ជាតិ
សម្តេច ស ខេង៖ ប្រទេសខ្លះ បញ្ចប់ការផ្តល់ជំនួយ ព្រោះចំណូលពលរដ្ឋកម្ពុជា មានការកើនឡើង
× ភ្នំពេញ៖ ដោយសារតែសេដ្ឋកិច្ច រួមទាំងប្រាក់ចំណូលនៃប្រជាពលរដ្ឋកម្ពុជា មានការរីកចម្រើនបែបនេះហើយ ទើប អង្គការអន្តរជាតិនានា និងប្រទេសជាម្ចាស់ជំនួយមួយចំនួន សម្រេចបញ្ចប់និងបន្ថយជំនួយរបស់ខ្លួនមកកម្ពុជា។ នេះបើតាមសម្តេច ស ខេង រដ្ឋមន្ត្រីក្រសួងមហាផ្ទៃ ដែលបានលើកឡើង ក្នុងកិច្ចប្រជុំលើកទី១ នៃគណៈកម្មាធិការជាតិជំរឿនទូទៅនៅកម្ពុជាឆ្នាំ២០១៩ ដែលរបចំនៅទីស្ដីការក្រសួងមហាផ្ទៃ នាព្រឹកថ្ងៃទី៧ ខែវិច្ឆិកា ឆ្នាំ២0១៧នេះ។
សម្ដេច ស ខេង បានមានប្រសាសន៍ថា បច្ចុប្បន្ន ប្រទេសម្ចាស់ជំនួយមួយចំនួន បានចាត់ទុក កម្ពុជា ជាប្រទេស ដែលមានប្រាក់ចំណូលមធ្យមកម្រិតទាប ដោយមានផលិតផលក្នុងស្រុកសរុបសម្រាប់ប្រជាជនម្នាក់ៗ (GDP) មានចំណូលលើសពី១ពាន់ដុល្លារ។ រដ្ឋមន្ត្រីក្រសួងមហាផ្ទៃរូបនេះ បញ្ជាក់ដូច្នេះថា៖«អង្គការ និងម្ចាស់ជំនួយភាគច្រើន បានចាត់ទុកកម្ពុជា ជាប្រទេសមួយដែលមានប្រាក់ចំណូលធម្យមកម្រិតទាប ដូច្នេះទើបបញ្ចប់ និងកាត់បន្ថយជំនួយរបស់ខ្លួនមកប្រទេសកម្ពុជា»។
រដ្ឋមន្ត្រីក្រសួងមហាផ្ទៃបន្ថែមថា តាមទិន្នន័យនៃការធ្វើជំរឿននៅក្នុងប្រទេស និងផ្ដល់ជាប្រភពគ្រប់ជ្រុងជ្រោយទាក់ទង នឹងប្រជាជនចរិតលក្ខណៈភូមិសាស្ត្រ សេដ្ឋកិច្ច សង្គមកិច្ច ដែលអាចផ្ដល់ជាអត្តសញ្ញាណសំខាន់សម្រាប់ លក្ខណ្ឌសេដ្ឋកិច្ចរបស់ប្រជាជនកម្ពុជា ព្រមទាំងការប្រើប្រាស់ជាមូលដ្ឋានក្នុងការអភិវឌ្ឍ ការត្រួតពិនិត្យវាយតម្លៃ លើការអនុវត្តផែនការយុទ្ធសាស្ត្រអភិវឌ្ឍន៍ជាតិ។
ទីភ្នាក់ងារសារព័ត៍មានកម្ពុជា (AKP) បានស្រង់សម្តីរបស់លោក តេង ដឺលុច អ្នកវិភាគសេដ្ឋកិច្ចថា ប្រទេសកម្ពុជា ដែលមានផលិតលក្នុងស្រុកសរុបលើសពី១ពាន់២រយដុល្លារឡើងទៅ ត្រូវបានចាត់ទុកជាប្រទេស ដែលមានចំណូលមធ្យមកម្រិតទាប។ តាមAKP ដដែល អ្នកវិភាគសេដ្ឋកិច្ចរូបនេះ បានបន្តថា ផ្អែកលើគោលការនៃការផ្ដល់ជំនួយអន្តរជាតិ គឺត្រូវកាត់បន្ថយការផ្តល់ជំនួយទៅប្រទេសនោះ និងត្រូវបង្វែរកញ្ចប់ជំនួយ ទៅជួយដល់ប្រទេសក្រីក្រ និងកំពុងអភិវឌ្ឍដទៃទៀត។
លោក តេង ដឺលុច សង្កត់ធ្ងន់ថា ក្នុងបរិបទនេះ កម្ពុជាមិនត្រូវពឹងផ្អែកតែទៅលើជំនួយរបស់បរទេសនោះឡើយ។ សម្តីរបស់លោក ត្រូវបាន AKP ដកស្រង់មកចុះផ្សាយយ៉ាងដូច្នេះថា៖«ត្រូវពង្រឹងសមត្ថភាពរបស់ខ្លួន និងប្រែក្លាយទៅជាប្រទេសដែលអាចផ្ដល់ជំនួយទៅប្រទេសដទៃវិញ»។
គូសបញ្ជាក់ថា តាមរបាយការណ៍របស់មូលនិធិរូបិយវត្ថុអន្តរជាតិ ក្នុងឆ្នាំ២០១៦ ផលិតផលក្នុងស្រុកសរុបនៃប្រជាជនកម្ពុជាក្នុងម្នាក់ៗមានចំណូលប្រមាណពី១២២៨ដុល្លារ បើប្រៀបធៀបទៅនឹងឆ្នាំ២០១៥កើនឡើង៨៣ដុល្លារ៕
Tag:
ស ខេង
តេង ដឺលុច
ផ្ដាច់ជំនួយ
© រក្សាសិទ្ធិដោយ thmeythmey.com