រុងម៉ារ៉ាវីត្រូវបានរំដោះពីបណ្តាញក្រុមភេរវជនរដ្ឋឥស្លាមទាំងស្រុងហើយ

នៅដើមសប្តាហ៍នេះ ប្រធានាធិបតីហ្វីលីពីនបានប្រកាសពិជ័យជម្នះក្នុងការដណ្តើមទីក្រុង ម៉ារ៉ាវីពីក្រុមភេរវជនវិញ ខណៈដែលការប្រយុទ្ធនៅបន្តនៅតំបន់មួយចំនួនតូច។ ការឈានទៅប្រកាសពីការរំដោះទីក្រុងមកវិញរបស់រដ្ឋាភិបាលហ្វីលីពីននេះ កើតឡើងក្រោយពេលដែលរដ្ឋមន្ត្រីការពារជាតិហ្វីលីពីនប្រកាសថា មេខ្លោងក្រុមភេរវជន និងតំណាងក្រុមភេរវជនដែស្ហប្រចាំអាស៊ីអាគ្នេយ៍ Isnilon Hapilon ត្រូវបានយោធាហ្វីលីពីនសម្លាប់ដោយជោគជ័យហើយ។

សូមរម្លឹកផងដែរថា ថ្ងៃ២៣ ខែឧសភា ក្រុមភេរវជន Maute ដែលមានភក្តីភាពចំពោះក្រុមភេរវជនរដ្ឋឥស្លាម ឬក្រុមដែស្ហនោះបានវាយប្រហារនិងដណ្តើមកាន់កាប់ទីក្រុងម៉ារ៉ាវីស្ថិតនៅកោះមិនដាណាវ។ ក្រោយការវាយប្រហារ កងកម្លាំងសន្តិសុខហ្វីលីពីនបានបន្តហ៊ុមព័ទ្ធ និងប្រយុទ្ធសស្រាក់សស្រាំដើម្បីកម្ចាត់ក្រុមភេរវជន។ គេឃើញមានការប្រើប្រាស់ការបាញ់ផ្លោងកាំភ្លើងធំ និងវាយប្រហារតាមផ្លូវអាកាសរៀងរាល់ថ្ងៃផងដែរចាប់ពីពេលនោះមកដើម្បីបោសសម្អាតភេរវជន។ មនុស្សមិនតិចជាង ១០០០ នាក់ឡើយដែលបានស្លាប់ក្នុងការប្រយុទ្ធគ្នា ហើយជាងបួនសែននាក់បានបាត់បង់ជម្រកនិងរត់ភៀសខ្លួន៕