​ពលរដ្ឋ​ខេត្តស្វាយរៀង​ទទួលបាន​យល់ដឹង​ច្រើន​ពី​ការប្រើប្រាស់​បង្គន់​អនាម័យ តាមរយៈ​អង្គការ​ភ្លែ​ន​
ជាតិ
សង្គមជាតិ
​ពលរដ្ឋ​ខេត្តស្វាយរៀង​ទទួលបាន​យល់ដឹង​ច្រើន​ពី​ការប្រើប្រាស់​បង្គន់​អនាម័យ តាមរយៈ​អង្គការ​ភ្លែ​ន​
29, Oct 2017 , 9:19 pm        
រូបភាព
 
​អង្គការ​ភ្លែ​ន​អន្តរជាតិ​កម្ពុជា និង​ក្រសួង​អភិវឌ្ឍន៍ជនបទ បាន​អប់រំ​ពលរដ្ឋ​ឲ្យ​ប្រើប្រាស់​បង្គន់​អនាម័យ​តាម​ផ្ទះ​ដោយ​ភាពជោគជ័យ កាលពី​ថ្ងៃទី​២៥ តុលា​។ កម្មវិធី​លើកកម្ពស់​អនាម័យ​ជនបទ​នៅក្នុង​ប្រទេស​កម្ពុជា​(CRSHIP) ក្រោម​ជំនួយ​ទឹកប្រាក់​៥​លាន​ដុល្លារ សម្រាប់​គម្រោង​រយៈពេល​៥​ឆ្នាំ ពី​ឆ្នាំ​២០១៤-២០១៩​។​


​លោក Andrew Hill នាយករង​អង្គការ​ភ្លែ​ន​អន្តរជាតិ លើកឡើង​នៅ​សាលប្រជុំ​ខេត្តស្វាយរៀង​ថា កម្មវិធី​លើកកម្ពស់​អនាម័យ​ជនបទ​នៅ​កម្ពុជា​(CRSHIP) មាន​គោលបំណង​ធ្វើ​ឲ្យ​ប្រសើ​ឡើង ក្នុងការ​អនុវត្ត​អនាម័យ​នៅតាម​សហគម និង​តាម​ជន​នៅ​កម្ពុជា ដើម្បី​បង្កើត​ឲ្យ​មាន​បង្គន់​អនាម័យ និង​ការ​លាងដៃ​ជាមួយ​សប៊ូ និង​ការ​ទទួលទាន​ទឹកស្អាត​មាន​សុវត្ថិភាព​។



លោក Andrew Hill បន្តថា ៖«​សំខាន់​នោះ​គឺមាន​ការអភិវឌ្ឍ ពង្រឹងសមត្ថភាព​មន្ត្រី​រដ្ឋាភិបាល​នៅ​មូលដ្ឋាន អង្គការក្រៅរដ្ឋាភិបាល​ក្នុងស្រុក​ក្នុងការ​លើកកម្ពស់​អនាម័យ និង​សុខភាព​»​។ 
 
​ជាមួយគ្នានេះ​លោក តូច ប៉ូ​លី​វ៉ា អភិបាលរង​នៃ​ខេត្តស្វាយរៀង បានលើកឡើង​នៅ​ថា ប្រជាពលរដ្ឋ​ក្នុង​ខេត្តស្វាយរៀង ចំនួន​៣៦ ភាគរយ នៅតែ​មិនទាន់បាន​យល់ដឹង​អំពី​ការ​ប្រតិ​ប​តិ្ត​អនាម័យ​ល្អ​នៅឡើយ ។​ជាពិសេស​កុមារ និង​គ្រួសារ​ក្រីក្រ និង​អ្នក​ងាយ​រងគ្រោះ​បំផុត ដោយ​ពួកគេ​នៅតែមាន​ទម្លាប់​ចាស់​បន្ទោបង់​ពាសវាល​ពាសកាល​។ លោក តូច ប៉ូ​លី​វ៉ា បន្តថា ៖«​បញ្ហា​ទាំងនេះ​រដ្ឋបាល​ខេត្តស្វាយរៀង បាន​ជំរុញ​តាមរយៈ​មន្ទីរជំនាញ និង​អង្គការ​ដៃគូ​នានា ដើម្បី​ឲ្យ​ពួកគាត់​បាន​យល់ដឹង​ពី​សារសំខាន់ នៃ​ការប្រតិបត្តិ​អនាម័យ​ល្អ ដោយ​ផ្លាស់ប្តូរ​ទម្លាប់​ចាស់ ពី​ការ​បន្ទោបង់​ពាសវាល​ពាសកាល ហើម​កសាង​សង់​ប្រើប្រាស់​បង្គន់​អនាម័យ​»​។ 
 
​តាម​ទិន្នន័យ​អង្កេត​សេដ្ឋកិច្ច​សង្គមកិច្ច​ឆ្នាំ​២០១៥ បង្ហាញថា ពលរដ្ឋ​ខេត្តស្វាយរៀង​ប្រើប្រាស់​ឧបករណ៍​ច្រោះ​ទឹកស្អាត​៣៩​ភាគរយ និង​ទឹក​ដាំ​ពុះ​ប្រមាណ​៤៣​ភាគរយ បើ​ប្រៀបធៀប​មក​បច្ចុប្បន្ន អត្រា​ប្រើប្រាស់​ទឹក​មាន​សុវត្ថិភាព​បាន​កើនឡើង​ដល់​៩៦​ភាគរយ និង​មាន​អនាម័យ​៦៤​ភាគរយ​។ នេះ​បើតាម​អភិបាលរង​នៃ​ខេត្តស្វាយរៀង​។​

  
 
​លោក យឹម ឆៃលី ប្រធាន​ក្រុមប្រឹក្សា​ស្តារ​អភិវឌ្ឍន៍​វិស័យ​កម្ម​សិ​កម្ម និង​ជនបទ បាន​លើកឡើងថា ការ​ផ្គត់​ផ្គង​ទឹកស្អាត និង​អនាម័យ​ជន ជា​វិស័យ​មួយ​មាន​សារសំខាន់​ណាស់ ទាំង​ក្នុង​ទិដ្ឋភាព​សេដ្ឋកិច្ច សង្គម និង​ដំណើរការ​អភិវឌ្ឍន៍​ប្រទេស​។ 
 
​ក្រសួង​អភិវឌ្ឍន៍ជនបទ​បាន​រៀបចំ​ផែនការ​សកម្មភាព​ជាតិ ស្ដីពី​ការផ្គត់ផ្គង់​ទឹកស្អាត និង​លើកកម្ពស់​អនាម័យ​ឆ្នាំ​២០១៤-២០១៨ ដោយ​កំណត់ថា ប្រជាពលរដ្ឋ​៦០​ភាគរយ ត្រូវ​ទទួល​សេវា​ផ្គត់ផ្គង់​ទឹកស្អាត អ្នកមាន​បង្គន់​អនាម័យ​៦០​ភាគរយ ហើយ​និង​៦០​ភាគរយ​ទៀត​មាន​ទម្លាប់​លាងដៃ​ជាមួយនឹង​សាប៊ូ​។  នេះ​ជាការ​បញ្ជាក់​របស់លោក យឹម ឆៃលី ដែល​បាន​បន្ថែមថា ៖«​កុមារ​អាយុ​ក្រោម​៥​ឆ្នាំ​ខ្វះ​អាហារ​រូប​ត្ថ​ម្ភ​ដោយមាន​ជំងឺ​ក្រិះ​ក្រិន​ប្រមាណ​៣២​ភាគរយ កុមារ​ស្គម​ស្លេកស្លាំង​៥៥​ភាគរយ ហើយ​និង​មាន​ទម្ងន់​ស្រាល​២៤​ភាគរយ​»​។ 

  
 
​ក្រុមប្រឹក្សា​ស​ប្រតិបត្តិការ​វិស័យ​ទឹកស្អាត និង​អនាម័យ​(WSSCC) និង​មូលនិធិ​អនាម័យ​សកល​(GSF) បានផ្តល់​ជំ​នួន​ឥត​សំណង​ដល់​រដ្ឋាភិបាល​កម្ពុជា​ទឹកប្រាក់​១០​លាន​ដុល្លារ ដោយ​ចាប់ពី​ឆ្នាំ​២០១១-២០១៦ បានផ្ដល់​ប្រាក់​ចំនួន​៥​លាន​ដុល្លារ ដែល​បានដាក់​គៅ​ល​ដៅ​ចំនួន​២​ពាន់​ភូមិ ហើយ​៤២​ភាគរយ​ឈប់​បន្ទោបង់​ពាសវាល​ពាសកាល​។  ចំណែក​គម្រោង​ទី​២ ផ្ដល់​ទឹកប្រាក់​៥​លាន​ដុល្លារ ពី​ឆ្នាំ​២០១៤-២០១៩ មាន​គោលដៅ​ភូមិ​ចំនួន​១១២០ ក្នុងនោះ​៦០​ភាគរយ​ធ្វើ​ឲ្យ​មាន​ការឈប់​បន្ទោបង់​ពាសវាល​ពាសកាល​។ បើតាម​លោក Andrew Hill នាយករង​អង្គការ​ភ្លែ​ន​អន្តរជាតិ មកដល់ពេលនេះ​ពលរដ្ឋ​នៅ​ខេត្តស្វាយរៀង ចំនួន​១១​ឃុំ ដែលមាន​ប្រជាពលរដ្ឋ​ប្រមាណ​១៥២,៩៨៥​នាក់​រស់នៅ​ក្នុងភូមិ​ចំនួន​១៨៦ បានប្រកាស​បញ្ឈប់​ការ​បន្ទោបង់​ពាសវាល​ពាសកាល និង​រស់នៅ​ដោយមាន​អនាម័យ​ត្រឹមត្រូវ​៕
 
 

 

Tag:
 យឹម ឆៃលី​
 ​តូច ប៉ូ​លី​វ៉ា​
  Andrew Hill
© រក្សាសិទ្ធិដោយ thmeythmey.com