Cristiano Ronaldo ប្រជែងឈ្នះ Lionel Messi និង Neymar ដើម្បីក្លាយជាកីឡាករឆ្នើមបំផុតប្រចាំឆ្នាំ Best Fifa Football Awards 2017 ខណៈ Zinedine Zidane ឈ្នះតំណែងគ្រូបង្វឹកបុរសល្អប្រចាំឆ្នាំ (The Best FIFA Men’s Coach) ពីសហព័ន្ធកីឡាបាល់ទាត់ពិភពលោក។
ខ្សែប្រយុទ្ធឆ្នើមរបស់ Real Madrid បានក្លាយជាកីឡាករបាល់ទាត់ល្អបំផុតផ្នែកបុរសរបស់ពិភពលោក នៅក្នុងពិធីប្រគល់ពានរបស់សហព័ន្ធកីឡាបាល់ទាត់ពិភពលោក FIFA នៅទីក្រុងឡុងដ៍ ក្រោយទទួលសំឡេងគាំទ្រ ៤៣ភាគរយ តាមពីក្រោយដោយគូប្រជែងពីររូបគឺ Messi របស់ Barcelona បាន១៩ភាគរយ និង Neymar របស់ Paris St-Germain បាន៦ភាគរយ។
កីឡាករសញ្ជាតិព័រទុយហ្គាល់ វ័យ៣២ឆ្នាំរូបនេះ បានជួយក្រុមរហស្សនាមអធិរាជសឈ្នះពាន UEFA Champion League និងជើងឯក La Liga កាលពីរដូវកាលមុន រួមទាំងជួមក្រុមបាល់ទាត់ជម្រើសជាតិ ព័រទុយហ្គាល់ ឡើងទីវគ្គផ្តាច់ព្រ័ត្រ World Cup នៅរុស្ស៊ីឆ្នាំក្រោយផងដែរ។
រីឯតំណែងគ្រូបង្វឹកបុរសល្អប្រចាំឆ្នាំ (The Best FIFA Men’s Coach) បានទៅ Zinedine Zidane អ្នកចាត់ការទូទៅរបស់ Real Madrid ក្រោយដឹកនាំក្រុមឈ្នះពានលំដាប់កំពូលចំនួន២ក្នុងមួយរដូវកាល។
ចំណែក Olivier Giroud ខ្សែប្រយុទ្ធរបស់កាំភ្លើងធំ Arsenal ឈ្នះពាន FIFA Puskas Award 2017 (គ្រាប់បាល់ទាត់បញ្ចូលទីល្អដាច់គេក្នុងលោកប្រចាំឆ្នាំ២០១៧)។ ខ្សែប្រយុទ្ធសញ្ជាតិបារាំងរូបនេះទទួលបានការគាំទ្រ ៣៦ភាគរយនៅជុំវិញពិភពលោក ក្រោយស៊ុតបាល់បញ្ចូលទីក្រុម Crystal Palace ដោយក្បាច់ខ្យាដំរីកាលពីខែមករាកន្លងទៅ។
Gianluigi Buffon អ្នកចាំទីដៃស្អិតរបស់ Juventu ទទួលបានសំឡេងគាំទ្រ៤២ភាគរយដើម្បីឈ្នះតំណែងអ្នកចាំទីល្អបំផុតលើពិភពលោក The Best FIFA Goalkeeper 2017 នាំមុន Manuel Neuer របស់ Bayern Munich ដែលទទួលសំឡេងឆ្នោត ៣២ភាគរយ និង keylor Navas របស់ Real Madrid បាន ១០ភាគរយ។
ដោយឡែក ផ្នែកនារីវិញ កីឡាការិនី Leike Martens វ័យ២៤ឆ្នាំ របស់ Barcelona និងក្រុមជម្រើសជាតិហូឡង់ បានឈ្នះពានកីឡាការិនីឆ្នើម The Best FIFA Women’s Player ដោយទទួលបាលសំឡេងគាំទ្រ ២១ភាគរយ នាំមុនកីឡាការិនីពីររូបផ្សេងទៀត។ សម្រាប់ Sarina Wiegman អ្នកចាត់ការក្រុមបាល់ទាត់នារីហូឡង់ ជាប់ជាគ្រូបង្វឹកនារីឆ្នើមបំផុត The Best FIFA Women’s Coach ផងដែរ៕