កីឡាជាតិ
ជាតិ
ហ្ស៊កដានី ជាក្រុមកម្រិតខ្ពស់ដែលលោក ប្រាក់ សុវណ្ណារ៉ា ត្រូវជួបលើកដំបូងក្នុងអាជីពជាគ្រូបង្វឹក លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជា
× គ្រូបង្វឹកក្រុមកីឡាជម្រើសជាតិកម្ពុជាលោក ប្រាក់ សុវណ្ណារ៉ា ត្រូវដឹកនាំក្រុមរបស់ខ្លួនលើកទី២ទទួលស្វាគមន៍ក្រុមភ្ញៀវហ្ស៊កដានីសម្រាប់ជំនួបវគ្គជម្រុះ AFC Asian Cup 2019 នាល្ងាចថ្ងៃទី១៤ វិច្ឆិកា នៅពហុកីឡដ្ឋានជាតិ។ លោក បានចាត់ទុកការជួបក្រុមហ្ស៊កដានីជាជំនួបមួយដ៏តឹងតែងបំផុតក្នុងអាជីពជាគ្រូបង្វឹកដែលលោកធ្លាប់ដឹកនាំនាពេលកន្លងមក។ ទោះបីមិនហ៊ានរំពឹងរហូតដល់ជ័យជម្នះ តែគ្រូបង្វឹករូបនេះសង្ឃឹមបានត្រឹមលទ្ធផលស្មើដើម្បីសាងកំណត់ត្រាថ្មីសម្រាប់កម្ពុជា។
គ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា ដែលមានបទពិសោធដឹកនាំក្រុមបាល់ទាត់ជាច្រើនឆ្នាំបានចាត់ទុកការដឹកនាំក្រុមជម្រើសជាតិជាតិកម្ពុជាតទល់ជាមួយក្រុមហ្ស៊កដានីសម្រាប់ជំនួបវគ្គជម្រុះ AFC Asian Cup ជាជំនួបតានតឹងបំផុតក្នុងចំណោមការដឹកនាំរបស់លោកកន្លងមក។ តែយ៉ាងណា លោកប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពធ្វើឲ្យបានល្អក្នុងជំនួបមួយនេះ។
«ខ្ញុំអាចនិយាយបានថាការជួបក្រុមហ្ស៊កដានីជាការប្រកួតដ៏តឹងតែងបំផុតក្នុងអាជីពដែលខ្ញុំធ្លាប់ដឹកនាំតាំងពីមុនរហូតដល់ឥឡូវនេះ។ យើងដឹងហើយថា កម្រិតរបស់យើងជាមួយហ្ស៊កដានីវាខុសគ្នាប៉ុណ្ណា បើនិយាយពី World Ranking បច្ចេកទេស កម្ពស់ និងមាឌជាដើមគឺខុសគ្នាឆ្ងាយ»។ នេះជាការលើកឡើងរបស់លោក ប្រាក់ សុវណ្ណារ៉ា ក្នុងសន្និសីទសារព័ត៌មានកាលពីព្រឹកថ្ងៃទី១៣ វិច្ឆិកា នៅពហុកីឡដ្ឋានជាតិ។
ក្រោយចាញ់មីយ៉ាន់ម៉ា ២-១ ក្នុងជំនួបមិត្តភាពអន្តរជាតិកាលពីថ្ងៃទី៩ វិច្ឆិកា កន្លងទៅលោក ប្រាក់ សុវណ្ណារ៉ា ត្រូវដឹកនាំក្រុមជម្រើសជាតិកម្ពុជាលើកទី២ស្វាគមន៍ក្រុមភ្ញៀវហ្ស៊កដានីនាការប្រកួតជើងទី២វគ្គជម្រុះពូល C នៃព្រឹត្តិការណ៍ AFC Asian Cup នាម៉ោង៦:៣០នាទីល្ងាចថ្ងៃទី១៤ វិច្ឆិកា នៅពហុកីឡដ្ឋានជាតិ។ សម្រាប់ការប្រកួតជើងទី១កម្ពុជាបានប្រកួតចាញ់ហ្ស៊កដានីក្នុងលទ្ធផល ៧-០។
បច្ចុប្បន្នហ្ស៊កដានីឈរលេខរៀងទី១១៣ក្នុងតារាងចំណាត់ថ្នាក់ពិភពលោក ខណៈកម្ពុជាឈរលេខរៀង១៧០។ ហើយក្រុមនេះកំពុងឈរកំពូលតារាងប្រចាំពូល C នៃវគ្គជម្រុះ AFC Asian Cup 2019 ដោយមាន៨ពិន្ទុក្រោយ៤ប្រកួតឈ្នះ២ ស្មើ២ រីឯកម្ពុជាឈរលេខរៀងទី៣ដោយមាន៣ពិន្ទុក្រោយឈ្នះ១ ចាញ់៣។
ឆ្លើយនឹងសំនួររបស់អ្នកសារព័ត៌មានមកជាមួយក្រុមហ្ស៊កដានីដែលសួរថាក្រោយចាញ់ហ្ស៊កដានី ៧-០ តើកម្ពុជារំពឹងឈ្នះអត់សម្រាប់ជំនួបជើងទី២? លោក ប្រាក់ សុវណ្ណារ៉ា បានបញ្ជាក់ថា៖«ទោះបីដឹងថាសមត្ថភាពយើងនៅក្រោមគេក៏ដោយ តែការប្រកួតយើងនៅតែសង្ឃឹមឈ្នះជានិច្ច ការរក្សាលទ្ធផលត្រឹមស្មើក៏ជាជោគជ័យជាប្រវត្តិសាស្ត្រសម្រាប់កម្ពុជាផងដែរ»៕
Tag:
AFC Asian Cup
ប្រាក់ សុវណ្ណារ៉ា
ហ្ស៊កដានី
© រក្សាសិទ្ធិដោយ thmeythmey.com