ពីនេះ ពីនោះ
រូបថតសម្តេច ហ៊ុន សែន ក្លាយជាប្រធានបទវិភាគតាមហ្វេសប៊ុក!
×
អ្នកលេងហ្វេសប៊ុកក្រុមទីមួយ និងអ្នកលេងហ្វេសប៊ុកក្រុមទីពីរ! នៅថ្ងៃសៅរ៍ ក្រុមទីមួយផ្តល់ការវិភាគបែបស៊ីជម្រៅផ្សេងៗទាក់ទងនឹងរូបភាពសម្តេច ហ៊ុន សែន ដែលស្ថិតក្នុងពិធីជប់លៀងនាកិច្ចប្រជុំ APEC នៅវៀតណាម។ នៅថ្ងៃអាទិត្យ ក្រុមទីពីរបានកាន់កាប់វេទិកាហ្វេសប៊ុកវិញម្តង ដើម្បីផ្តល់ការវិភាគលើរូបថតសម្តេចនាយករដ្ឋមន្ត្រី ដែលចាប់ដៃជាមួយប្រធានាធិបតីអាមេរិក។
«នាយករដ្ឋមន្ត្រីខ្មែរ ឯកោហើយ!» នេះជាសំណេររបស់អ្នកលេងហ្វេសប៊ុកមួយចំនួន ទៅលើរូបថតដែលយកចេញពីឃ្លីបវីដេអូ នាពិធីជប់លៀងសម្រាប់ថ្នាក់ដឹកនាំដែលបានចូលរួមក្នុងកិច្ចប្រជុំកំពូលសហប្រតិបត្តិការអាស៊ីប៉ាស៊ីហ្វិក (APEC) ទីក្រុងដាណាំង ប្រទេសវៀតណាម កាលពីថ្ងៃទី១០ ខែវិច្ឆិកា។ នៅក្នុងរូបថត សម្តេច ហ៊ុន សែន អង្គុយនៅចន្លោះរវាងលោកនាយករដ្ឋមន្ត្រីកាណាដា Justin Trudeau និងលោកនាយករដ្ឋមន្ត្រីអូស្ត្រាលី Malcolm Turnbull។
សកម្មភាពវីដេអូ បានបង្ហាញឲ្យឃើញថា មេដឹកនាំកាណាដា និងអូស្ត្រាលី មានដៃគូសន្ទនារៀងៗខ្លួន ខណៈសម្តេច ហ៊ុន សែន បន្តអង្គុយស្ងៀមស្ងាត់ម្នាក់ឯង។ អ្នកវិភាគហ្វេសប៊ុកមួយចំនួន បានសរសេរចំអកថា មេដឹកនាំពិភពលោកមិនចង់និយាយទៅកាន់សម្តេច ហ៊ុន សែន ឡើយ ដោយពួកគេបានភ្ជាប់ទៅនឹងស្ថានការណ៍នយោបាយដ៏តានតឹងនាពេលបច្ចុប្បន្ន។
ឈានដល់ថ្ងៃអាទិត្យ សម្តេច ហ៊ុន សែន បានចូលរួមក្នុងពិធីជប់លៀងពិសេសដើម្បីអបអរខួបលើកទី៥០របស់អាស៊ាននៅទីក្រុងម៉ានីល ប្រទេសហ្វីលីពីន កាលពីថ្ងៃទី១២ ខែវិច្ឆិកា។ រូបថតជាច្រើនសន្លឹកត្រូវបានបង្ហោះដែលក្នុងនោះ មានសកម្មភាពសម្តេច ហ៊ុន សែន សន្ទនាជាមួយលោកប្រធានាធិបតីអាមេរិក ដូណាល់ ត្រា និងការថតរូបជាមួយមេដឹកនាំជាច្រើនទៀត រួមទាំងលោកនាយករដ្ឋមន្ត្រីកាណាដា Justin Trudeau ផងដែរ។
ខុសពីរូបថតដែលផ្សព្វផ្សាយកាលពីថ្ងៃសៅរ៍ រូបថតនៅថ្ងៃអាទិត្យ បានធ្វើឲ្យអ្នកគាំទ្រសម្តេច ហ៊ុន សែន ពេញចិត្តពេញថ្លើមយ៉ាងខ្លាំង។ អ្នកខ្លះបានសរសេរថា៖ «សម្តេច ហ៊ុន សែន ជាអ្នកនយោបាយជើងចាស់ ដែលមេដឹកនាំផ្សេងទៀតតែងតែសរសើរ និងចង់ប្រាស្រ័យទាក់ទង»។
រូបថតលោកត្រាំ ចាប់ដៃសម្តេច ហ៊ុន សែន ហើយលើកមេដៃម្ខាងទៀត ត្រូវអ្នកខ្លះបកស្រាយថា អាមេរិកសរសើរ និងគាំទ្ររាល់ការសម្រេចចិត្តរបស់មេដឹកនាំកម្ពុជា។
គ្រាន់តែរូបថត បង្កឲ្យមានការបកស្រាយផ្សេងគ្នា!
© រក្សាសិទ្ធិដោយ thmeythmey.com