ពីនេះ ពីនោះ
ព័ត៍មានសុខភាព
ការញ៉ាំភេសជ្ជៈមានជាតិផ្អែមច្រើនជាប់ទាក់ទងនឹងការកើនឡើងខ្លាញ់រុំសរីរាង្គ
× យោងទៅតាមសេចក្តីរាយការណ៍មួយរបស់ Daily Mail បានឲ្យដឹងថា អ្នកដែលញ៉ាំភេសជ្ជៈមានជាតិស្ករច្រើនទំនងជាអាចកើតជាខ្លាញ់គ្រោះថ្នាក់រហូតដល់ខ្លាញ់នោះរុំសរីរាង្គក្នុងខ្លួនទៀតផង។ រឿងនេះគឺបានមកពីការសិក្សាមួយដែលបានរកឃើញនូវទំនាក់ទំនងមួយរវាងការញ៉ាំភេសជ្ជៈមានជាតិផ្អែម និងការកើនឡើងខ្លាញ់នៅជុំវិញសរីរាង្គ។
ការដែលមានខ្លាញ់រុំសរីរាង្គច្រើន ត្រូវបានគេរកឃើញថាមានជាប់ទាក់ទងនឹងការកើនឡើងការប្រឈមនឹងជំងឺទឹកនោមផ្អែមប្រភេទទី២ និងជំងឺបេះដូង។
ការសិក្សានេះបានតាមដានទៅលើមនុស្សវ័យកណ្តាលប្រមាណជាង ១០០០០នាក់រយៈពេល ៦ឆ្នាំ ក្រោយពីធ្វើការវាយតម្លៃលើភាពញឹកញាប់ដែលពួកគេញ៉ាំភេសជ្ជៈមានជាតិផ្អែម និងភេសជ្ជៈមានជាតិហ្គាស។ អ្នកស្រាវជ្រាវបានប្រើប្រាស់ CT ស្គេនដើម្បីវាស់ទៅលើចំនួនខ្លាញ់ក្នុងពោះដែលពួកគេម្នាក់ៗមាន។
អ្នកដែលញ៉ាំភេសជ្ជៈមានជាតិផ្អែមម្តងក្នុងមួយថ្ងៃឬច្រើនជាងនេះ គឺកើនឡើងជាតិខ្លាញ់រហូតដល់ ៨៥២សង់ទីម៉ែត្រគូប ចំណែកឯអ្នកមិនញ៉ាំសោះកើនឡើតែ ៥៥៨សង់ទីម៉ែត្រគូបប៉ុណ្ណោះ។
ប៉ុន្តែការកកកុញជាតិខ្លាញ់ក្នុងពោះគឺមានទាំងអស់ចំពោះអ្នកចូលរួមសិក្សានេះ។ រឿងនេះអាចដោយសារតែមនុស្សភាគច្រើននឹងកើនឡើងខ្លាញ់ក្នុងពោះនៅពេលអាយុកាន់តែច្រើន។
យោងទៅតាមក្បួនណែនាំរបស់ UK បានឲ្យដឹងថា អ្នកគួរតែកាត់បន្ថយការញ៉ាំជាតិស្ករ ឬផ្អែមកុំឲ្យច្រើនជាង ៣០ក្រាមក្នុងមួយថ្ងៃ ព្រោះភេសជ្ជៈមានជាតិផ្អែមគ្មានប្រយោជន៍អ្វីចំពោះសុខភាពឡើយ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com