ជាតិ
សង្គមជាតិ
សកលវិទ្យាល័យជប៉ុនចំនួន ៦ រៀបចំពិព័រណ៌ការសិក្សានៅប្រទេសជប៉ុន ឆ្នាំ២០១៧ នៅ CJCC
×
ភ្នំពេញ៖ មជ្ឍមណ្ឌលសហប្រតិបត្តិការកម្ពុជា-ជប៉ុន(CJCC) ក្រោមការគាំទ្រពីក្រសួងអប់រំ យុវជន និងកីឡា ស្ថានទូតជប៉ុនប្រចាំកម្ពុជា ទីភ្នាក់ងារសហប្រតិបត្តិការអន្តជាតិជប៉ុន(JICA) បានរៀបចំពិព័រណ៌ស្តីពីការសិក្សានៅប្រទេសជប៉ុនឆ្នាំ២០១៧ ដែលប្រព្រឹត្តទៅ កាលពីព្រឹកថ្ងៃទី២៨ ខែតុលា នៅមជ្ឍមណ្ឌលសហប្រតិបត្តិការកម្ពុជា-ជប៉ុន(CJCC)។
លោកស្រី បណ្ឌិត អ៊ុំ រ៉ាវី សាកលវិទ្យាធិការរង នៃសាកលវិទ្យាល័យភូមិន្ទភ្នំពេញ បានថ្លែងបើកកម្មវិធីស្តីពីការសិក្សានៅប្រទេសជប៉ុនថា លោកស្រីសង្ឃឹមជឿជាក់ថា សាកលវិទ្យាល័យទាំង៦នេះ នឹងនាំមកនូវព័ត៌មាន និងបទពិសោធន៍ល្អៗ ដែលអាចជាគន្លឹះដ៏សំខាន់ និងជាមេរៀនដ៏ល្អក្នុងការរៀបចំ គ្រប់គ្រងកែលម្អគ្រឹះស្ថានឧត្តមសិក្សា ការសិក្សាឲ្យកាន់តែមានលក្ខណៈ សម្បត្តិគ្រប់គ្រាន់មួយកម្រិតទៀត។ លោកស្រី បណ្ឌិត អ៊ុំ រ៉ាវី ថ្លែងបន្តយ៉ាងនេះទៀតថា ៖«ពិព័រណ៌នាពេលនេះ ក៏ជាឱកាសពិសេសផងដែរ សម្រាប់ប្អូនៗ សិស្ស និស្សិត ដើម្បីស្វែងយល់ពីការសិក្សាថ្នាក់ឧត្តមសិក្សានៅបរទេស ក៏ដូចជាត្រៀមខ្លួន សម្រាប់ចាប់យកឱកាសទៅសិក្សានៅប្រទេសជប៉ុន តាមរយៈអាហារូបករណ៍ក្តី ឬសិក្សាបង់ថ្លៃក្តី»។
កម្មវិធីខាងលើនេះមានគោលបំណង ដើម្បីផ្តល់ឱកាសឲ្យសិស្ស និស្សិត ដែលមានបំណងចង់សិក្សានៅប្រទេសជប៉ុន បានជួបជាមួយនឹងអ្នកតំណាងផ្ទាល់ពីសាកលវិទ្យាល័យល្បីៗនៅប្រទេសជប៉ុន ក៏ដូចជាអ្នកជំនាញផ្តល់ព័ត៌មានមានអាហារូករណ៍មកពីស្ថានទូតជប៉ុនប្រចាំកម្ពុជា និងមជ្ឍមណ្ឌលសហប្រតិបត្តិការអន្តជាតិជប៉ុន(JICE)។
សាកលវិទ្យាល័យល្បីៗ ចំនួន៦ មានសាកលវិទ្យាល័យអាស៊ីប៉ាស៊ីហ្វីករីហ្ស៉ឹមេកាំង សាកលវិទ្យាល័យអន្តជាតិជប៉ុន សាកលវិទ្យាល័យជាតិបច្ចេកវិទ្យា សាកលវិទ្យាល័យអាគីតា សាកលវិទ្យាល័យតូយ៉ូ និងសាកលវិទ្យាល័យរ៉ាសេដា បានចូលរួមធ្វើបទបង្ហាញ និងផ្តល់ប្រឹក្សាក្នុងពិព័រណ៍នេះ។
ក្រោយពីបានស្តាប់បទបង្ហាញនេះ និស្សិតលីម សៀកលីវ ជាសិស្សសាកលវិទ្យាល័យភ្នំពេញ ជំនាញអក្សសាស្ត្រជប៉ុន បានបង្ហាញចំណាប់អារម្មរណ៍ចង់ ទៅសិក្សានៅប្រទេសជប៉ុនយ៉ាងខ្លាំង។ និស្សិតរូបនេះ បញ្ជាក់ដូច្នេះថា ៖«ខ្ញុំចង់បន្តការសិក្សានៅប្រទេសជប៉ុន ពីព្រោះខ្ញុំស្រលាញ់វប្បធម៌ ប្រព័ន្ធអប់រំនៅទីនោះ នឹងត្រលប់មកកម្ពុជាវិញដើម្បីប្រើប្រាស់ចំណេះដឹងទាំងនោះមកជួយសង្គម»។
ស្របគ្នានោះដែរ យុវតី ហេង មួយលី ជានិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដែលចាប់អារម្មរណ៍នឹងការសិក្សា នៅប្រទេសជប៉ុននេះដែរនោះ ថ្លែងយ៉ាងនេះថា៖«ខ្ញុំចង់ទៅរៀនប្រទេសជប៉ុនជំនាញទំនាក់ទំនងអន្តជាតិដើម្បីរៀនពីប្រទេសជឿនលឿនដូចប្រទេសជប៉ុន»។
Tag:
បណ្ឌិត អ៊ុំ រ៉ាវី
CJCC
ពិព័រណ៌ការសិក្សាប្រទេសជប៉ុន
© រក្សាសិទ្ធិដោយ thmeythmey.com