អន្តរជាតិ
អតីតប្រធានាធិបតី កាទ័រ ថាលោកស្ម័គ្រចិត្តទៅចរចាជាមួយរបបដឹកនាំ គីម ជុងអ៊ុន
× អតីតប្រធានាធិបតីអាមេរិកលោក ជីមី កាទ័រ (Jimmy Carter) បានប្រកាសជាផ្លូវការថា លោកនឹងទៅកូរ៉េខាងជើងដើម្បីចរចាដោះស្រាយបញ្ហានុយក្លេអ៊ែរនិងបញ្ចៀសសង្គ្រាម បើសិនជាប្រធានាធិបតី ដូណាល់ ត្រាំ ត្រូវការ។
ក្នុងពេលផ្តល់បទសម្ភាសន៍ដល់សារព័ត៌មាន The Times អតីតប្រធានាធិបតីអាមេរិកវ័យ ៩៣ ឆ្នាំ ជីមី កាទ័របានបញ្ជាក់ថា លោកត្រៀមខ្លួនបំពេញបេសកម្មការទូតទៅកាន់កូរ៉េខាងជើងដើម្បីចរចា និងបញ្ចៀសសង្គ្រាមតំណាងឲ្យរដ្ឋបាល ដូណាល់ ត្រាំ។
ពេលអ្នកសារព័ត៌មានសាកសួរពាក់ព័ន្ធការធ្វើដំណើរបេសកម្មការទូតទៅកូរ៉េខាងជើង លោក ជីមី កាទ័រ បានលើកឡើងដូច្នេះ៖«ពិតហើយខ្ញុំនឹងទៅ។ ខ្ញុំបានប្រាប់ប្រធានាធិបតី ត្រាំ ហើយថា ខ្ញុំទំនេរអាចធ្វើដំណើរទៅចរចាបានបើសិនជាគេត្រូវការខ្ញុំនោះ»។
អតីតប្រធានាធិបតីដែលគិតគូរពីសន្តិភាពជាធំនេះ បានបញ្ជាក់ផងដែរថា លោកព្រួយបារម្ភពីស្ថានការណ៍ទូទៅនៅឧបទ្វីបកូរ៉េ ជាពិសេសការបន្តសង្គ្រាមពាក្យសម្តីរវាងលោក ត្រាំ និងលោក គីម ជុងអ៊ុន។
លោក កាទ័រ ក៏បានពន្យល់បន្ថែមទៀតថា បច្ចុប្បន្នអាមេរិកវាយតម្លៃហួសសមត្ថភាពនិងឥទ្ធិពលរបស់ចិនលើកូរ៉េខាងជើង ដែលវាជារឿងមួយគ្រោះថ្នាក់។ «កូរ៉េខាងជើងគេចង់រក្សាសុវត្ថិភាពរបបដឹកនាំរបស់គេ។ ហើយយើងដូចជាវាយតម្លៃហួសហេតុពេកថា ចិនមានឥទ្ធិពលលើកូរ៉េខាងជើង។ សូម្បីតែ គីមជុងអ៊ុន មិនដែលធ្លាប់ទៅចិនសូម្បីតែម្តងផង។ គេគ្មានសម្ព័ន្ធភាពជាមួយគ្នាទេ។ គីម ជុងអីលធ្លាប់ទៅចិន ហើយក៏មានទំនាក់ទំនងស្និទ្ធស្នាលគ្នាដែរ»។ លោក កាទ័របានសង្កត់ធ្ងន់បែបនេះ។
សូមរំលឹកបន្តិចថា ក្នុងនាមជាប្រធានាធិបតីអាមេរិកដែលផ្តោតលើវិធានការទូតនិងការចរចាជាធំ លោក កាទ័រ បានរួមចំណែកច្រើនក្នុងការជំរុញឲ្យកូរ៉េខាងជើងធ្វើសម្បទានដើម្បីដោះស្រាយបញ្ហារួមគ្នាកន្លងមក។ ក្នុងអាណត្តិលោក ប៊ីល គ្លីនតុន ឆ្នាំ ១៩៩៤ លោក កាទ័របានជំរុញឲ្យលោក គីម អ៊ីលស៊ុងជីតាលោក គីម ជុងអុន ព្យួរកម្មវិធីនុយក្លេអ៊ែររបស់ខ្លួន ហើយឆ្នាំ ២០១០ លោកក៏បានជួយបញ្ចុះបញ្ចូលឲ្យកូរ៉េខាងជើងដោះលែងជនជាតិអាមេរិកម្នាក់ឈ្មោះ Aijalon Gomes ដែលត្រូវកូរ៉េខាងជើងកាត់ទោសឲ្យជាប់ពន្ធនាគារប្រាំបីឆ្នាំព្រោះលួចចូលកូរ៉េខាងជើងខុសច្បាប់នោះ។
យ៉ាងណាមិញ វាមិនអាចទៅរួចដែលរដ្ឋាភិបាលអាមេរិកអនុញ្ញាតឲ្យលោក កាទ័រធ្វើដំណើរទៅកូរ៉េខាងជើង។ កន្លងមក សេតវិមានធ្លាប់ស្នើសុំលោក កាទ័រ ឲ្យឈប់និយាយពីវិបត្តិកូរ៉េទៀតព្រោះវាអាចបង្កផលប៉ះពាល់ដល់រដ្ឋបាលលោក ត្រាំ។ នេះក៏ដោយសារ លោក កាទ័រនិយាយពីផ្លូវការទូតនិងការផ្សះផ្សាជាមួយក្រុងព្យុងយ៉ាង ខណៈដែលលោក ត្រាំ និយាយតែពីការប្រើកម្លាំងបាយ និងវិធានការក្តៅជាពិសេសមិនស្វាគមន៍ការអង្គុយជជែកគ្នាឡើយ៕
Tag:
ជីមី កាទ័រ
គីម ជុងអ៊ុន
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com