ជាតិ
លោក លឺ ឡាយស្រេង សុំទោស ស្របពេលហ្វ៊ុនស៊ិនប៉ិច ប្រកាសប្តឹងពីបទប្រមាថព្រះមហាក្សត្រ
× ភ្នំពេញ៖ គណបក្សហ្វ៊ុនស៊ិនប៉ិច នឹងដាក់បណ្តឹងទៅកាន់តុលាការ ដើម្បីប្តឹងលោក លឺ ឡាយស្រេង ដែលជាអតីតមន្ត្រីជាន់ខ្ពស់របស់ខ្លួន ពីបទប្រមាថព្រះមហាក្សត្រកម្ពុជា និងសម្តេចក្រុមព្រះ នរោត្តម រណឫទ្ធិ។ ពេលនេះ អ្នកនាំពាក្យគណបក្សហ្វ៊ុនស៊ិនប៉ិច បានទៅជួបមេធាវីហើយ ដើម្បីរៀបចំបណ្តឹងដាក់ទៅកាន់តុលាការ។ លោក ឡឺ លាយស្រេង បានចេញមកសារភាពកំហុសជាសាធារណៈ ហើយសុំព្រះរាជទានលើកលែងទោសពីព្រះមហាក្សត្រ។
គណបក្សហ្វ៊ុនស៊ិនប៉ិច ដែលដឹកនាំដោយសម្តេចក្រុមព្រះ នរោត្តម រណឫទ្ធិ ប្រកាសថា នឹងដាក់បណ្តឹងទៅកាន់តុលាការ ដើម្បីប្តឹងព្រឹទ្ធាចារ្យ លឺ ឡាយស្រេង ជុំវិញការប្រើប្រាស់សម្តីប្រមាថដល់ព្រះមហាក្សត្រ។ លោក ញ៉េប ប៊ុនជិន អនុប្រធាន និងជាអ្នកនាំពាក្យគណបក្សហ្វ៊ុនស៊ិនប៉ិច បានប្រាប់សារព័ត៌មានថ្មីៗតាមទូរសព្ទយ៉ាងដូចេះ្ន នៅរសៀលថ្ងៃទី២១ ខែតុលា ឆ្នាំ២0១៧នេះ។
អនុប្រធានគណបក្សហ្វ៊ុនស៊ិនប៉ិច និយាយបែបនេះថា៖«រឿងដំបូង ដែលត្រូវប្តឹង គឺការប្រមាថព្រះមហាក្សត្រហ្នឹងហើយ។ តែមិនមែន មានតែរឿងមួយហ្នឹងទេ គឺមានច្រើនទៀត ដូចជាការប្រមាថសម្តេចក្រុមព្រះ ជាដើម។ ដាក់បណ្តឹងទៅតុលាការពេលណា យើងមិនទាន់ដឹងទេ តែឥឡូវ ជួបមេធាវីហើយ»។
សារព័ត៌មានថ្មីៗ មិនអាចសុំការឆ្លើយតបផ្ទាល់ពីព្រឹទ្ធាចារ្យ លឺ ឡាយស្រេង បានទេ ដោយសារតែលោក អះអាងថា លោក បានបង្ហោះការបកស្រាយលើទំព័រហ្វេសប៊ុករួចហើយ។ ក្រោយគណបក្សហ្វ៊ុនស៊ិនប៉ិច ប្រកាសថា ដាក់បណ្តឹងទៅកាន់តុលាការ លោក លឺឡាយស្រេង ក៏បង្ហោះវីដេអូឃ្លីបមួយ ដើម្បីសុំព្រះរាជទានលើកលែងទោសពីព្រះមហាក្សត្រ។
លោក លឺ ឡាយស្រេង ដែលមានវ័យ៧៩ឆ្នាំ បាននិយាយសុំទោសយ៉ាងដូច្នេះថា៖«ខ្ញុំទទួលស្គាល់ថាខ្ញុំមានប្រើពាក្យលើសលួសខ្លះៗ។ ដូច្នេះសូមអភ័យទោសដល់បងប្អូនទាំងអស់ ជាពិសេសសម្តេចនាយករដ្ឋមន្ត្រី និងព្រះមហាក្សត្រ។ ខ្ញុំដូចជាព្រួយបារម្ភខ្លាំងពេក ចេះតែនិយាយផ្តេសផ្តាសទៅក៏មាន។ ប៉ុន្តែ ខ្ញុំ មិនដែលមានចិត្តប្រមាថកាតទានទេ សូម្បីនាយករដ្ឋមន្ត្រី»។
ការប្រកាសប្តឹងខាងលើ គឺធ្វើឡើងភ្លាមៗ បន្ទាប់ពីទំព័រហ្វេសប៊ុកឈ្មោះ «សីហា» បង្ហោះខ្សែអាត់សំលេងមួយ នៅថ្ងៃទី២១ ខែតុលា ឆ្នាំ២១៧ ដោយអះអាងថា ជាសំឡេងរបស់អតីតតំណាងរាស្ត្រពីររូបនៃគណបក្សហ្វ៊ុនស៊ិនប៉ិច គឺលោកព្រឹទ្ធាចារ្យ លឺ ឡាយស្រេង និងលោកស្រី គី លំអង។ បើតាមខ្សែអាត់សំឡេង លោក លឺ ឡាយស្រេង បានប្រើពាក្យបែបប្រមាថមួយចំនួន ចំពោះព្រះមហាក្សត្រ។
«បើមិនហ៊ានទេ ឲ្យដាក់រាជ្យទៅ ឲ្យគេទៅធ្វើម្តង»។ នេះជាសម្តីរបស់លោក លឺ ឡាយស្រេង ក្នុងខ្សែអាត់ ដែលនិយាយសំដៅទៅកាន់ព្រះមហាក្សត្រ ពេលសន្ទនាជាមួយលោកស្រី គី លំអង។ គាត់ ធ្លោយមាត់និយាយដូច្នេះ នៅពេលដែលលោកស្រី គី លំអង លើកឡើងពីកម្តៅនយោបាយ នាពេលបច្ចុប្បន្ន ។
ក្នុងខ្សែអាត់នោះ លោក លឺ ឡាយស្រេង ថែមទាំងវាយប្រហារធ្ងន់ៗទៅលើអ្នកនយោបាយចាស់វស្សាម្នាក់ ដោយមិនបញ្ចេញឈ្មោះ តែទំនងជាសំដៅលើសម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច ដែលជាព្រះរាមរបស់ព្រះមហាក្សត្រ ថាចង់បានអាសនៈរបស់គណបក្សសង្គ្រោះជាតិ ហើយនឹងទទួលប្រាក់ពីសម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា ដោយមិនអៀនខ្មាស់។ លោក បន្តថា ទង្វើបែបនេះ គឺជាការបន្តុះបង្អាប់ដល់សែរាជវង្ស៕
© រក្សាសិទ្ធិដោយ thmeythmey.com