ពង​ត្រដក់​តូច​១២១​សំបុក ត្រូវបាន​រកឃើញ​នៅ​តំបន់​ខ្ពង់រាប​
ជាតិ
សង្គមជាតិ
ពង​ត្រដក់​តូច​១២១​សំបុក ត្រូវបាន​រកឃើញ​នៅ​តំបន់​ខ្ពង់រាប​
30, Oct 2017 , 9:39 pm        
រូបភាព
​សំបុក​ពង​កូន​សត្វ​ត្រដក់​តូច​ដែលជា​សត្វ​ប្រភេទ​ងាយ​រងគ្រោះ ជា​សកល​នៅក្នុង​បញ្ជី​ក្រហម​នៃ​អង្គការ IUCN ១២១​សំបុក ត្រូវបាន​ក្រុម​អ្នកជំនាញ​ស្រាវជ្រាវ រកឃើញ​នៅ​តំបន់​ខ្ពង់រាប​ភាគ​ខាងជើង​ប្រទេស​កម្ពុជា​។ សំបុក​ពង​កូន​សត្វ​ត្រដក់​តូច​ទាំងនេះ ត្រូវបាន​អង្គការ WCS ជួល​ប្រជា​សហគមន៍​១០​ក្រុម ឲ្យ​យាម​សំបុក​ទាំងនោះ រហូតដល់​ពេល​វា​ញាស់ និង​ហើរ​ចេញ​អស់ពី​សំបុក​។



​អង្គការ​អភិរក្ស​សត្វ​ព្រៃ​(WCS) បាន​ឲ្យ​ដឹងថា ពង​កូន​សត្វ​ត្រដក់​ចំនួន​៦៥​សំបុក ត្រូវបាន​រកឃើញ​នៅក្នុង​ដែនជម្រកសត្វព្រៃ​ឆែប និង​៥៦​សំបុក មាន​ទីតាំង​នៅក្នុង​ដែនជម្រកសត្វព្រៃ​គូលែន​ព្រហ្ម​ទេព នៅ​តំបន់​ខ្ពង់រាប​ភាគ​ខាងជើង ខេត្តព្រះវិហារ​នៃ​ប្រទេស​កម្ពុជា​។ បើតាម​មន្ត្រី​អង្គការ​អភិរក្ស​សត្វព្រៃ សត្វ​ត្រដក់​តូច​ទាំង​១២១ សំបុក​នេះ អាចមាន​ចំនួន​ជាង​២០០​ក្បាល​។​

​សេចក្ដីប្រកាស​ព័ត៌មាន​របស់​អង្គការ​អភិរក្ស​សត្វព្រៃ​(WCS) នៅ​ថ្ងៃទី​៣០ ខែតុលា ឆ្នាំ​២០១៧ បាន​បន្តទៀតថា ៖«​ទោះបី​ចំនួន​របស់​វា​នៅលើ​សកលលោក​ត្រូវបាន​គេ​ប៉ាន់ប្រមាណ​ថា​មាន​ជាង​មួយ​ម៉ឺន​ក្បាល ប៉ុន្តែ​តួលេខ​នេះ កំពុងតែ​ធ្លាក់ចុះ​យ៉ាងខ្លាំង​នៅ​តំបន់​អាស៊ី​។ ដូច្នេះហើយ វា​ត្រូវបាន​គេ​ចាត់ជា​ប្រភេទ​ងាយ​រងគ្រោះ​ជាស​កល នៅក្នុង​បញ្ជី​ក្រហម​របស់​អង្គការ IUCN»​។​

​អនុប្រធាន​មន្ទីរ​បរិស្ថាន​ខេត្តព្រះវិហារ លោក សុង ច័ន្ទ​សុជាតិ និយាយថា ការការពារ​ទីជម្រក​ពង​កូន​របស់​ពួកវា ពិតជា​សំខាន់​ខ្លាំងណាស់ ដើម្បី​ធានា​ដល់​ការរស់នៅ​នៃ​ប្រភេទ​សត្វ​ដ៏​កម្រ​មួយ​នេះ​។ លោក បញ្ជាក់ថា «​តំបន់​ខ្ពង់រាប​ភាគ​ខាងជើង​នៃ​ប្រទេស​កម្ពុជា​ក្នុង​ខេត្តព្រះវិហារ ជាទី​ជម្រក​ពង​កូន​ដ៏​សំខាន់​ជាងគេ​បង្អស់​ទី​ពីរ នៅ​កម្ពុជា បន្ទាប់ពី​តំបន់​រ៉ា​ម​សារ​ព្រែក​ទាល់ ខេត្តបាត់ដំបង​»​។ អនុប្រធាន​មន្ទីរ​បរិស្ថាន​ខេត្តព្រះវិហារ​រូបនេះ បាន​អំពាវនាវ​គ្រប់ភាគី​ទាំងអស់ ចូលរួម​ការពារ​សត្វ​ព្រៃ​នៅ​កម្ពុជា ដោយ​បញ្ឈប់​ការ​បរបាញ់ ការបំពុល ឬ​បរិភោគ​សាច់សត្វ​ព្រៃ​ជាដើម​។​

​លោក សំ ឃឿន ដែលជា​អ្នកយាម​សំបុក​សត្វ​ត្រដក់​តូច​នេះ បាន​ប្ដេជ្ញា​ការពារ​សំបុក​សត្វ​ត្រដក់ មិន​ឲ្យ​មានការ​រំខាន​ពី​សំណាក់​មនុស្ស ឬ​សត្វ​ឡើយ​។ «​ខ្ញុំ​នឹង​ព្យាយាម​ការពារ​ត្រដក់​ទាំងអស់នេះ និង​សំបុក​ពង​កូន​របស់​ពួកវា​ឲ្យ​បានល្អ​ដូច​រយៈពេល​២​ឆ្នាំ​កន្លងទៅ​។ ក្រោយពេល​អង្គការ​WCS បាន​ជួល​ខ្ញុំ និង​កូន ឲ្យ​យាម​សំបុក​នេះ ខ្ញុំ​បាន​ផ្លាស់ប្ដូរ​វេន​គ្នា​យាម​ជាប្រចាំ ដើម្បី​ការពារ​កុំ​ឲ្យ​មាន​អ្នក​មក​រំខាន ឬ​បរបាញ់​ពួកវា​ជាដើម​។ ខ្ញុំ​នឹង​ព្យាយាម​ឲ្យ​អស់ពី​លទ្ធភាព​ដើម្បី​ការពារ​រហូតដល់​ពួកវា​ញាស់ និង​ហើរ​ចេញពី​សំបុក​បាន​»​។ នេះ​ជាការ​លើកឡើង​របស់លោក សំ ឃឿន​។​

​ត្រដក់​តូច​នេះ ជា​សត្វ​ស្លាបមាន​មាឌធំ ហើយ​មាន​កម្ពស់​រហូតដល់​១៣០ សង់ទីម៉ែត្រ រីឯ​ស្លាប​របស់​វា​ម្ខាងៗ មាន​ប្រវែង​ជាង​២​ម៉ែត្រ​។ សត្វ​ស្លាប​ត្រដក់​តូច​នេះ វា​ចូលចិត្ត​ធ្វើ​សំបុក​ពង​កូន​នៅលើ​ដើមឈើ​ខ្ពស់ៗ​ដែលជា​ប្រភេទ​ព្រៃ​ល្បោះ ព្រៃ​ពាក់កណ្ដាល​ស្រោង និង​ព្រៃស្រោង​។ តំបន់​ខ្ពស់​រាប​ភាគ​ខាងជើង​ប្រទេស​កម្ពុជា ក្នុង​ខេត្តព្រះវិហារ គឺជា​ទីជម្រក​ដ៏​សំខាន់បំផុត​មួយ​សម្រាប់​ហ្វូង​សត្វ​ត្រដក់​តូច​នេះ​។ នេះ​បើតាម​អង្គការ WCS៕


Tag:
 WCS
 ​ សំបុក​ត្រដក់​តូច​
© រក្សាសិទ្ធិដោយ thmeythmey.com