កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
រុស្ស៊ីប្រឈមនឹងការគំរាមកំហែងភេរវកម្មពីក្រុមសកម្មជនរដ្ឋអ៊ីស្លាម ISIS ក្នុងការប្រកួតពានរង្វាន់កីឡាបាល់ទាត់ពិភពលោក FIFA World Cup នៅឆ្នាំក្រោយ។ ប៉ុន្តែយ៉ាងណាក៏ដោយ ក្នុងនាមជាម្ចាស់ផ្ទះ រុស្ស៊ីនឹងចាត់វិធានការតឹងរឹងបំផុតដើម្បីប្រយុទ្ធប្រឆាំងពីការគំរាមនេះ។ 
បើតាមការផ្សាយរបស់សារព័ត៌មាន Rappler ដោយសារតែយុទ្ធនាការយោធារបស់រុស្ស៊ីនៅក្នុងប្រទេសស៊ីរីកន្លងមកទើបធ្វើឲ្យប្រទេសនេះក្លាយជាគោលដៅចម្បងសម្រាប់ក្រុមភេរវជន នាព្រឹត្តិការណ៍កីឡាលំដាប់ពិភពលោកឆ្នាំ២០១៨ខាងមុខ។
ការបំផ្ទុះគ្រាប់បែកទៅលើរថភ្លើងក្រោមដីនៅក្នុងទីក្រុង Saint Petersburg កាលពីខែមេសាដែលធ្វើឱ្យមនុស្ស ១៥នាក់ស្លាប់គឺស្ថិតក្នុងចំណោមការវាយប្រហារភេវរកម្មដែលកើតមាននៅលើទឹកដីរុស្ស៊ីដែរ។
ការភ័យខ្លាចចេះតែកើនឡើងបន្ថែមទៀតបន្ទាប់ពីមនុស្ស ៧នាក់ត្រូវបានចាក់សម្លាប់នៅស៊ីបេរីកាលពីខែសីហា នៅក្នុងការវាយប្រហារមួយរបស់ក្រុម ISIS ហើយក្រុមអាជ្ញាធររុស្ស៊ីអះអាងថាក្រុមនេះបានពង្រីកខ្លួននៅទូទាំងប្រទេស។
លោក Alexander Golts អ្នកជំនាញឯករាជ្យរុស្ស៊ីដែលមានឯកទេសខាងសន្តិសុខបាននិយាយថា នឹងមានការគំរាមកំហែងយ៉ាងពិតប្រាកដនៅក្នុងប្រទេសរុស្ស៊ី ក្នុងអំឡុងការប្រកួត World Cup ដែលចាប់ផ្តើមពីថ្ងៃទី ១៤ ខែមិថុនា ដល់ថ្ងៃទី ១៥ ខែកក្កដាឆ្នាំ២០១៨។
យោងតាមភ្នាក់ងារសន្តិសុខសហព័ន្ធ (FSB) ពួកជីហាដរុស្ស៊ីប្រហែល ២៩០០ នាក់ដែលភាគច្រើនជាជនមូស្លីមធ្លាប់បានប្រយុទ្ធគ្នានៅស៊ីរី។ ចំណែកពួកសកម្មប្រយុទ្ធចន្លោះពី ២០០០ ទៅ ៤០០០នាក់មកពីអាស៊ីកណ្តាលឥឡូវនេះកំពុងរស់នៅប្រទេសរុស្ស៊ី។
ព្រឹត្ដិការណ៍កីឡាដ៏ល្បីល្បាញបំផុតរបស់ពិភពលោក World Cup រួមជាមួយកីឡាអូឡាំពិកគឺជាគោលដៅធំបំផុតសម្រាប់ក្រុមភេវរជននេះ៕
Tag:
បាល់ទាត់
FIFA World Cup
ISIS
រុស្ស៊ី
© រក្សាសិទ្ធិដោយ thmeythmey.com
