ជាតិ
សេដ្ឋកិច្ច
ក្រុមហ៊ុនចាប់ផ្ដើមសង់ឃ្លាំងស្តុកស្រូវ និងឡសម្ងួត៣កន្លែង ក្នុងទឹកប្រាក់១៥លានដុល្លារ
× ភ្នំពេញ៖ ក្រុមហ៊ុន Amru Rice និងក្រុមហ៊ុន Khmer Food ដែលឈ្នះការដេញថ្លៃទទួលទុនពីរដ្ឋាភិបាល នឹងចាប់ផ្ដើមសាងសង់ឃ្លាំងស្តុក និងឡសម្ងួត នៅខេត្តកំពង់ធំ ព្រៃវែង និងខេត្តតាកែវ បន្ទាប់ពីក្រុមហ៊ុនទាំងនេះបានចុះកិច្ចព្រមព្រៀងជាមួយក្រុមហ៊ុនសាងសង់ និងផ្គត់ផ្គង់ នៅថ្ងៃទី២០ខែតុលា។
ឃ្លាំងស្តុក និងឡសម្ងួត ដែលស្ថិតក្នុងគម្រោងនេះមានសមត្ថភាពស្តុកបាន ៥ម៉ឺនតោន និងសម្ងួតបាន ១៥០០តោនក្នុងមួយថ្ងៃ សម្រាប់ទីតាមនីមួយៗ។ គម្រោងក្នុងទីតាំងនីមួយៗនឹងស្រូបយកស្រូវក្នុងខេត្តនៃទីតាំងនោះ រួមទាំងតំបន់ជុំវិញ។ ឡសម្ងួតទាំងនេះត្រូវបានគ្រោង ដាក់ឲ្យដំណើរការចាប់ពីខែមករាឆ្នាំ២០១៨ ខាងមុខនេះ ខណៈឃ្លាំងស្តុកនឹងត្រូវបញ្ចប់ការសាងសង់នៅពេលក្រោយនោះ។ ក្រុមហ៊ុន Amru Rice អនុវត្តគម្រោងនេះនៅខេត្តកំពង់ធំ រីឯគម្រោងនៅពីរខេត្តទៀតជាប្រតិបត្តិការរបស់ក្រុមហ៊ុន Khmer Food ។
លោក កៅ ថាច អគ្គនាយកធនាគារអភិវឌ្ឍន៍ជនបទ (RDB) ដែលអញ្ជើញជាអធិបតីក្នុងពិធីចុះកិច្ចព្រមព្រៀងខាងលើនេះ បានឲ្យដឹងថា គម្រោងឃ្លាំងស្តុក និងឡសម្ងួតទាំងនេះ ក្នុងមួយទីតាំងមានតម្លៃ ៥លានដុល្លារ ដែលសរុបទាំងអស់គឺ ១៥លានដុល្លារ។ ហិរញ្ញប្បទាននេះ គឺក្រុមហ៊ុនទទួលបានឥណទានពីរដ្ឋាភិបាល។
នេះជាគម្រោងទី២របស់រដ្ឋាភិបាលដែលចាប់ដៃគូជាមួយផ្នែកឯកជន លើការកសាង និងប្រតិបត្តិការឃ្លាំងស្តុក និងឡសម្ងួត។ រីឯគម្រោងទី១ គឺមានទីតាំងនៅខេត្តបាត់ដំបង ដែលអនុវត្តដោយធនាគារស្រូវរបស់លោក ភូ ពុយ ដែលអាចស្តុកស្រូវបាន ២០ម៉ឺនតោន និងសម្ងួតស្រូវ ៣០០០តោនក្នុងមួយថ្ងៃ។
ការបង្កើតឲ្យមានឃ្លាំងស្តុក និងឡសម្ងួតទាំងនេះ ត្រូវបានអ្នកជំនាញអះអាងថាវាជាឆន្ទៈរបស់រដ្ឋាភិបាលក្នុងការដោះស្រាយបញ្ហាតម្លៃស្រូវរបស់កសិករ ដោយហេដ្ឋារចនាសម្ព័ន្ធទាំងនេះនឹងជួយបញ្ចៀសការបញ្ចេញស្រូវលក់លើសតម្រូវការ ឬធ្វើឲ្យជន់ទីផ្សារក្នុងពេលព្រមៗគ្នា។
ទោះយ៉ាងណាឃ្លាំងស្តុក និងឡសម្ងួតទាំងនេះ មិនទាន់អាចឆ្លើយតបតម្រូវការក្នុងវិស័យស្រូវអង្កររបស់កម្ពុជាទាំងស្រុងនៅឡើយនោះទេ។ លោក កៅ ថាច ថ្លែងយ៉ាងដូច្នេះថា៖«ឃ្លាំងស្តុកបួនទីតាំងអាចស្តុកស្រូវ ៣៥ម៉ឺនតោន មិនទាន់អាចដោះស្រាយបញ្ហាអស់នោះទេ ព្រោះនៅច្រើនដែរ តែយើងដោះស្រាយបានមួយចំនួនធំហើយ ទោះបីស្រូវត្រូវធ្វើពាណិជ្ជកម្មមានបួនលានតោន តែមិនមែនបួនលានតោនក្នុងពេលតែមួយនោះទេ គឺមានដំណាក់កាល»៕
Tag:
អង្ករ
ឃ្លាំងស្តុក
© រក្សាសិទ្ធិដោយ thmeythmey.com