ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
លោក ចំរើន ភ័ក្រ៖«របរប៉ះកង់ឡានចល័តហត់ និងលំបាក តែមានសេរីភាព»
23, Oct 2017 ,
6:59 pm
រូបភាព
×
ដោយ:
លោក ចំរើន ភ័ក្រ ជាជាងប៉ះកងឡានចល័ត នៅតាមផ្លូវជាតិលេខ២។ លោក ប្រកបរបរនេះជាង៨ឆ្នាំមកហើយ ក្រោយពីឈប់ធ្វើជាសន្តិសុខឲ្យក្រុមហ៊ុនឯកជន។ សម្រាប់ លោក ភ័ក្រ ទោះបីជារបរនេះ ហត់ និងលំបាកបន្ដិច ប៉ុន្តែរបរនេះ បានផ្តល់សេរីភាពឲ្យរូប មិនដូចធ្វើការឲ្យគេ។
លោកអ្នកដែលធ្លាប់ធ្វើដំណើរឆ្លងកាត់តាមបណ្តោយផ្លូវជាតិលេខ២ ត្រង់ចំណុចសង្កាត់ព្រែកកំពិស ខណ្ឌដង្កោ ប្រហែលជាធ្លាប់បានឃើញឡានទ្រុងកញ្ចាស់មួយ ដែលមានដាក់ធុងខ្យល់ប៉ះកង់ឡាន។ ឡាននេះជម្រកនៃអាជីវកម្មប៉ះកង់ឡានចល័ត របស់ លោក ចំរើន ភ័ក្រ អាយុ៣៥ឆ្នាំ ដែលបានប្រកបរបរនេះ ជាង៨ឆ្នាំមកហើយ ក្រោយពីឈប់ធ្វើជាសន្តិសុខឲ្យក្រុមហ៊ុនឯកជន។
ពាក់អាវឆ្នូតខ្មៅ ខោពណ៌សដែលប្រឡាក់ និងរហែកដោយកន្លែងផងនោះ លោក ចំរើន ភ័ក្រ បញ្ជាក់ប្រាប់សារព័ត៌មានថ្មីៗថា លោកប្តូរមករករបរប៉ះកង់ឡាននេះ ដោយសារតែចង់រកស៊ីដោយខ្លួនឯង។ បើទោះជាទទួលស្គាល់ថា របរប៉ះកង់ឡាននេះហត់នឿយ ប៉ុន្តែលោក ភ័ក្រ ដែលទើបតែប៉ះកង់ឡានឲ្យអតិថិជនក្រោមកម្តៅថ្ងៃរួច ថ្លែងទាំងញើសជោគខ្នងថា វាជារបរដែលមានសេរីភាព ជាងធ្វើការឲ្យគេ។ លោក ចំរើន ភ័ក្រ បញ្ជាក់បន្តដូច្នេះ៖«ការងារនេះ មិនស្រួលឡើយ។ អ្នកដែលចង់រកស៊ីប៉ះកង់ឡានប្រភេទធំៗ ត្រូវតែមានស្មារតីរឹងមាំ ចិត្តធ្ងន់ ទើបអាចទ្រាំទ្រនឹងការងារនេះបាន»។
លើសពីការហត់នឿយ របរនេះ ក៏អាចបង្កគ្រោះថ្នាក់ដល់ជីវិតដែរ ដោយសារតែផ្ទុះកង់ឡាន។ បើតាម ជាងប៉ះកង់ឡានរូបនេះ កង់ឡានដែលអាចផ្ទុះ មានច្រើនសណ្ឋានដូចជាកង់ឡានមានរាងប៉ោង កង់ឡានដែលប្រើប្រាស់ហួសកាលកំណត់ រង្វង់កង់ឡានវៀច ឬកោង ការបញ្ចូលខ្យល់លើសជាដើម។
ក្រៅពីនេះ ជាជាងប៉ះកង់ឡានចល័ត ក៏ត្រូវការភាពរួសរាយរាក់ទាក់ ដើម្បីយកចិត្តអតិថិជន ដែលភាគច្រើនជាម្ចាស់ឡានដឹកដី ឡានដឹកទំនិញធុនធំដែរ។ នេះជាការបន្ថែមរបស់លោក ចំរើន ភ័ក្រ ដែលបន្តឲ្យដឹងទៀតថា ក្នុងមួយថ្ងៃ លោកអាចទទួលបានអតិថិជន ពី៣ទៅ៥នាក់ គិតជាចំណូលចន្លោះ១០ម៉ឺន ទៅ២០ម៉ឺនរៀល។
ក្រៅពីបណ្តោយផ្លូវជាតិលេខ២នេះ លោក ភ័ក្រ ក៏ចល័តមកជាយៗភ្នំពេញ ឬចូលក្នុងក្រុងខ្លះដូចជា ក្បាលថ្នល់ ចាក់អង្រែលើ ចាក់អង្រែក្រោម តាមទីតាំងដែលអតិថិជនមានបញ្ហាបែកកង់ឡាន ប៉ុន្តែមិនចូលដល់កណ្តាលក្រុងទេ ដោយសារតែចរាចរណ៍។ ក្រៅពីនោះ ក៏ធ្លាប់មានអតិថិជន ហៅទៅដល់ស្រុកស្អាង ខេត្តកណ្តាល ឃុំអ្នកលឿង ផ្លូវជាតិលេខ១ និងទៅខេត្តតាកែវផងដែរ។ ចំពោះតម្លៃប៉ះកង់ឡានវិញ គិតតាមឆ្ងាយ និងជិត។ លោក ចំរើន ភ័ក្រ គិតតម្លៃចន្លោះ៤ម៉ឺនរៀល ទៅ ៦ម៉ឺនរៀល ចំពោះការប៉ះកង់មួយគ្រាប់ និងតម្លៃ១០ម៉ឺនរៀល ចំពោះចម្ងាយឆ្ងាយ និងគិតលើរយៈពេលទៅមកដែរ។ ចំណែកនៅពេលយប់ បុរសសម្បុរស្រគាំរូបនេះ ផ្តល់សេវាប៉ះកង់ឡានដល់កន្លែងជូន ប៉ុន្តែអតិថិជនត្រូវ បន្ថែមតម្លៃ ១ម៉ឺនរៀល ពីលើតម្លៃធម្មតា៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ចំរើន ភ័ក្រ
ប៉ះកង់ឡាន
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
7 ថ្ងៃ
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម