អន្តរជាតិ
សភាអាមេរិក ទទូចឲ្យរដ្ឋបាលត្រាំ ពិចារណាដាក់ទណ្ឌកម្មយោធាមីយ៉ាន់ម៉ាឡើងវិញ រូបភាព៖ NBC
× សមាជិកសភាអាមេរិក បានទទូចឲ្យរដ្ឋបាលរបស់លោកប្រធានាធិបតីដូណាល់ ត្រាំ ចាត់វិធានការម៉ឺងម៉ាត់ប្រឆាំងយោធាជាន់ខ្ពស់មីយ៉ាន់ម៉ា ដែលពាក់ព័ន្ធនឹងវិបត្តិជនភៀសខ្លួននៅក្នុងរដ្ឋ Rakhine ។ ការពិចារណាដាក់ទណ្ឌកម្មឡើងវិញ ក៏ស្ថិតនៅក្នុងសំណើរបស់សមាជិកសភាផងដែរ ។
តំណាងរាស្ត្របក្សសាធារណរដ្ឋ និងបក្សប្រជាធិបតេយ្យរបស់អាមេរិកជាង៤០នាក់ នៅថ្ងៃ១៨ តុលា បានទទូចឲ្យរដ្ឋបាលលោកប្រធានាធិបតីអាមេរិក ដូណាល់ ត្រាំ ដាក់ទណ្ឌកម្មដោយហាមការធ្វើដំណើរមេដឹកនាំយោធាមីយ៉ាន់ម៉ាមកកាន់អាមេរិក និងរៀបចំទណ្ឌកម្មប្រឆាំងនឹងរាល់បុគ្គលដែលទទួលខុសត្រូវលើការវាយប្រហារទៅលើជនជាតិភាគតិចម៉ូស្លីមរ៉ូហ៊ីងយ៉ា ។
បើតាមភ្នាក់ងារព័ត៌មាន Reuters ញត្តិដែលក្រុមតំណាងបានផ្ញើទៅកាន់លោករដ្ឋមន្ត្រីការបរទេសអាមេរិកលោក Rex Tillerson បានសរសេរថា៖« អាជ្ញាធរមីយ៉ាន់ម៉ា ហាក់ដូចជាមិនទទួលលើហេតុការណ៍ដែលបានកើតឡើងនៅក្នុងប្រទេសឡើយ ។ ដូច្នេះ យើង ទទូចឲ្យអ្នក(រដ្ឋបាលលោកត្រាំ) ធ្វើគ្រប់បែបយ៉ាង ដើម្បីធានាឲ្យបានការការពារ និងសន្តិសុខសម្រាប់ ជនទាំងឡាយណាដែលកំពុងគាំងនៅក្នុងប្រទេសមីយ៉ាន់ម៉ា ឬអ្នកទាំងឡាយណា ដែលមាន ឆន្ទៈត្រលប់មកប្រទេសដើម ។»
តាមរបាយការណ៍អង្គការសហប្រជាជាតិ មានជនភៀសខ្លួន ដែលជាជនជាតិភាគតិចរ៉ូហ៊ីងយ៉ាជាង៥០ម៉ឺននាក់ បានចាកចេញពីរដ្ឋ Rakhine ទៅកាន់បង់ក្លាដែស ដោយសារតែការប៉ះទង្គិចនៅចុងខែសីហាកន្លងទៅ ។ របាយការណ៍ដដែលក៏បានអះអាងដែរថា ជនភៀសខ្លួននៅតែបន្តចាកចេញ ដោយអះអាងថា ពួកគេត្រូវបានគំរាមសម្លាប់ឲ្យចាកចេញ និងកាន់តែធ្ងន់ធ្ងរនោះ ភូមិនិងផ្ទះសម្បែង របស់ពួកគេ ត្រូវបានដុតកម្ទេចទៀតផង ។
អ្វីគួរកត់សម្គាល់នោះ ការលេចឡើងនៃសំណើទណ្ឌកម្មរបស់សមាជិកសភាអាមេរិក កើតឡើងស្របពេល ដែលសហភាពអឹរ៉ុប បានប្រកាសចេញគោលនយោបាយប្រឆាំងនឹងយោធាជាន់ខ្ពស់មីយ៉ាន់ម៉ា ដែលទទួលខុសលើហិង្សានោះ ។ លើសពីនេះទៅទៀតនោះ សហភាពអឹរ៉ុប ក៏ពិចារណាផ្អាកកិច្ចការសហប្រតិបត្តិការលើវិស័យការពារជាតិជាមួយមីយ៉ាន់ម៉ាផងដែរ៕
Tag:
អាមេរិក
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com