ជាតិ
ជនបរទេសបាត់បង់ជីវិតនៅកម្ពុជាជាង៣០នាក់ ក្នុងត្រីមាសទី៣
× ភ្នំពេញ៖ ក្នុងរយៈពេល៣ខែ ក្នុងត្រីមាសទី៣ នេះ ជនបរទេសដែលបានមករស់នៅក្នុងប្រទេសកម្ពុជា ជាង៣០នាក់ បានបាត់បង់ជីវិតដោយសារជំងឺ និងបញ្ហាផ្សេងៗ។ នេះបើតាមរបាយការណ៍លទ្ធផលព័ត៌មានទាន់ហេតុការណ៍ (HOTLINE) ដោយគិតចាប់ពីខែកក្កដា ដល់ខែកញ្ញា ។
របាយការណ៍ HOTLINE បានបង្ហាញថា សភាពការណ៍ជនបរទេសរងគ្រោះ នៅកម្ពុជា មានចំនួន១៧២ករណី ដោយក្នុងនោះស្លាប់៣៩ករណី។ បើតាមរបាយការណ៍ដដែល ជនបរទេសស្លាប់ទាំងនោះ ដោយសារការធ្វើអត្តឃាតខ្លួនឯង ចំនួន២នាក់ គឺជនស្វីស និងជនជាតិវៀតណាម។ ចំណែកជនបរទេសស្លាប់ដោយសារជំងឺ ២៩នាក់ រួមមានជនជាតិ បារាំង៥នាក់ អូស្ត្រាលី៤នាក់ វៀតណាម៣នាក់ អាមេរិក២នាក់ អ៊ីតាលី២នាក់ ស្វីស២នាក់ និងជនជាតិសិង្ហបុរី ថៃ ជប៉ុន កូរ៉េខាងត្បូង ម៉ាឡេស៊ី ចិន ហ្វីលីពីន អៀរឡង់ អាហ្វ្រិកខាងត្បូង និងនីហ្សេរីយ៉ា ស្លាប់១នាក់។
ក្រៅពីបញ្ហាខាងលើនេះ ក៏មានជនបរទេសរងគ្រោះដោយសារករណីចោរកម្មនេះ ចំនួន១២៩ករណី ដោយក្នុងនោះករណីអំពើលួច-ឆក់ទ្រព្យសម្បត្តិ មានចំនួន១១០ករណី រួមមានជនជាតិសិង្ហបុរី២នាក់ ,ចិនហុងកុង២នាក់ ,ចិនតៃវ៉ាន់២នាក់ ,ម៉ាឡេស៊ី៣នាក់ ,កូរ៉េខាងត្បូង៩នាក់ ,បារាំង១០នាក់ ,ចិន៣៨នាក់ ,អូស្ត្រាលី៧នាក់ ,អាល្លឺម៉ង់៣នាក់ ,ហូឡង់៣នាក់ ,ន័រវេស២នាក់ ,អេស្ប៉ាញ១នាក់ ,ថៃ២នាក់ ,កាណាដា៥នាក់ ,កេនយ៉ា១នាក់ ,វៀតណាម១នាក់ ,អាមេរិក៥នាក់ ,អង់គ្លេស៧នាក់ ,ជប៉ុន៥នាក់ និងញូហ្សឺឡែន២នាក់។ ចំណែកជនបរទេសរងគ្រោះដោយអំពើឆបោក មានចំនួន៦ករណី និងរងគ្រោះដោយហិង្សា និងការបំផ្លាញទ្រព្យសម្បត្តិ១៣ករណី។ នេះបើតាមរបាយការណ៍ប្រើប្រាស់ប្រព័ន្ធ Hotline ត្រីមាសទី៣ របស់អគ្គស្នងការនគរបាលជាតិ ។
ទាក់ទងនឹងបញ្ហាចោរកម្មនេះ អគ្គស្នងការរងនគរបាលជាតិរូបនេះ លោក ថោង លីម បានសន្យាពង្រឹងការទប់ស្កាត់ និងការបង្ក្រាបលើបញ្ហាចោរកម្មនេះ ដើម្បីផ្ដល់សេចក្តីទុកចិត្តដល់អ្នកវិយោគ និងភ្ញៀវទេសចរជាតិ-អន្តរជាតិផងដែរ៕
© រក្សាសិទ្ធិដោយ thmeythmey.com