កីឡាជាតិ
ជាតិ
ជម្រាបលា Leo! លោក ម៉ៃ តុលា អះអាងពីការបញ្ចប់កិច្ចសន្យាគ្រូបង្វឹកប្រេស៊ីលរូបនេះ
× ដំណើររបស់លោក Leonardo Vitorino ជាមួយក្រុមកីឡាបាល់ទាត់ជម្រើសជាតិកម្ពុជា ត្រូវបានបញ្ចប់ត្រឹមរយៈពេល៨ខែ បើគិតចាប់តាំងពីខែមីនា មក។ តាមរយៈហ្វេសប៊ុករបស់ខ្លួន គ្រូបង្វឹកជនជាតិប្រេស៊ីលរូបនេះ បានប្រកាសពីការចែកផ្លូវពីក្រុមជម្រើសជាតិកម្ពុជា ខណៈអគ្គលេខាធិការស្តីទីសហព័ន្ធកីឡាបាល់ទាត់កម្ពុជា (FFC) ក៏បានអះអាងថា សហព័ន្ធពិតជាបានបញ្ចប់កិច្ចសន្យារបស់លោក Leonardo ពិតប្រាកដមែន។
«ខ្ញុំលែងមានតួនាទីជាគ្រូបង្វឹកជម្រើសជាតិកម្ពុជាទៀតឡើយ»។ លោក Leonardo Vitorino បានសរសេរបែបនេះនៅលើទំព័រហ្វេសប៊ុកផ្លូវការរបស់ខ្លួន កាលពីយប់ថ្ងៃព្រហស្បតិ៍ ទី១៩ ខែតុលា ឆ្នាំ២០១៧ បន្ទាប់ពីលោកបានដឹកនាំក្រុមជម្រើសជាតិបន្តពីគ្រូបង្វឹកកូរ៉េខាងត្បូង លោក Lee Tae Hoon បានរយៈពេល៨ខែ។
គ្រូបង្វឹកប្រេស៊ីលវ័យ៤៣ឆ្នាំរូបនេះ មិនបានបញ្ជាក់ពីហេតុផលនៃការចាកចេញនោះឡើយ។ ឆ្លើយតបសារព័ត៌ មានថ្មីៗតាមទូរសព្ទ លោក ម៉ៃ តុលា អគ្គលេខាធិការស្តីទីសហព័ន្ធកីឡាបាល់ទាត់កម្ពុជា (FFC) បានបញ្ជាក់ពីការបញ្ចប់កិច្ចសន្យាជាមួយលោក Leonardo។
លោក ម៉ៃ តុលា បានពន្យល់ថា៖ «យើងបានបញ្ចប់កិច្ចសន្យាជាមួយគាត់ [Leonardo] ពិតប្រាកដមែន ដោយយើងទាំងអស់គ្នាដឹងពីមូលហេតុជាទូទៅហើយ។ ពិតណាស់ យើងមិនអាចដាក់គោលដៅឲ្យគាត់ដឹកនាំឈ្នះរាល់ការប្រកួតនោះឡើយ ប៉ុន្តែលទ្ធផលកន្លងមក មិនដូចនូវអ្វីដែលយើងរំពឹងទុក»។
នៅក្នុងសាររបស់ខ្លួន លោក Leonardo បានអរគុណដល់ប្រជាជនកម្ពុជា ជាពិសេស អ្នកគាំទ្រទាំងអស់ រួមទាំងសហព័ន្ធដែលបានផ្តល់ឱកាសដល់លោកដឹកនាំក្រុមជម្រើសជាតិកម្ពុជា។ ជាមួយគ្នានេះផងដែរ គ្រូបង្វឹកបង្ហាញថាសោកស្តាយថា៖«សូមអភ័យទោសចំពោះការមិនអាចផ្លាស់ប្តូរអ្វីមួយបាន»។
ក្រោយចុះកិច្ចសន្យារយៈពេល១ឆ្នាំដំបូង លោក Leonardo បានបញ្ជាក់យ៉ាងម៉ឺងម៉ាត់ថា៖ «ខ្ញុំមកទីនេះ ដើម្បីធ្វើការផ្លាស់ប្តូរបាល់ទាត់នៅកម្ពុជា។ ខ្ញុំនៅកម្ពុជាដើម្បីធ្វើការជូនកម្ពុជា មិនមែនដើម្បីប្រទេសប្រេស៊ីល ឬប្រទេសណាមួយផ្សេងទៀតឡើយ»។
ក្នុងតួនាទីជាគ្រូបង្វឹក លោក Leonardo បានធ្វើការផ្លាស់ប្តូរសមាសភាពជាច្រើននៅក្នុងក្រុមជម្រើសជាតិ ក៏ដូចជាឈុតស៊ីហ្គេម។ លោកតែងតែអះអាងពីការខំប្រឹងបណ្តុះបណ្តាល និងពង្រឹងធនធានសម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣ ។
ចំពោះបញ្ហាវិន័យ គ្រូបង្វឹកប្រេស៊ីល បានបណ្តេញកីឡាករសំខាន់ៗពីររូបពីឈុតស៊ីហ្គេម និងក្រុមជម្រើសជាតិ ហើយបានបន្តផ្លាស់ប្តូរសមាសភាពមួយចំនួន។ ចំណាត់ការរបស់លោក Leo ទទួលបានការគាំទ្រ និងការរិះគន់ដំណាលគ្នា។
លោក ម៉ៃ តុលា បានសម្តែងការគាំទ្រយ៉ាងពេញទំហឹងលើចំណាត់ការនានាដែលរួមចំណែកក្នុងការពង្រឹងវិន័យកីឡាករ។ លោកលើកឡើងថា៖ «គ្រូបង្វឹកមានតួនាទីយ៉ាងខ្លាំងក្នុងការពង្រឹងវិន័យកីឡាករ ដើម្បីឲ្យពួកគេគោរពអាជីព តម្លៃ និងកាតាព្វកិច្ចរបស់ខ្លួន ហើយនេះជាអ្វីដែលឯកឧត្តមប្រធាន [លោក សៅ សុខា] យកចិត្តទុកដាក់បំផុត»។
អគ្គលេខាធិការស្តីទី FFC ក៏បានកត់សម្គាល់ឃើញកីឡាករមួយចំនួនដែលត្រូវការពង្រឹងផ្នែកវិន័យ ជាពិសេសដែលមានជំងឺជា Star [តារា] ប៉ុន្តែលោកចង់ឃើញចំណាត់ការនានាឈរលើគោលការណ៍ច្បាស់លាស់ ដោយមិនធ្វើឲ្យអ្នកណាម្នាក់បាក់មុខ។
បើគិតចាប់តាំងពីខែមីនាមក លោក Leonardo បានដឹកនាំក្រុមជម្រើសជាតិកម្ពុជាប្រកួតផ្លូវការបាន៧លើក ក្នុងនោះមានជំនួបមិត្តភាពអន្តរជាតិ និងជំនួបវគ្គជម្រុះ AFC Asian Cup ឆ្នាំ២០១៩ ដោយចាញ់៦លើក និងឈ្នះតែ១លើកគត់។ នាការដឹកនាំចុងក្រោយរបស់លោក កម្ពុជាបានចាញ់វៀតណាម ៥-០ នាវគ្គជម្រុះ AFC Asian Cup ឆ្នាំ២០១៩។
ចំពោះការដឹកនាំឈុតស៊ីហ្គេមនៅម៉ាឡេស៊ី កាលពីខែសីហា កន្លងមក ក្រុម U22 កម្ពុជា ទទួលបានលទ្ធផលដ៏ខកចិត្តដោយចាញ់ទាំង៥ប្រកួតនៅក្នុងពូល B ក្នុងនោះចាញ់ហ្វីលីពីន ២-០ ចាញ់វៀតណាម ៤-១ ចាញ់ថៃ ៣-០ ចាញ់ទីម័រខាងកើត ១-០ និងចាញ់ឥណ្ឌូណេស៊ី ២-០ ។
ក្រៅពីគ្រូជំនួយជនជាតិខ្មែរ លោក Leonardo មានសហការីប្រេស៊ីល២រូបទៀត គឺ លោក Willander Fonseca និងលោក Fernando Vitorino ប្អូនប្រុសបង្កើតរបស់លោក ដែលកាន់តំណែងជាគ្រូបង្វឹកផ្នែកចាំទី។ កម្ពុជានៅសល់បេសកកម្មបន្តទៀតក្នុងវគ្គជម្រុះ AFC Asian Cup ឆ្នាំ២០១៩ ដោយត្រូវប៉ះជាបន្តបន្ទាប់ជាមួយក្រុមហ្ស៊កដានី និងអាហ្វហ្គានីស្ថាន។ ទំព័រហ្វេសប៊ុក BTV Cambodia បានដកស្រង់សម្តីលោក ខៀវ សាម៉េត អនុប្រធាន FFC ដែលបានអះអាងថា គ្រូបង្វឹកជប៉ុន លោក Kazunori Ohara នឹងទទួលភារកិច្ចដឹកនាំក្រុមជម្រើសជាតិកម្ពុជាបណ្តោះអាសន្ន។
ទោះបីជាយ៉ាងណាក៏ដោយ លោក ម៉ៃ តុលា មិនទាន់ហ៊ានអះអាងផ្លូវការលើការតែងតាំងលោក Ohara ជំនួសលោក Leonardo ឡើយ។ លោក Ohara ជានាយកបច្ចេកទេសរបស់ FFC និងធ្លាប់កាន់តំណែងជាគ្រូបង្វឹកជម្រើសជាតិកម្ពុជារយៈពេលខ្លីផងដែរ៕
Tag:
បាល់ទាត់
ជម្រើសជាតិ
Leonardo Vitorino
© រក្សាសិទ្ធិដោយ thmeythmey.com