អន្តរជាតិ
នយោបាយអន្តរជាតិ
ម៉ាក្រុង ប្រកាសជំនួសតំណែងអាមេរិកក្នុងការដោះស្រាយបញ្ហាប្រែប្រួលអាកាសធាតុសកល ប្រធានាធិបតី អេម៉ានុយអែល ម៉ាក្រុង នៅ German Pavilion នាសន្និសីទអង្គការសហប្រជាជាតិស្តីពីការប្រែប្រួលអាកាសធាតុ COP23 (រូបភាព៖ AFP)
× Bonn៖ ថ្លែងសុន្ទរកថានៅកិច្ចប្រជុំអាកាសធាតុនៅទីក្រុង Bonn ថ្ងៃពុធទី ១៥ វិច្ឆិកា ប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) បានប្រកាសផ្តល់លុយ ២លានដុល្លារទៅស្ថាប័នវាយតម្លៃផ្នែកវិទ្យាសាស្ត្រពាក់ព័ន្ធការប្រែប្រួលអាកាសធាតុស្ថិតក្រោមអង្គការសហប្រជាជាតិ (IPCC) ក្រោយអាមេរិកឈប់ផ្តល់ជំនួយនោះ។ លោកក៏សន្យាបន្តគោរពតាមកិច្ចព្រមព្រៀងអាកាសធាតុក្រុងប៉ារីស ជាពិសេសកម្រិតការបញ្ចេញឧស្ម័នកាបូនិចទៅបរិយាកាស។
ខណៈដែលមិនមានវត្តមានមេដឹកនាំអាមេរិក ប្រធានាធិបតីបារាំង អេម៉ានុយអែល ម៉ាក្រុង បានក្លាយជាតួឯកម្តងទៀតនៅក្នុងកិច្ចប្រជុំអង្គការសហប្រជាជាតិស្តីពីអាកាសធាតុលើកទី ២៣ (COP23) ដែលកំពុងរៀបចំឡើងនៅទីក្រុង Bonn ប្រទេសអាល្លឺម៉ង។ អ្វីដែលសំខាន់ មេដឹកនាំរូបនេះសន្យាជំនួសតំណែងអាមេរិកក្នុងនាមជាមេដឹកនាំពិភពលោកដោះស្រាយបញ្ហាប្រែប្រួលអាកាសធាតុ។
«ខ្ញុំស្នើឲ្យសហភាពអឺរ៉ុបជំនួសតំណែងអាមេរិក ហើយបារាំងនឹងប្រឹងប្រែងសម្រេច។ ខ្ញុំចង់ឲ្យបណ្តាប្រទេសអឺរ៉ុបចូលរួមជាយើង។ ដូច្នេះយើងអាចបំពេញកង្វះខាតហិរញ្ញវត្ថុជំនួសអាមេរិកបានហើយ។ ខ្ញុំអាចធានាថា IPCC នឹងមានហិរញ្ញវត្ថុគ្រប់គ្រាន់សម្រាប់បំពេញតម្រូវការរបស់ខ្លួន និងអាចជួយគាំទ្រដល់ការសម្រេចចិត្តរបស់យើងបាន។ វានឹងមិនខ្វះសូម្បីតែមួយអឺរ៉ូ»។ ប្រធានាធិបតីបារាំងបានបញ្ជាក់បេបនេះចំពោះមុខមេដឹកនាំពិភពលោក។
«ខ្ញុំសង្ឃឹមថា អឺរ៉ុបនឹងអាចជំនួសអាមេរិកក្នុងនាមជាមេដឹកនាំពិភពលោកដែលជួយដោះស្រាយបញ្ហាប្រែប្រួលអាកាសធាតុ ហើយខ្ញុំអាចប្រាប់អ្នកបានថា បារាំងត្រៀមខ្លួនរួចហើយ»។
បន្ថែមពីនេះ លោក ម៉ាក្រុងបានអំពាវនាវឲ្យសហភាពអឺរ៉ុបកំណត់ពន្ធពិសេសចំពោះភាគីឬក្រុមហ៊ុនទាំងឡាយណាដែលមិនចូលរួមអនុវត្តគោលដៅដោះស្រាយបញ្ហាប្រែប្រួលអាកាសធាតុ។ បន្ថែមពីនេះលោកក៏សន្យាដំឡើងតម្លៃកាបូនមួយតោន ៣០ អឺរ៉ូ ដើម្បីធ្វើឲ្យអ្នកវិនិយោគ និងក្រុមហ៊ុនទាំងអស់ផ្លាស់ប្តូរជំហរ និងចូលរួមដោះស្រាយបញ្ហាប្រែប្រួលអាកាសធាតុផង។
អនុលោមតាម កិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ បណ្តាប្រទេសហត្ថលេខីសន្យាសម្រេចឲ្យបាននូវការកម្រិតសីតុណ្ហភាពមិនឲ្យកើនលើស ២ អង្សាសេត្រឹមឆ្នាំ ២១០០ និងធានាប្រមែប្រមូលឲ្យបានហិរញ្ញវត្ថុ ១០០ ពាន់លានដុល្លារក្នុងមួយឆ្នាំនៅត្រឹមឆ្នាំ ២០២០ដើម្បីដោះស្រាយបញ្ហាគ្រោះមហន្តរាយធម្មជាតិនេះ៕
Tag:
អេម៉ានុយអែល ម៉ាក្រុង
IPCC
Bonn
COP23
© រក្សាសិទ្ធិដោយ thmeythmey.com