Play-Off៖ ក្រូអាស៊ីលត់ក្រិក ៤-១ សង្ឃឹមបានកៅអីទៅ World Cup

កីឡាអន្តរជាតិ

អន្តរជាតិ

Play-Off៖ ក្រូអាស៊ីលត់ក្រិក ៤-១ សង្ឃឹមបានកៅអីទៅ World Cup

10, Nov 2017 , 2:51 pm

រូបភាព

ដោយ: ទេព ពិទូរ្យ

ក្រុមកីឡាបាល់ទាត់ជម្រើសជាតិក្រូអាស៊ីសង្ឃឹមខ្ពស់ដើម្បីឈានទៅប្រកួតពានរង្វាន់ពិភពលោក FIFA World Cup នៅរុស្ស៊ីឆ្នាំក្រោយ បន្ទាប់ពីយកឈ្នះក្រិក ៤ទល់នឹង១ នៃវគ្គ Play-off ជើងទី១ នៅរាត្រីថ្ងៃទី៩ ខែវិច្ឆិកា។

៤គ្រាប់របស់ក្រូអាស៊ីធ្វើបានដោយ Luka Modric, Nikola Kalinic, Ivan Perisic និង Andrej Kramaric ហើយ១គ្រាប់របស់ក្រិកធ្វើបានដោយ Sokratis Papastathopoulos។

ជ័យជម្នះ ៤-១ នៃការប្រកួតជម្រុះជើងទី១នេះ ធ្វើឲ្យក្រូអាស៊ីក្នុងនាមជាម្ចាស់ផ្ទះមានគ្រាប់បាល់ចំណេញរហូត៣គ្រាប់ ដែលធ្វើឲ្យក្រិកត្រូវមានភារកិច្ចធំបំផុតសម្រាប់ការប្រកួតជើងទី២ ក្នុងទឹកដីខ្លួនឯងវិញ នៅរាត្រីថ្ងៃទី១២ ខែវិច្ឆិកានេះ។ ដើម្បីដណ្តើមកៅអីទៅ World Cup ឆ្នាំ២០១៨ នៅរុស្ស៊ីបាន ក្រិកត្រូវយកឈ្នះក្រូអាស៊ីចាប់ពី ៣-០ ឡើងទៅ។

ចំណែកមួយគូទៀតក្នុងវគ្គ Play-off ជើងទី១ដូចគ្នានេះដែរ ស្វីស បានយកឈ្នះម្ចាស់ផ្ទះ អៀរឡង់ខាងជើង ១-០។ គ្រាប់បាល់ជ័យជម្នះរបស់ស្វីសធ្វើបានដោយ Ricardo Rodriguez ក្រោយទទួលបាល់ពិន័យប៉េណាល់ទីយ៉ាងចម្រូងចម្រាសនាកីឡដ្ខាន Windsor។

បរាជ័យក្នុងផ្ទះខ្លួនឯងនឹងធ្វើឲ្យអៀរឡង់ខាងជើងប្រឈមការលំបាកសម្រាប់ការប្រកួតជើងទី២ក្នុងទឹកដីស្វីស ដើម្បីបានកៅអីទៅជុំផ្តាច់ព្រ័ត្រព្រឹត្តិការណ៍បាល់ទាត់ពិភពលោកជាលើកដំបូងរបស់ខ្លួនចាប់តាំងពីឆ្នាំ១៩៨៦មក៕