លោក ប្រាក់ សុវណ្ណារ៉ា បកស្រាយទៅនឹងយុទ្ធសាស្ត្រដែលគេហៅថា «ចតឡានក្រុង»

កីឡាជាតិ

ជាតិ

លោក ប្រាក់ សុវណ្ណារ៉ា បកស្រាយទៅនឹងយុទ្ធសាស្ត្រដែលគេហៅថា «ចតឡានក្រុង»

15, Nov 2017 , 8:39 pm

រូបភាព

ដោយ:

ទោះបីដឹងថាការប្រើប្រាស់ទម្រង់លេងការពារច្រើនធ្វើឲ្យការប្រកួតមិនសូវល្អមើល និងប៉ះពាល់អារម្មណ៍អ្នកគាំទ្រក៏ដោយ តែកាលៈទេសៈបានជំរុញឲ្យគ្រូបង្វឹកកម្ពុជាលោក ប្រាក់ សុវណ្ណារ៉ា បង្ខំចិត្តធ្វើបែបនេះ ដើម្បីស្តារស្ថានការណ៍អាក្រក់ដែលកម្ពុជាបានជួបក្នុងជើងទី១។ ការបរាជ័យ ១-០ ក្រោមថ្វីជើងហ្សកដានីអាចជាលទ្ធផលល្អប្រសើរមួយសម្រាប់កម្ពុជា ព្រោះក្រុមនេះអាចចាត់ទុកជាក្រុមខ្លាំងមួយនៅតំបន់អាស៊ី។

ក្នុងសន្និសីទសារព័ត៌មានក្រោយការប្រកួតកាលពីយប់ថ្ងៃទី១៤ វិច្ឆិកា គ្រូបង្វឹកក្រុមជម្រើសជាតិកម្ពុជាលោក ប្រាក់ សុវណ្ណារ៉ា បានសម្តែងការសោកស្តាយសម្រាប់ការបាត់បង់ឱកាសឡើងទៅវគ្គបន្តនៃព្រឹត្តិការណ៍ AFC Asian Cup ក្រោយចាញ់ហ្សកដានីក្នុងលទ្ធផល ១-០។ ទន្ទឹមនឹងការសោកស្តាយគ្រូបង្វឹករូបនេះ ក៏បានសុំទោសទស្សនិកជនផងដែរពាក់ព័ន្ធនឹងទម្រង់លេងបែបការពារច្រើនរបស់កម្ពុជា។ លោកជឿជាក់ថា បើមិនប្រើទម្រង់បែបនេះទេកម្ពុជាអាចបាត់បង់គ្រាប់បាល់ច្រើនជាងនេះ។

«ដំបូងខ្ញុំសុំទោសបងប្អូនទស្សនិកជនដែលគាំទ្រវិស័យកីឡាបាល់ទាត់ ពេលខ្លះបើយើងលេងបែបវាយបកទៅបកមកយើងអាចបាត់បង់គ្រាប់បាល់ច្រើនជាងនេះ។ ដូចយើងដឹងហើយកាលពីជើងទី១ដោយសារការវាយទៅវាយមកនេះហើយដែលធ្វើឲ្យយើងចាញ់គេ(ហ្សកដានី)រហូត ៧-០ នេះជាហេតុធ្វើឲ្យខ្ញុំសម្រេចប្រើប្រាស់ទម្រង់លេងការពារច្រើនជាងប្រយុទ្ធ»។ នេះជាការលើកឡើងរបស់ លោក ប្រាក់ សុវណ្ណារ៉ា។

ម្យ៉ាងទៀត ៤ចំណុចដែលជាគន្លឺះសំខាន់សម្រាប់ការប្រកួតបាល់ទាត់កម្ពុជាហាក់ចាញ់ប្រៀបក្រុមហ្សកដានី។ លោកបានបន្ថែមថា៖«បើយើងប្រៀបធៀបទាំង៤ចំណុច ចំណុចណាក៏យើងចាញ់គេដែរ មានតែចិត្តសាស្ត្រនិងកម្លាំងចិត្តប៉ុណ្ណោះដែលលើគេ។ ប៉ុន្តែរាងកាយយើងចាញ់គេ បច្ចេកទេសក៏ក្រោមគេ រីឯកលល្បិចនៃការប្រកួតអាចប្រហាក់ប្រហែលគ្នា។ ជាការពិតប្រសិនបើយើងប្រើទម្រង់លេងបែបការពារច្រើនវាអាចមិនសូវល្អមើលបន្តិច តែសង្ឃឹមថាអ្នកគាំទ្រនឹងយល់ពីអ្វីដែលយើងចង់ធ្វើ»។

ទោះបីក្រុមជម្រើសជាតិកម្ពុជាចាញ់ហ្សកដានី ១-០ តែលោក ប្រាក់ សុវណ្ណារ៉ា មើលឃើញថា កីឡាករកម្ពុជាធ្វើបានល្អក្នុងជំនួបមួយនេះ ហើយលោកសប្បាយចិត្តនឹងទទួលយកលទ្ធផលនេះ។ ជាមួយគ្នានេះ លោកជំរុញឲ្យកីឡាករទាំងអស់ត្រូវខិតខំបង្កើនការហ្វឹកហាត់របស់ខ្លួននៅតាមក្លិបដោយដាក់គោលដៅដណ្តើមយកជម្រើស១១នាក់ឲ្យបានសម្រាប់ការប្រកួតក្នុងក្លិប។

ដ្បិតឱកាសដឹកនាំក្រុមជម្រើសជាតិមានតែពីរប្រកួតក៏ពិតមែនតែគ្រូបង្វឹករូបនេះពេញចិត្តយ៉ាងខ្លាំងសម្រាប់ការដឹកនាំរយៈពេលខ្លីនេះទោះបីលទ្ធផលមិនល្អប្រសើរក៏ដោយ។ លើសពីនេះ លោកគាំទ្រចំពោះការសម្រេចចិត្តរបស់សហព័ន្ធកីឡាបាល់ទាត់កម្ពុជាក្នុងការស្វែងរកគ្រូបង្វឹកល្អៗដើម្បីអភិវឌ្ឍន៍កីឡាបាល់ទាត់នៅកម្ពុជា។

«ក្នុងនាមខ្ញុំជាកូនខ្មែរ ទោះបីឱកាសតិចឬច្រើនខ្ញុំសប្បាយចិត្តនឹងទទួលយកព្រោះការសម្រេចចិត្តរបស់សហព័ន្ធកីឡាបាល់ទាត់កម្ពុជាជាអាទិភាព ហើយការព្យាយាមស្វែងរកគ្រូបង្វឹករបស់សហព័ន្ធទៀតសោតក្នុងន័យដើម្បីធ្វើឲ្យខ្មែរខ្លាំង។ ខ្ញុំមិននិយាយចំពោះខ្លួនខ្ញុំផ្ទាល់នោះទេមោទកភាពគឺយើងទាំងអស់គ្នាយើងជាខ្មែរយើងអាចដឹកនាំខ្មែរបាន ទោះបីមិនឈ្នះតែអាចប្រសើរជាងមុន។ នេះជាមោទកភាពរួមសម្រាប់ក្រុមជម្រើសជាតិក៏ដូចជាទស្សនិកជន»។ នេះជាការបញ្ជាក់របស់លោក ប្រាក់ សុវណ្ណារ៉ា។

ការលះបង់ស្លាកលេខ១០របស់កីឡាករ កែវ សុខផេង ឲ្យកីឡករ គួច សុគម្ភៈ និងការមិនអន់ចិត្តរបស់កីឡាករ ច្រឹង ពលរដ្ឋ និងកីឡាករ ទិត្យ ឌីណា ដែលស្ថិតនៅក្រៅបញ្ជីក្រុមជម្រើសជាតិទាំង២៣នាក់ត្រូវបានលោក ប្រាក់ សុវណ្ណារ៉ា ចាត់ទុកជារឿងដ៏អស្ចារ្យសម្រាប់ការដឹកនាំរយៈពេលខ្លីរបស់លោក។ ហើយលោកជំរុញឲ្យកីឡាករទាំងអស់ត្រូវរក្សាទម្លាប់ល្អបែបនេះទោះបីស្ថិតក្រោមការដឹកនាំរបស់គ្រូបង្វឹករូបណាក៏ដោយ៕