ជាតិ
នយោបាយជាតិ
សម្តេចក្រុមព្រះ ចង់ឲ្យតុលាការ ចាត់ការលើបក្សសង្គ្រោះជាតិ ឲ្យលឿនបំផុត
× ភ្នំពេញ៖ សម្តេចក្រុមព្រះ មិនឲ្យតុលាការកំពូល បង្អង់នីតិវិធីយូរនោះទេ ជុំវិញបណ្តឹងសុំឲ្យរំលាយគណបក្សសង្គ្រោះជាតិ។ ព្រះអង្គ ស្នើឲ្យតុលាការកំពូល ប្រញាប់ប្រញាល់សម្រេចលើវាសនារបស់គណបក្សសង្គ្រោះជាតិ។ អ្នកនាំពាក្យតុលាការកំពូល ប្រាប់ថា នីតិវិធីលើបណ្តឹងសុំឲ្យរំលាយគណបក្សសង្គ្រោះជាតិ នៅតែបន្តទៅមុខ។ ឯគណបក្សសង្គ្រោះជាតិ ជាអ្នករងបណ្តឹង មិនអើពើទាល់តែសោះ ចំពោះអ្វីដែលតុលាការកំពូល បង្គាប់បញ្ជា។
សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច ហាក់ពិបាកទ្រាំក្នុងព្រះទ័យ ដែលគណបក្សសង្គ្រោះជាតិ មិនទាន់ឈានទៅដល់ការរំលាយនាពេលនេះ។ បើតាមព្រះទ័យរបស់ព្រះអង្គ ដែលចង់បាននោះ តុលាការកំពូល ចាត់ការលើគណបក្សសង្គ្រោះជាតិ កាន់តែឆាប់ គឺកាន់តែប្រសើរ។
«ខ្ញុំចង់ឲ្យបានឆាប់រហ័ស ជាទីបំផុត។ តុលាការកំពូល គ្មានធ្វើការអីប៉ុន្មានទេ មានតែរឿងមួយហ្នឹង។ តាមហ្វ្រេសញូ បើសម្តេច [ហ៊ុន សែន?] គាត់បានមើល គឺសូមថា សម្តេចអើយ រហ័សតិចទៅ»។ សម្តេចក្រុមព្រះ មានបន្ទូលយ៉ាងដូច្នេះ ទៅកាន់សារព័ត៌មាន Fresh News ដែលបានសួរថា តើព្រះអង្គចង់ឲ្យតុលាការកំពូល កាត់ក្តីលើគណបក្សសង្គ្រោះជាតិឲ្យបានឆាប់ឬទេ?
ជុំវិញបញ្ហាខាងលើ អ្នកនាំពាក្យតុលាការកំពូល លោក នៅ មុនីជោត ប្រាប់សារព័ត៌មានថ្មីៗថា រហូតមកដល់ពេលនេះ តុលាការកំពូល មិនទាន់កំណត់កាលបរិច្ឆេទ ដើម្បីបើកសវនាការលើបណ្តឹងរបស់ក្រសួងមហាផ្ទៃ ដែលសុំឲ្យរំលាយគណបក្សសង្គ្រោះជាតិ នោះទេ។ ប៉ុន្តែ អ្នកនាំពាក្យរូបនេះ អះអាងថា តុលាការកំពូល នៅតែបន្តនីតិវី ដើម្បីឆ្ពោះទៅដល់ការជំនុំជម្រះនាពេលខាងមុខ។ លោក បន្តថា បើតុលាការកំពូល បើកសវនាការនាពេលខាងមុខ តែភាគីគណបក្សសង្គ្រោះជាតិ មិនចូលរួម ឬមិនពឹងពាក់មេធាវី ដើម្បីការពារសិទ្ធិ ក៏សវនាការនោះ អាចប្រព្រឹត្តទៅបានដែរ។
សារព័តមានថ្មីៗ មិនអាចទាក់ទងអ្នកនាំពាក្យគណបក្សសង្គ្រោះជាតិ ដើម្បីសុំការឆ្លើយតបនឹងបន្ទូលរបស់សម្តេចក្រុមព្រះបានទេ ដោយសារតែហៅទូរសព្ទមិនចូល។ ប៉ុន្តែកន្លងមក មន្ត្រីជាន់ខ្ពស់មួយចំនួននៃគណបក្សសង្គ្រោះជាតិ មានលោកស្រី មូរ សុខហួរ ជាដើម ធ្លាប់សើចចំអក និងប្រតិកម្មនឹងសម្តេចក្រុមព្រះ។ លោកស្រី មូរ សុខហួរ អនុប្រធានគណបក្សសង្គ្រោះជាតិ ធ្លាប់លើកឡើងថា សម្តេចក្រុមព្រះ បានចូលរួមកម្ចាត់អ្នកប្រជាធិបតេយ្យនៅកម្ពុជា។
ចំពោះបណ្តឹងនៅតុលាការកំពូល គណបក្សសង្គ្រោះជាតិ ប្រកាសថា មិនតតបអ្វីទាំងអស់។ គណបក្សសង្គ្រោះជាតិ បានសម្រេចរួចហើយ ថានឹងមិនពឹងពាក់មេធាវីឲ្យជួយការពារក្តី ហើយក៏មិនដាក់ឯកសារឬភស្តុតាងទៅកាន់តុលការកំពូល ដើម្បីតតាំងជាមួយក្រសួងមហាផ្ទៃដែរ។
គណបក្សហ្វ៊ុនស៊ិនប៉ិច បង្ហាញបំណងរួចហើយ ក្នុងការទទួលយកអាសនៈរបស់គណបក្សសង្គ្រោះជាតិ បើត្រូវបានតុលាការកំពូលរំលាយចោល។ សម្រាប់គណបក្សហ្វ៊ុនស៊ិនប៉ិច ការទទួលយកអាសនៈនេះ គឺសមស្របតាមច្បាប់។ លោក ញ៉េប ប៊ុនជិន អនុគណបក្សហ្វ៊ុនស៊ិនប៉ិច និងមានតំណែងជាអ្នកនាំពាក្យផងនោះ ធ្លាប់លើកឡើងជាសំណួរយ៉ាងដូច្នេះថា៖«បើច្បាប់បែងចែកមកថា ត្រូវតែបានអាសនៈ តើអ្នកណាមិនយក?»។
ក្រៅពីគណបក្សហ្វ៊ុនស៊ិនប៉ិច គណបក្សសញ្ជាតិខ្មែរ ក៏ប្រកាសថា មិនបដិសេដដែរ បើច្បាប់ បានបែងចែកអាសនៈរបស់គណបក្សសង្គ្រោះជាតិ ទៅឲ្យខ្លួន។ ប្រធានគណបក្សសញ្ជាតិខ្មែរ លោក សេង សុខខេង ធ្លាប់ប្រកាសកាលពីពេលកន្លងមកថា៖«[....] យើង នឹងទទួលយកអាសនៈ ដោយអត់ប្រកែកទេ ព្រោះយើងបានមកស្របតាមច្បាប់»។
យ៉ាងណាក៏ដោយ មានគណបក្សមួយចំនួន ប្រកាសមិនចង់បានអាសនៈរបស់គណបក្សសង្គ្រោះជាតិ។ គណបក្សទាំងនោះ រួមមានគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា និង គណបក្សខ្មែរឈប់ក្ររបស់លោករបស់លោក ក្រវ៉ាញ ដារ៉ន ជាដើម។
លោក អេង ឆៃអ៊ាង អនុប្រធានគណបក្សសង្គ្រោះជាតិ បានហៅការយកអាសនៈរបស់គណបក្សមួយ ដែលជាប់ឆ្នោត ទៅឲ្យគណបក្សដទៃ ដែលមិនជាប់ឆ្នោត ថាជាការប្លន់ឆន្ទៈរបស់ប្រជាពលរដ្ឋ។ លោក ថែមទាំងលើកឡើងទៀតថា ការទទួលយកអាសនៈរបស់គណបក្ស ដែលជាប់ឆ្នោត គឺជាការទទួលផលចោរកម្ម។
បច្ចុប្បន្ន បណ្តឹងសុំឲ្យរំលាយគណបក្សសង្គ្រោះជាតិ ដែលប្តឹងដោយក្រសួងមហាផ្ទៃ កំពុងស្ថិតក្នុងដៃតុលាការកំពូល។ ហើយគណបក្សហ្វ៊ុនស៊ិនប៉ិចរបស់សម្តេចក្រុមព្រះ និងគណបក្សយុវជនកម្ពុជារបស់លោក ពេជ្រ ស្រស់ ជាអ្នកស្នើឲ្យក្រសួងមហាផ្ទៃ ដាក់បណ្តឹងទៅកាន់តុលាការកំពូល។ គណបក្សទាំងពីរ បានភ្ជាប់ករណីរបស់ឯកឧត្តម កឹម សុខា ដែលកំពុងស្ថិតក្រោមការសង្ស័យថាជាប់ពាក់ពន្ធនឹងអំពើក្បត់ជាតិ ទៅនឹងគណបក្សសង្គ្រោះជាតិ។ សម្រាប់គណបក្សទាំងពីរនេះ ទង្វើរបស់ឯកឧត្តម កឹម សុខា រួមទាំងគណបក្សសង្គ្រោះជាតិ មិនអាចលើកលែងឲ្យបានឡើយ។
ស្របពេលបណ្តឹងសុំឲ្យរំលាយគណបក្សសង្គ្រោះជាតិ ចូលដល់តុលាការកំពូល ស្រាប់តែក្រុមតំណាងរាស្ត្រគណបក្សប្រជាជនម្ពុជា កែប្រែច្បាប់ចំនួន៤ ដែលរួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ។ មាត្រាថ្មីនៃច្បាប់ទាំង៤ មានខ្លឹមសារជារួមថា បើគណបក្សណាមួយ ដែលជាប់ឆ្នោត ត្រូវបានរំលាយ រាល់អាសនៈនិងភាពជាតំណាងនៃគណបក្សនោះ នឹងត្រូវបែងចែកទៅឲ្យគណបក្សដទៃ។
ដូច្នេះ បើគណបក្សសង្គ្រោះជាតិ ត្រូវបានរំលាយ ហើយច្បាប់ទាំង៤ ចូលជាធរមានមែននោះ រាល់អាសនៈក្នុងរដ្ឋសភា និងអាសនៈក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ ប្រាកដជាធ្លាក់ទៅលើគណបក្សដទៃ។
ទិដ្ឋភាពខាងលើ ដែលរួមមាន ការចាប់ឯកឧត្តម កឹម សុខា ការកែប្រែច្បាប់ទាំង៤ និងការដាក់បណ្តឹងសុំឲ្យរំលាយគណបក្សសង្គ្រោះជាតិ កំពុងរងការប្រតិកម្មពីសហគមន៍អន្តរជាតិជាបន្តបន្ទាប់។ ប៉ុន្តែ ភាគីរដ្ឋាភិបាល នៅតែប្រកាន់ជំហរថា អ្វីដែលស្ថាប័នជាតិ កំពុងធ្វើ ហើយនឹងសម្រេចយ៉ាងណានោះ គឺជាដែនអធិបតេយ្យរបស់ប្រទេសកម្ពុជា ដោយគ្មានបរទេសណាមួយ អាចលូកដៃចូលបានឡើយ៕
© រក្សាសិទ្ធិដោយ thmeythmey.com