សម្ដេច ស្នើចិន ពន្លឿនការសង់ផ្លូវល្បឿនលឿនភ្នំពេញ-ព្រះសីហនុ ដែលចំណាយទឹកប្រាក់១ពាន់លានដុល្លារ

ជាតិ

សម្ដេច ស្នើចិន ពន្លឿនការសង់ផ្លូវល្បឿនលឿនភ្នំពេញ-ព្រះសីហនុ ដែលចំណាយទឹកប្រាក់១ពាន់លានដុល្លារ

14, Nov 2017 , 10:54 am

រូបភាព

សម្ដេច ហ៊ុន សែន ជួបនាយករដ្ឋមន្រ្តីចិន លោក លី ខឹឈាង ក្រោយកិច្ចប្រជុំកំពូលអាស៊ានលើកទី៣១ និងប្រជុំពាក់ព័ន្ធ នៅទីក្រុងម៉ានីល ប្រទេសហ្វីលីពីន នៅថ្ងៃទី១៣ វិច្ឆិកា

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ស្នើឲ្យភាគីចិន ពន្លឿនការសាងសង់ផ្លូវល្បឿនលឿនពីរាជធានីភ្នំពេញ ទៅខេត្តព្រះសីហនុ ឲ្យបានឆាប់រហ័ស ដើម្បីជួយដល់ចរន្តសេដ្ឋកិច្ចរបស់ប្រទេសកម្ពុជា។ ការស្នើរបស់សម្ដេច ហ៊ុន សែន ធ្វើឡើងនៅក្នុងជំនួបទ្វេភាគីជាមួយនាយករដ្ឋមន្ត្រីចិន លោក លី ខឹឈាង ក្រោយកិច្ចប្រជុំកំពូលអាស៊ានលើកទី៣១ និងប្រជុំពាក់ព័ន្ធ នៅទីក្រុងម៉ានីល ប្រទេសហ្វីលីពីន។

ក្នុងជំនួបទ្វេរភាគីនេះ សម្ដេច ហ៊ុន សែន បានជំរុញឲ្យចិន អនុវត្តគម្រោងកសាងផ្លូវល្បឿនលឿនភ្នំពេញ-ក្រុងព្រះសីហនុ ដែលជាផ្លូវសេដ្ឋកិច្ច ដ៏សំខាន់មួយរបស់កម្ពុជា។ ឆ្លើយតបនឹងសម្ដេច ហ៊ុន សែន នាយករដ្ឋមន្ត្រីចិន លោក លី ខឹឈាង បានសន្យាថានឹងប្រឹងប្រែងអស់ពីសមត្ថភាព ក្នុងការជួយជំរុញឲ្យការកសាងផ្លូវល្បឿនលឿននេះ ឲ្យបានសម្រចទៅឆាប់រហ័ស ដើម្បីចូលរួមវិភាគទានជំរុញកំណើនសេដ្ឋកិច្ច និងលើកតម្កើងជីវភាពរស់នៅរបស់ប្រជាជនកម្ពុជា។

គម្រោងសង់ផ្លូវល្បឿនលឿនពីភ្នំពេញ ទៅខេត្តព្រះសីហនុ គឺជាជំនួយរបស់ភាគចិន ដែលគ្រោងចំណាយថវិកាជាង ១ពាន់លានដុល្លារអាមេរិក ។ ក្រៅពីនេះចិន ក៏គ្រោងជួយសាងសង់អាកាសយានដ្ឋានអន្តរជាតិខេត្តសៀមរាប ក្រោមកិច្ចសន្យាអាជីវកម្ម BOT រយៈពេល ៥៥ ឆ្នាំដែលចំណាយថវិកាជាង ៩០០លានដុល្លារអាមេរិក។ ហើយអាកាសយានដ្ឋានថ្មីនេះ ស្ថិតចម្ងាយជាង ៥០គីឡូម៉ែត្រពីតំបន់អង្គរវត្ត និងមានទំហំផ្ទៃដីប្រមាណ៧០០ហិកតា។ គម្រោងទាំងពីរនេះ ត្រូវបានរដ្ឋាភិបាលកម្ពុជា-ចិន ចុះហត្ថលេខាព្រមព្រៀងគ្នារួចរាល់ហើយ ដោយជឿជាក់ថា នឹងជំរុញកំណើនពាណិជ្ជកម្ម និងទេសចរណ៍នៅកម្ពុជានាពេលអនាគត៕