ដោយសារធ្លាប់មានបទឧក្រិដ្ឋ Mike Tyson ត្រូវហាមចូលស៊ីលី

កីឡាអន្តរជាតិ

អន្តរជាតិ

ដោយសារធ្លាប់មានបទឧក្រិដ្ឋ Mike Tyson ត្រូវហាមចូលស៊ីលី

11, Nov 2017 , 7:59 am

រូបភាព

ដោយ: ទេព ពិទូរ្យ

អតីតស្តេចប្រដាល់សកលទំងន់ធ្ងន់ Mike Tyson ត្រូវបានរារាំងមិនឲ្យចូលប្រទេសស៊ីលី ដោយសារតែកំណត់ត្រាបទឧក្រិដ្ឋរបស់គេកន្លងមក។ នេះបើតាមការឲ្យដឹងពីប៉ូលិស នៅឯព្រលានយន្តហោះអន្តរជាតិ Santiago។

បណ្តាញសារព័ត៌មាន Chilean បានរាយការណ៍ថា Mike Tyson មានគម្រោងចូលរួមក្នុងពិធីប្រគល់ពានរង្វាន់មួយ នៅទីក្រុង Santiago ប្រទេសស៊ីលី។ ប៉ុន្តែកាលពីថ្ងៃព្រហស្បតិ៍ ទី៩ ខែវិច្ឆិកា ប៉ូលិសអន្តោប្រវេសន៍នៅអាកាសយានដ្ឋានអន្តរជាតិ Santiago បានបង្ហោះរូបរបស់អតីតម្ចាស់ខ្សែក្រវ៉ាត់ទម្ងន់ធ្ងន់ វ័យ៥១ឆ្នាំរូបនេះ ដែលត្រូវបានមន្ត្រីប៉ូលិសនៃប្រទេសស៊ីលី នាំរូបគេឲ្យចាកចេញពីព្រលានវិញ។ ប៉ូលិសនៅទីនោះថា Tyson ត្រូវចាកចេញពីទីនោះ ដោយសារ«មិនគោរពច្បាប់អន្តោប្រវេសន៍»។

មួយវិញទៀត កងកម្លាំងប៉ូលិសទាំងនោះ ក៏បានពន្យល់ទៀតថា ពួកគេមានសិទ្ធិអំណាច ដើម្បីហាមឃាត់ជនបរទេសណា ដែលធ្លាប់មានប្រវត្តិអាក្រក់ ឬបទឧក្រិដ្ឋផ្សេងៗ ចូលមកក្នុងប្រទេសនេះ។

សូមបញ្ជាក់ថា នៅឆ្នាំ ១៩៩២ អតីតកំពូលអ្នកប្រដាល់ទម្ងន់យក្ស សញ្ជាតិអាមេរិកនេះ ត្រូវបានកាត់ទោសពីបទចាប់រំលោភ បេក្ខនារីបវរកញ្ញាវ័យជំទង់ម្នាក់ នៅក្នុងបន្ទប់សណ្ឋាគាររបស់ខ្លួន នៅទីក្រុង Indianapolis រដ្ឋ Indiana សហរដ្ឋអាមេរិក។ លោកត្រូវបានផ្តន្ទាទោស ឲ្យជាប់ពន្ធនាគាររយៈពេល៦ឆ្នាំ ប៉ុន្តែត្រូវបានដោះលែងមុនពេលកំណត់វិញ៕