កីឡាជាតិ
ជាតិ
កីឡាហែលទឹករៀបចំប្រកួតជើងឯកដើម្បីពង្រឹងសមត្ថភាពត្រៀមព្រឹត្តិការណ៍អាស៊ាននៅព្រុយណេ កីឡាការិនីហែលទឹកជម្រើសជាតិ ហែមថុន វិទិនី ពេលចូលរួមប្រកួតពានរង្វាន់ព្រឹទ្ធាចារ្យ ហែម ថុន កាលពីពេលកន្លងទៅនៅអាងហែលទឹកក្នុងពហុកីឡដ្ឋានជាតិ
× អត្តពលិកប្រមាណជា១០០នាក់មកពី៧ក្លិបសមាគមត្រូវប្រកួតប្រជែងគ្នាដើម្បីដណ្តើមជើងឯកប្រចាំព្រឹត្តិការណ៍ប្រកួតកីឡាហែលទឹកជ្រើសរើសជើងឯកអេសស៊ីជីប្រចាំឆ្នាំ២០១៧ ចាប់ពីថ្ងៃទី២១ដល់២២ តុលា នៅអាងហែលទឹកក្នុងពហុកីឡដ្ឋានជាតិ។ ការប្រកួតនេះធ្វើឡើងដើម្បីអបអរពិធីបុណ្យអុំទូកបណ្តែតប្រទីបអកអំបុក និងសំពះព្រះខែ និងដើម្បីធ្វើតេស្តសមត្ថភាពកីឡាករកីឡាការិនីត្រៀមចូលរួមប្រកួតជើងឯកយុវជនអាស៊ាននៅប្រទេសព្រុយណេ។
បើយោងតាមអគ្គលេខាធិការសហព័ន្ធខ្មែរកីឡាហែលទឹក លោក ហែម គីរី ការប្រកួតកីឡាហែលទឹកជ្រើសរើសជើងឯកកំពតស៊ីមេនដែលដូរឈ្មោះជាជើងឯក SCG លើកទី៧ ធ្វើឡើងក្នុងគោលបំណងអបអរពិធីបុណ្យអុំទូកបណ្តែតប្រទីបអកអំបុក និងសំពះព្រះខែដែលរៀបចំឡើងចន្លោះពីថ្ងៃទី២ ដល់ថ្ងៃទី៤ វិច្ឆិកា ឆ្នាំ២០១៧។ លើសពីនេះ ដើម្បីពង្រឹងសមត្ថភាពកីឡាករកីឡាការិនីសម្រាប់ត្រៀមចូលរួមប្រកួតជើងឯកយុវជនអាស៊ាន CH Swimming Championship នៅប្រទេសព្រុយណេ។
លោក ហែម គីរី បានបញ្ជាក់ថា សម្រាប់ការប្រកួតជើងឯកយុវជនអាស៊ានដែលរៀបចំរយៈពេល៣ថ្ងៃចាប់ពីថ្ងៃទី១០ដល់១២ វិច្ឆិកា ឆ្នាំ២០១៧ នៅប្រទេសព្រុយណេ សហព័ន្ធខ្មែរកីឡាហែលទឹកនឹងបញ្ជូនកីឡាករអាយុក្រោម១៣ឆ្នាំ១រូប និងកីឡាការិនីអាយុក្រោម១៥ឆ្នាំ១រូបឲ្យចូលរួម។ លោកបានបន្តថា សហព័ន្ធគ្រោងបញ្ជូនអត្តពលិកជាច្រើនរូបដើម្បីចូលរួមព្រឹត្តិការណ៍នេះ ប៉ុន្តែដោយសារមានបញ្ហាថវិកាទើបសហព័ន្ធសម្រេចបញ្ជូនតែពីររូបនេះឲ្យចូលរួម។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកពេលផ្តល់បទសម្ភាសដល់សារព័ត៌មានថ្មីៗនៅពហុកីឡដ្ឋានជាតិ
ទោះបីយ៉ាងនេះក្តី អគ្គលេខាធិការសហព័ន្ធខ្មែរកីឡាហែលទឹកបានដាក់ក្តីរំពឹង៦០ភាគរយសម្រាប់ការប្រជែងដណ្តើមមេដាយពីការប្រកួតនេះ។ ការរំពឹងបែបនេះ ដោយសារកីឡាករកីឡាការិនីដែលត្រៀមចូលរួមសុទ្ធសឹងជាកីឡាករមានសមត្ថភាព និងមានកំណត់ត្រាខ្ពស់។ តែយ៉ាងណា លោក មិនទាន់បង្ហាញឈ្មោះកីឡាករកីឡាការិនីទាំងពីររូបនោះទេ។
សម្រាប់ការចូលរួមលើកនេះអគ្គលេខាធិការសហព័ន្ធខ្មែរកីឡាហែលទឹកនឹងចូលរួមកិច្ចប្រជុំរបស់សហព័ន្ធកីឡាហែលទឹកអាស៊ានជាបណ្តាថ្នាក់ដឹកនាំសហព័ន្ធផ្សេងៗទៀត ដើម្បីពិភាក្សាពាក់ព័ន្ធនឹងការប្រកួតជើងឯកយុវជនអាស៊ាន។ ឆ្លៀតក្នុងឱកាសនោះលោកនឹងស្នើដល់ថ្នាក់ដឹកនាំសហព័ន្ធកីឡាហែលទឹកអាស៊ានសុំធ្វើម្ចាស់ផ្ទះការប្រកួតជើងឯកយុវជនអាស៊ាននៅឆ្នាំ២០១៨ ឬឆ្នាំ២០១៩ ខាងមុខផងដែរ។
ដោយឡែក ការប្រកួតជើងឯកអេសស៊ីជី(SCG)លើកទី៧ឆ្នាំនេះមានអត្តពលិកមកពី៧ក្លិប-សមាគមប្រមាណជា១០០នាក់ចូលរួម ហើយអត្តពលិកទាំងនេះត្រូវប្រកួតប្រជែងលើ២៨ប្រភេទវិញ្ញាសាចាប់ពីថ្ងៃទី២១ដល់២២ តុលា នៅអាងហែលទឹកក្នុងពហុកីឡដ្ឋានជាតិ។ ក្លិប-សមាគមទាំង៧នោះរួមមាន ក្លិបព្រឹទ្ធាចារ្យហែមថុន, ក្រសួងមហាផ្ទៃ, ក្រសួងព័ត៌មាន, ជ្រោយចង្វា, ការ៉ាកុល, មច្ឆានុប និងក្លិបនាគរាជកំពង់ចាម៕
Tag:
ហែលទឹក
ហែម គីរី
SCG
© រក្សាសិទ្ធិដោយ thmeythmey.com