ពលរដ្ឋជិត ៤ម៉ីននាក់ ទៅកម្សាន្តក្នុងពិធីប្រណាំងទូក នៅកំពង់ស្ពឺ

ជាតិ

ពលរដ្ឋជិត ៤ម៉ីននាក់ ទៅកម្សាន្តក្នុងពិធីប្រណាំងទូក នៅកំពង់ស្ពឺ

30, Oct 2017 , 2:52 pm

រូបភាព

ដោយ: ថ្មីៗ

កំពង់ស្ពឺ៖ ពិធីប្រណាំងទូក ក្នុងខេត្តកំពង់ស្ពឺ ដែលរៀបចំដោយរដ្ឋបាលខេត្ត កាលពីថ្ងៃទី ២៧-២៨ តុលានេះ បានទាក់ទាញភ្ញៀវទេសចរទៅកម្សាន្តជិត ៤ម៉ឺននាក់។ ពិធីប្រណាំងទូកនេះ បានប្រព្រឹត្តទៅ រយៈពេល ២ថ្ងៃ ដែលរៀបចំនៅវិមានសម្ដេចព្រះសង្ឃរាជ ជួន ណាត និងតាមបណ្ដោយដងស្ទឹងព្រែកត្នោត។

នេះជាលើកទី៤ហើយ ដែលរដ្ឋបាលខេត្តកំពង់ស្ពឺ បានរៀបចំពិធីប្រណាំងទូកថ្នាក់ខេត្ត ដើម្បីអបអរព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ។ ក្នុងព្រឹត្តិការណ៍នេះ មានទូកចូលរួមប្រណាំងចំនួន ៣៣ទូក ដោយទូកខ្នាតអន្តរជាតិ មានចំនួន ៤ទូក។

លោក សរ សុពុត្រា អភិបាលរងខេត្តកំពង់ស្ពឺ បានប្រាប់សារព័ត៌មានថ្មីៗ តាមទូរសព្ទថា ក្នុងពិធីប្រណាំងទូក រយៈពេល ២ថ្ងៃនេះ មានពលរដ្ឋ ចំនួន ៣៨,២៥០នាក់ បានមកដើរកម្សាន្តក្នុងពិធីនេះ។ លោក សរ សុពុត្រា បញ្ជាក់ទៀតថា សម្រាប់បញ្ហាសន្តិសុខ និងសុវត្ថិភាពក្នុងពិធីនេះ មិនមានជាបញ្ហាអ្វីកើតឡើងនោះទេ ដោយកម្មវិធីនេះ បានប្រព្រឹត្តទៅដោយរលូន។

អភិបាលរងខេត្តរូបនេះ បន្ថែមថា បញ្ហាសំរាមវិញ ប្រជាពលរដ្ឋបានគ្រប់គ្រងកាកសំណល់ត្រឹមត្រូវ ដោយមិនបង្កឲ្យខូចសោភ័ណភាពនោះទេ។ ម្យ៉ាងទៀត ពលរដ្ឋមានការផ្លាស់ប្ដូរជាងឆ្នាំមុនៗ ដោយបានបោះចោលសំរាមក្នុងធុង។ សូមបញ្ជាក់ថា រដ្ឋបាលខេត្តកំពង់ស្ពឺ នឹងរៀបចំកម្មវិធីនេះ ជារៀងរាល់ឆ្នាំ ដើម្បីផ្ដល់ភាពសប្បាយរីករាយដល់ពលរដ្ឋក្នុងខេត្តកំពង់ស្ពឺផងដែរ។

សូមអញ្ជើញទស្សនារូបភាពខាងក្រោម៖