លោក Ronald Koeman ថានៅតែអាចផ្លាស់ប្ដូរស្ថានការណ៍យ៉ាប់យឺនរបស់ក្រុមទាំងមូលបានខណៈ Everton ធ្លាក់ទៅតំបន់ត្រូវកាត់ចោលពីក្របខណ្ឌ Premier League បន្ទាប់ពីបរាជ័យក្នុងផ្ទះខ្លួនឯង ៥-២ ក្រោមថ្វីជើងក្រុម Arsenal។
ក្រោយប្រកួតចាញ់ក្រុមកាំភ្លើងធំ Arsenal ៥-២ នៅទឹកដី Goodison Park នៅយប់ថ្ងៃទី២២ ខែតុលា Everton នៅតែបន្តរងភាពអាម៉ាសចំពោះក្រុមអ្នកគ្រាំទ្រខ្លួន ដោយមិនអាចរកជ័យជម្នះបានសម្រាប់ការប្រកួត៥លើកចុងក្រោយ និងធ្លាក់ទៅតំបន់គ្រោះថ្នាក់នៃលីកកំពូលអង់គ្លេស។ បរាជ័យផ្ទួនៗនេះក៏ធ្វើឲ្យប៉ះពាល់ដល់កៅអីរបស់លោក Koeman ដែរ។
ក្នុងក្របខណ្ឌ Premier League ៩ប្រកួតចុងក្រោយ Everton រកបានតែ៨ពិន្ទុប៉ុណ្ណោះ ដោយឈ្នះ២ ស្មើ២ និងចាញ់៥ដង ស្ថិតនៅចំណាត់ថ្នាក់ទី១៨ ដែលជាតំបន់ត្រូវកាត់ចោល។
មួយវិញទៀត Everton ក៏ធ្វើមិនបានល្អដែរក្នុងការប្រកួតក្នុងក្របខណ្ឌ UEFA Europa League ដោយមិនដែលស្គាល់ឈ្នះម្តងឡើយនិងស្ថិតនៅបាតតារាងមាន១ពិន្ទុនៃការប្រកួតវគ្គសន្សំពិន្ទុពូល E៕