អន្តរជាតិ
លោក ស៊ី ជិនពីង៖ ចិន មានទាំងឆន្ទៈ និងកងទ័ព បំបែកការប៉ុនប៉ងប្រកាសឯករាជ្យរបស់តៃវ៉ាន់
× ក្នុងមហាសន្និបាតបក្សកុម្មុយនីសចិន លោកប្រធានធិបតី ស៊ី ជិនពីង មិនព្រងើយកន្តើយបញ្ហាកោះតៃវ៉ាន់ឡើយ ។ ប្រធានាធិបតីរូបនេះ បានព្រមានត្រង់ៗ និងធ្ងន់ៗទៅកាន់កោះតៃវ៉ាន់ ដោយអះអាងថា ចិន នឹងចាត់វិធានគ្រប់បែបយ៉ាងដើម្បីកម្ទេច និងបញ្ឈប់ចលនានិងការប៉ុនប៉ងប្រកាសឯករាជ្យពីចិននោះ ។
លោកប្រធានាធិបតី ស៊ី ជិនភីង នៅថ្ងៃ១៨ តុលា បានថ្លែងក្នុងមហាសន្និបាតបក្សកុម្មុយនីស្តដូច្នេះថា៖ ចិន មានទាំងដំណោះស្រាយ ទំនុកចិត្ត និងសមត្ថភាព ក្នុងការទប់ទល់ក្រុមផ្តាច់ខ្លួន ដែលបានប៉ុនប៉ងប្រកាសឯករាជ្យកោះតៃវ៉ាន់ពីការគ្រប់គ្រងរបស់ចិនគ្រប់ទម្រង់។
ក្នុងនាមជាអគ្គលេខាធិការបក្ស ដែលជាតួអង្គស្នូល នៃមហាសន្និបាត លោក ស៊ី ជិនភីង បានបន្ថែមទៀតថា ចិន នឹងមិនអនុញ្ញាតឲ្យជនណា ស្ថាប័នណា ឬបក្សណាមួយ បំបែក ឬផ្តាច់ខ្លួនផ្នែកណាមួយនៃអធិបតេយ្យពីចិនឡើយ ។ នេះបើយោងតាម ប្រភពព័ត៌មានដដែល ។
សូមជម្រាបផងដែរថា ទំនាក់ទំនងចិន និងកោះតៃវ៉ាន់ បានមានភាពតានតឹងខ្លាំង ក្រោយពីប្រធានាធិបតី តៃវ៉ាន់ថ្មី លោកស្រី Tsai Ing-wen បានឡើងកាន់តំណែង ។ នោះ ក៏ព្រោះតែមេដឹកនាំតៃវ៉ាន់រូបនេះ មាននិន្នាការចង់ប្រកាសតៃវ៉ាន់ជារដ្ឋឯករាជ្យ ។
យ៉ាងណាក៏ដោយ គិតចាប់ពីឆ្នាំ១៩៤៩ មក ចិន មិនដែលបណ្តែតបណ្តោយឲ្យតៃវ៉ាន់ មានលទ្ធភាពនិងសមត្ថភាពលើបលុបដើម្បីប្រកាសឯករាជ្យបានឡើយ ។ តាមរយៈគោលនយោបាយចិនតែមួយ ក្រុងប៉េកាំង បានដាក់ សម្ពាធប្រឆាំងតៃវ៉ាន់ទាំងតាមរយៈគោលនយោបាយការទូត និងយោធាតែម្តង ៕
© រក្សាសិទ្ធិដោយ thmeythmey.com