កីឡាអន្តរជាតិ
អន្តរជាតិ
អ្នកជំនួញស្ត្រីម្នាក់ចង់ទិញ Newcastle និងឲ្យ Benitez ជិត៤០០លានដុល្លារដោះដូរកីឡាករ អ្នកស្រី Amanda Staveley អំឡុងពេលទៅទស្សនាការប្រកួតបាល់ទាត់នៅកីឡដ្ឋាន St James Park
× អ្នកស្រី Amanda Staveley ដែលជាអ្នកជំនួញល្បីឈ្មោះម្នាក់បានដាក់សំណើរដេញថ្លៃតម្លៃ ៣០០ លានផោន ប្រហែលជាង ៣៩៥លានដុល្លារ ដើម្បីទិញក្លិប Newcastle United ដែលបានប្រកាសលក់កាលពីប៉ុន្មានថ្ងៃមុន។
ក្រោយម្ចាស់ក្លិប Newcastle United បានប្រកាសដាក់លក់ក្លិបនេះជាផ្លូវការកាលពីថ្ងៃទី១៧ ខែតុលាកន្លងមក នៅពេលនេះស្ត្រីអ្នកជំនួយជនជាតិអង់គ្លេស និងជាម្ចាស់ក្រុមហ៊ុនវិនិយោគ PCP Capital Partners ដែលគាំទ្រដោយក្រុមហ៊ុនវិនិយោគពីមជ្ឈិមបូព៌ា និងចិនក្នុងរង្វង់ទឹកប្រាក់ ២៨ ពាន់លានផោន ប្រមាណជិត ៣៧ពាន់លានដុល្លារ ត្រូវបានគេយល់ថាកំពុងចរចាជាមួយលោក Mike Ashley ដែលជាម្ចាស់ក្លិប។
សារព័ត៌មានអង់គ្លេស Telegraph ផ្សាយថា ស្ត្រីអ្នកជំនួយវ័យ៤៤ឆ្នាំនេះ ចង់សម្រេចការផ្ទេរអោយបានចប់សព្វគ្រប់នៅថ្ងៃណូអែលតែម្តង ក្នុងរង្វង់ទឹកប្រាក់ ៣៩៥លានដុល្លារ ដើម្បីយកក្លិប Newcastle មកកាន់កាប់។ ប្រសិនបើការផ្ទេរជោគជ័យ អ្នកស្រីនឹងផ្តល់ប្រាក់ជិត៤០០លានដុល្លារដល់អ្នកចាត់ការទូទៅក្រុមសារិកាព្រៃបច្ចុប្បន្នគឺលោក Rafa Benitez បន្ថែមទៀតដើម្បីទិញដូរកីឡាករ។
អ្នកស្រី Staveley ក៏ជាបុគ្គលសំខាន់ម្នាក់ដែលជួយសម្របសម្រួលឲ្យមានការទិញយកក្លិប Manchester City របស់ព្រះចៅស៊ុលតង់ Sheik Mansour នៃប្រទេសអារ៉ាប់រួមអេមេរ៉ាតកាលពីឆ្នាំ២០០៨ផងដែរ។
សូមបញ្ជាក់ថា លោក Mike Ashley បានចំណាយប្រាក់១៣០លានផោន ប្រមាណ ១៧២លានដុល្លារទិញយកក្លិបក្នុងក្របខណ្ឌ Premier League មួយនេះកាលពីឆ្នាំ២០០៧។ ក្រោមការកាន់កាប់របស់លោករយៈពេលមួយទសវត្សរ៍មក Newcastle United ធ្លាប់ធ្លាក់ទៅកាន់លីកលំដាប់ទី២ Championship ២ដង៕
Tag:
បាល់ទាត់
Newcastle United
Amanda Staveley
© រក្សាសិទ្ធិដោយ thmeythmey.com