ជាតិ
បណ្តឹងសុំឲ្យរំលាយបក្ស ឈានទៅរកការជំនុំជម្រះ ខណៈ CNRP មិនអើពើ
× ភ្នំពេញ៖ គណបក្សសង្គ្រោះជាតិ ដែលក្លាយជាចុងចោទ ក្រោមបណ្តឹងរបស់ក្រសួងមហាផ្ទៃ ធ្វើមិនដឹងមិនឮ ចំពោះចំណាត់ការរបស់តុលាការកំពូល។ យ៉ាងណា ភាពស្ងៀមស្ងាត់របស់គណបក្សសង្គ្រោះជាតិបែបនេះ មិនមានអ្វី ដែលពាក់ព័ន្ធនឹងនីតិវិធីឡើយ។
ភាពព្រងើយកន្តើយរបស់គណបក្សសង្គ្រោះជាតិ ចំពោះការបង្គាប់របស់តុលាការកំពូល មិនអាចប៉ះពាល់ដល់នីតិវិធីនោះទេ។ នេះជាការអះអាងរបស់អ្នកនាំពាក្យតុលាការកំពូល លោក នៅ មុនីជោត ដែលប្រាប់សារព័ត៌មានថ្មីៗ ដោយលោកបញ្ជាក់យ៉ាងដូច្នេះថា៖«មិនមានបញ្ហាទេ។ តុលាការកំពូល នៅតែបន្តនីវិធីដដែល»។
លោក នៅ មុនីជោត អះអាងថា រហូតមកដល់ពេលនេះ តុលាការកំពូល មិនទាន់កំណត់កាលបរិច្ឆេទ ដើម្បីបើកសវនាការលើបណ្តឹងរបស់ក្រសួងមហាផ្ទៃ ដែលសុំឲ្យរំលាយគណបក្សសង្គ្រោះជាតិនោះទេ។ ប៉ុន្តែ លោកបន្ថែមថា តុលាការកំពូលនៅតែបន្តនីតិវិធីឆ្ពោះទៅជំនុំជម្រះនាពេលខាងមុខ។
លោក នៅ មុនីជោត បន្តទៀតថា បើតុលាការកំពូល បើកសវនាការនាពេលខាងមុខ តែភាគីគណបក្សសង្គ្រោះជាតិមិនចូលរួម ឬមិនពឹងពាក់មេធាវី ដើម្បីការពារសិទ្ធិ ក៏សវនាការនោះ អាចប្រព្រឹត្តទៅបានដែរ។ អ្នកនាំពាក្យតុលាការកំពូលរូបនេះ បកស្រាយថា៖«ចូលឬមិនចូល ជាសិទ្ធិរបស់គេ។ តែមិនអាចបង្អង់ [សវនាការ] បានទេ»។
កាលពី១0ថ្ងៃមុន តុលាការកំពូល បានបង្គាប់ឲ្យគណបក្សសង្គ្រោះជាតិ ដាក់ភស្តុតាងនិងឯកសារផ្សេងៗ ដើម្បីជាប្រយោជន៍របស់ខ្លួន ក្នុងការតតាំងជាមួយក្រសួងមហាផ្ទៃ ដែលដើរតួជាដើមបណ្តឹង។ ប៉ុន្តែគណបក្សសង្គ្រោះជាតិ មិនបានធ្វើតាមបង្គាប់ឡើយ។
សារព័ត៌មានថ្មីៗ មិនអាចសុំការឆ្លើយតបពីអ្នកនាំពាក្យគណបក្សសង្គ្រោះជាតិបានទេ ដោយសារតែហៅទូរសព្ទមិនចូល។ ប៉ុន្តែ លោក ម៉ៅ មុនីវណ្ណ តំណាងរាស្ត្រ និងជាអនុប្រធានគណៈកម្មាធិការប្រតិបត្តិនៃគណបក្សសង្គ្រោះជាតិ ធ្លាប់ប្រាប់សារព័ត៌មានថ្មីៗ កាលពីកន្លងទៅ យ៉ាងដូច្នេះថា៖«យើង មិនដាក់ភស្តុតាងឬឯកសារទេ។ យើង គ្មានឯកសារអ្វីត្រូវដាក់ផង។ យើងដឹងហើយ ទោះយើងដាក់ឯកសារ ឬមានមេធាវី ក៏គ្មានប្រយោជន៍ដែរ។ បណ្តោយ ឲ្យដំណើរការតាមហ្នឹងចុះ..»។
រីឯឯកឧត្តម កឹម សុខា ប្រធានគណបក្សសង្គ្រោះជាតិ ដែលកំពុងស្ថិតក្នុងពន្ធនាគារ ក្រោមការសង្ស័យរបស់សមត្ថកិច្ចនិងតុលាការថា ជាប់ពាក់ព័ន្ធនឹងអំពើក្បត់ជាតិ ក៏មិនប្រតិកម្មនឹងចំណាត់ការរបស់តុលាការកំពូលដែរ។ លោក សំ សុគង់ មេធាវីមួយរូបរបស់ឯកឧត្តម កឹម សុខា ធ្លាប់អះអាងថា ឯកឧត្តម កឹម សុខា ហាក់មិនភ្ញាក់ផ្អើលឬព្រួយបារម្ភអ្វីឡើយ ចំពោះបណ្តឹងរបស់ក្រសួងមហាផ្ទៃ ដែលសុំឲ្យរំលាយគណបក្សសង្គ្រោះជាតិ។
លោកមេធាវីរូបនេះ ធ្លាប់និយាយថា៖«យើង បានប្រាប់ឯកឧត្តម កឹម សុខា ដែរ ពីរឿងគេប្តឹងឲ្យរំលាយគណបក្ស។ តែគាត់ មើលទៅធម្មតា។ គាត់ អត់ប្រតិកម្មអ្វីទេ ហើយក៏មិនសួរនាំច្រើនដែរ។ គាត់ ដូចអត់តក់ស្លុតចំពោះរឿងហ្នឹងផង»។
ខណៈបណ្តឹងសុំឲ្យរំលាយគណបក្សសង្គ្រោះជាតិ កំពុងស្ថិតក្នុងចំណាត់ការរបស់តុលាការកំពូល ក្រុមតំណាងរាស្ត្រគណបក្សប្រជាជនកម្ពុជា ស្រាប់តែកែប្រែច្បាប់ចំនួន៤ ដែលរួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ។ មាត្រាថ្មីនៃច្បាប់ខាងលើ មានខ្លឹមសារជារួមថា បើគណបក្សណាមួយ ត្រូវបានរំលាយចោល រាល់អាសនៈឬភាពជាតំណាងរបស់គណបក្សនោះ ត្រូវបែងចែកទៅឲ្យគណបក្សដទៃ។
ការកែប្រែច្បាប់ខាងលើ បណ្តឹងសុំឲ្យរំលាយគណបក្សសង្គ្រោះជាតិ រួមទាំងការចាប់ឯកឧត្តម កឹម សុខា ត្រូវបានសហគមន៍អន្តរជាតិមួយចំនួន ចេញមកប្រតិកម្មជាបន្តបន្ទាប់នឹងរដ្ឋាភិបាលកម្ពុជា។ ប៉ុន្តែ ការប្រតិកម្មរបស់សហគមន៍អន្តរជាតិទាំងនោះ ហាក់មិនមានឥទ្ធិពលអ្វីលើរដ្ឋាភិបាលកម្ពុជាឡើយ។ ភាគីរដ្ឋាភិបាល ចាត់ទុកប្រតិកម្មរបស់សហគមន៍អន្តរជាតិ ថាជាការលូកដៃចូលដែនអធិបតេយ្យរបស់កម្ពុជា៕
Tag:
CNRP
បណ្តឹងសុំរំលាយ
© រក្សាសិទ្ធិដោយ thmeythmey.com