អន្តរជាតិ
លោកលី សៀនឡុង៖« ទោះគ្មានកិច្ចព្រមព្រៀង TPP ពាណិជ្ជកម្មសេរីនៅបន្តរីកធំធាត់ រូបភាព៖ គណនី twitter របស់លោកនាយករដ្ឋមន្ត្រី លី សៀនឡុង
× នាយករដ្ឋមន្ត្រីសិង្ហបុរី លោក លី សៀនឡុង សង្ឃឹមថា ទោះជាកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក (TPP) មិនអាចចេញរូបរាងក្តី ទំហំពាណិជ្ជរវាងសិង្ហបុរីជាមួយដៃគូនានានៅបន្តរីកធំធាត់។ ប៉ុន្តែបច្ចុប្បន្ន សមាជិកនៅសល់ទាំង ១១ កំពុងបន្តពិភាក្សាគ្នាដើម្បីឲ្យកិច្ចព្រមព្រៀងនេះអាចអនុវត្តបាន ទោះគ្មានអាមេរិកផង។
នាយករដ្ឋមន្ត្រីសិង្ហបុរី លី សៀនឡុង នឹងបំពេញទស្សនកិច្ចនៅសហរដ្ឋអាមេរិកចាប់ពីថ្ងៃ ២២ ខែតុលានេះ។ មុនទស្សនកិច្ចនេះលោកបានផ្តល់ទស្សនាទានពាក់ព័ន្ធកិច្ចព្រមព្រៀងពាណិជ្ជកម្មស្តង់ដាមាសភាពជាដៃគូអន្តរប៉ាស៊ីហ្វិក ដែលអាមេរិកបោះបង់ចោល ហើយសិង្ហបុរីជាសមាជិកដែរ។
ក្នុងបទសម្ភាសន៍ជាមួយសារព័ត៌មាន CNBC ថ្ងៃព្រហស្បតិ៍ ទី ១៩ តុលា លោក លី សៀនឡុង បានបង្ហាញការយល់ឃើញថា បោះទោះជាកិច្ចព្រមព្រៀងពាណិជ្ជកម្មនេះមិនចេញរូបរាងក្តី ក៏ទំនាក់ទំនងពាណិជ្ជកម្មរវាងសិង្ហបុរីនិងប្រទេសដទៃទូទាំងពិភពលោកនៅបន្តរីកធំធាត់ដដែល។
លោក លី បានបញ្ជាក់បែបនេះ៖ «កិច្ចព្រមព្រៀងពាណិជ្ជកម្ម TPP ជួយឲ្យទំនាក់ទំនងរវាងប្រទេសនានាតំបន់ប៉ាស៊ីហ្វិក ជាពិសេសរវាងសមាជិកកិច្ចព្រមព្រៀងនេះ ដែលមានទាំងមហាអំណាចសេដ្ឋកិច្ចដូចជាជប៉ុន អូស្ត្រាលី អាមេរិក កាណាដា និងម៉ិកស៊ិកជាដើម។ ពេលគ្មានកិច្ចព្រមព្រៀង TPP ក្តី ទំហំពាណិជ្ជកម្មយើងនៅនៅតែសំខាន់ ហើយយើងសង្ឃឹមថា វានឹងបន្តរីកធំធាត់ទៀត»។
តាមពិតទៅ កិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក ត្រូវបានបង្កើតឡើងនៅក្នុងខែតុលា ឆ្នាំ២០១៥ ដោយមានសមាជិក ១២ ក្នុងនោះមាន កាណាដា, ព្រុយណេ, ម៉ាឡេស៊ី, ស៊ីលី, ម៉ិកស៊ិក, នូវែលសេឡង់. ប៉េរូ, ជប៉ុន, សិង្ហបុរី, វៀតណាម អូស្ត្រាលី និងសហរដ្ឋអាមេរិក។
លោក ដូណាល់ ត្រាំ បានសម្រេចទាញអាមេរិកចេញពីកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក (TPP) បន្ទាប់ពីលោកស្បថចូលកាន់តំណែងចុងខែមករាឆ្នាំនេះ។ ក្រោយអាមេរិកចាកចេញទៅ សមាជិកនៅសេសសល់បានសន្យាបន្តដំណើរទៅមុខ និងធ្វើឲ្យកិច្ចព្រមព្រៀងនេះចេញរូបរាងជាផ្លូវការផងដែរ។
ក្នុងនាមជាសមាជិកមួយក្នុងចំណោម ១១ដែលនៅសល់ សិង្ហបុរីបានបង្ហាញអារម្មណ៍ខកចិត្តខ្លាំងចំពោះកាយវិការរបស់សហរដ្ឋអាមេរិកដែរ។ ប៉ុន្តែលោក លី សៀនឡុងបានបញ្ជាក់ថា សិង្ហបុរីគោរពការសម្រេចចិត្តរបស់មេដឹកនាំអាមេរិក ហើយសមាជិកនៅសល់ទាំង ១១នឹងបន្តពិភាក្សាគ្នា និងស្វែងរកវិធីដើម្បីឲ្យកិច្ចព្រមព្រៀងនេះអាចអនុវត្តទៅបាន។
ពាក់ព័ន្ធនឹងការបន្តពិភាក្សាគ្នាលើកិច្ចព្រមព្រៀងពាណិជ្ជកម្មនេះដែរ លោក លី សៀនឡុង បានអះអាងថា សមាជិកទាំង ១១ ត្រៀមខ្លួនដឹកនាំកិច្ចព្រមព្រៀងនេះរៀងខ្លួនដោយគ្មានវត្តមានអាមេរិក។ លោកក៏សង្ឃឹមថា ក្រោយកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APE) នៅវៀតណាម វានឹងមានការវិវត្តច្រើនទៀតប្រកបដោយភាពវិជ្ជមានផងដែរ៕
Tag:
លី សៀនឡុង
សិង្ហបុរី
TPP
ដូណាល់ ត្រាំ
© រក្សាសិទ្ធិដោយ thmeythmey.com