ជាតិ
គ្រាប់បែកនៅស្វាយវៀង កម្ពុជាថាជាគ្រាប់បែកគីមី ខណៈអាមេរិកថាគ្រាប់បែកបង្ហូរទឹកភ្នែក រូបពីហ្វេសប៊ុកមជ្ឈមណ្ឌលបោសសំអាត និងកម្ចាត់មីនកម្ពុជា
× វត្តមានគ្រាប់បែកនៅក្នុងខេត្តស្វាយរៀង កំពុងបង្កឲ្យកាន់តែចម្រូងចម្រាសរវាងរាជរដ្ឋាភិបាលកម្ពុជា និងសហរដ្ឋអាមេរិក។ កម្ពុជា បានអះអាងថា វត្តមានគ្រាប់បែកនៅខេត្តស្វាយរៀង ជាគ្រាប់បែកគីមីដែលទម្លាក់ដោយអាមេរិកនាទសវត្ស១៩៧០ ខណៈអាមេរិក បញ្ជាក់ថា ជាគ្រាប់បែកបង្ហូរទឹកភ្នែក។
កម្ពុជា និងអាមេរិក កំពុងខ្វែងសម្តីគ្នា វត្តមានគ្រាប់បែកនៅក្នុងខេត្តស្វាយរៀង។ រាជរដ្ឋាភិបាលកម្ពុជា បានអះអាងថា វត្តមានគ្រាប់បែកដែលកម្ពុជាទើបរកឃើញ ក្នុងឃុំគគីរ និងទីតាំងជាច្រើនទៀត គឺជាគ្រាប់បែកគីមីដែលទម្លាក់ដោយអាមេរិកនាទសវត្ស១៩៧០ ខណៈអាមេរិក បញ្ជាក់នៅថ្ងៃទី១៩ ខែតុលាថា ជាគ្រាប់បែកបង្ហូរទឹកភ្នែក។ សេចក្តីថ្លែងការណ៍ស្ថានទូតអាមេរិកប្រចាំកម្ពុជា បានបញ្ជាក់ទៀតថា អាជ្ញាធរកម្ពុជា ក៏បានដឹងពីវត្តមាននៃគ្រាប់បែកបង្ហូរទឹកភ្នែកនេះយូរឆ្នាំមកហើយដែរ ហើយភាគីកម្ពុជា ថែមទាំងទទួលបានការបណ្តុះបណ្តាលបច្ចេកទេសដោះគ្រាប់នេះចេញ ដល់ទៅ២លើកទៀតផង។
អាជ្ញាធរមីនកម្ពុជា បានថ្កោលទោសចំពោះការលើកឡើងដូច្នេះរបស់ស្ថានទូតអាមេរិក និងចាត់ទុកថា អាមេរិក មានចេតនាគេចវេសពីការទទួលខុសត្រូវ។ អាជ្ញាធរមីនបន្តក្នុងសេចក្តីថ្លែងការណ៍របស់ខ្លួនថា អាជ្ញារមីន ទើបតែបានដឹងព័ត៌មាននេះកាលពីអំឡុងខែមករា ឆ្នាំ២០១៧នេះ ដោយសារមានការណ៍ពីប្រជាពលរដ្ឋនៅតំបន់នោះ។ ក្រោយមក អាជ្ញាធរមីន និងស្ថាប័នពាក់ព័ន្ធ បានដាក់ស្លាកសញ្ញាសម្គាល់ ហ៊ុំព័ទ្ធទីតាំងសង្ស័យ និងហាមប្រាមប្រជាពលរដ្ឋកុំឲ្យទៅប៉ះពាល់ទីតាំងនោះ ទន្ទឹមនឹងការស្វះស្វែងរកការសហការពីស្ថានទូតអាមេរិកនៅក្រុងភ្នំពេញ ប៉ុន្តែមិនដែលទទួលបានការឆ្លើយតប។ នេះបើតាមសេចក្តីថ្លែងការណ៍របស់អាជ្ញាធរមីនកម្ពុជា ដែលបន្តទៀតថា រាជរដ្ឋាភិបាលកម្ពុជា មិនអាចរង់ចាំការឆ្លើយតបបាន ហើយក៏សម្រេចបោសសម្អាត ចាប់ពីថ្ងៃទី១ ខែតុលា ឆ្នាំ២០១៧ ហើយក៏បានរកឃើញទីតាំងផ្សេងៗជាច្រើនទៀតក្នុងភូមិសាស្ត្រដដែល ដោយសារប្រជាពលរដ្ឋ១៩នាក់ ដែលរងផលប៉ះពាល់ពីសារធាតុគីមីទាំងនោះ។
ទោះជាយ៉ាងណាក្តី អាជ្ញាធរមីន ក៏នៅតែអំពាវនាវឲ្យសហរដ្ឋអាមេរិកចូលរួមបោសសម្អាតបំផ្លាញគ្រាប់បែកដែលភាគីកម្ពុជា អះអាងថាជាគ្រាប់បែកគីមីទាំងនោះចេញ និងបន្តបោសសម្អាតនៅកន្លែងផ្សេងទៀតផងដែរ។
ទាក់ទងនឹងឥទ្ធិពលគ្រាប់បែកនេះ កាលពីថ្ងៃទី១២ ខែតុលាកន្លងទៅ ក្រសួងសុខាភិបាលកម្ពុជា បានរកឃើញក្មេង៣នាក់ នៅក្នុងឃុំគគីរ ស្រុករមាសហែក ខេត្តស្វាយរៀង កើតមកមានភាពមិនប្រក្រតី។ នៅមុនការរកឃើញនេះ ក៏មានពលរដ្ឋ១០នាក់ មានអាការរមាស់ ហើមស្បែក និងក្អួតចង្អោរផងដែរ។
សូមបញ្ជាក់ថា អាមេរិកបានទម្លាក់គ្រាប់បែកប្រមាណ ២លាន ៧សែនតោន ក្នុងអំឡុងសង្គ្រាមនាទសវត្ស១៩៧០ រវាងកងទ័ពសាធារណរដ្ឋកម្ពុជា ដែលគាំទ្រដោយសហរដ្ឋអាមេរិក និងកងទ័ពតស៊ូរបស់ខ្មែរក្រហម ក្រោយពេលពួកគេធ្វើរដ្ឋប្រហារទម្លាក់សម្តេច នរោត្តម សីហនុ នាថ្ងៃទី១៨ ខែមីនា ឆ្នាំ១៩៧០៕
Tag:
គ្រាប់បែកគីមី
កម្ពុជា
អាមេរិក
© រក្សាសិទ្ធិដោយ thmeythmey.com