ជាតិ
សង្គមជាតិ
អាមេរិក បន្តរយៈពេលផ្តល់ជំនួយដល់CMAC លោក ហេង រតនា អគ្គនាយកCMAC (រូបពីហ្វេសប៊ុកCMAC Cambodia)
× ភ្នំពេញ៖ អង្គការស៊ីម៉ាក់ នឹងទទួលបានជំនួយរយៈពេល២ខែទៀត នៅដើមឆ្នាំ២០១៨ ។ នេះបើតាមលោក ហេង រតនា អគ្គនាយកស៊ីម៉ាក ដែលបានថ្លែងប្រាប់សារព័ត៌មានថ្មីៗបន្តថា អាមេរិក បន្តជំនួយរយៈពេល២ខែនេះ គឺដើម្បីឲ្យស៊ីម៉ាករៀបចំឯកសារដេញថ្លៃយកជំនួយរយៈពេលវែង។
សហរដ្ឋអាមេរិក សម្រេចបន្តផ្តល់ជំនួយដល់មជ្ឈមណ្ឌលកម្ចាត់មីនកម្ពុជា សម្រាប់រយៈពេល២ខែនៅដើមឆ្នាំ២០១៨ ដើម្បីទុកពេលឲ្យស្ថាប័ននេះ រៀបចំឯកសារដេញថ្លៃយកជំនួយរយៈពេលវែង។ នេះបើតាមលោក ហេង រតនា អគ្គនាយក CMAC បញ្ជាក់ប្រាប់សារព័ត៌មានថ្មីៗ ដោយយោងតាមលិខិតពីស្ថានទូតអាមេរិក ដែលលោកទទួលបានកាលពីរសៀលថ្ងៃទី១៥ ខែវិច្ឆិកា។ អគ្គនាយក CMAC ថ្លែងប្រាប់សារព័ត៌មាថ្មីៗដូច្នេះថា៖«ជំនួយរយៈពេលខ្លីៗ(២-៣ខែ)នេះ គេហៅថាជំនួយចម្លងទៅរកជំនួយរយៈពេលវែង។ នេះជានីតិវិធីរបស់អាមេរិ ហើយនីតិវិធីនេះភាគីអាមេរិកក៏ធ្លាប់ធ្វើកន្លងមកដែរ មុនពេលផ្តល់ជំនួយឲ្យមកស៊ីម៉ាក»។
អគ្គនាយក CMAC បានថ្លែងស្វាគមន៍ ចំពោះការបន្តផ្តល់ជំនួយនេះ និងសុំការគាំទ្រការផ្តល់ជំនួយរយៈពេលវែង ពីភាគីអាមេរិក ក្នុងភាពជាដៃគូជាមួយកម្ពុជា ដើម្បីឲ្យស្ថាប័នជំនាញនេះ រៀបចំពេលវេលា និងផែនការយុទ្ធសាស្ត្រជាក់លាក់ដើម្បីដោះគ្រាប់យុទ្ធភណ្ឌឲ្យអស់ពីទឹកដីកម្ពុជា។ លោក បន្ថែមដូច្នេះ៖«យើងចង់បានការកំណត់ការផ្តល់ជំនួយជាក់លាក់ ពីព្រោះការងារដោះមីននេះ យើងត្រូវមានផែនការយុទ្ធសាស្ត្រច្បាស់លាស់ ហើយយើងក៏ចង់ពន្លឿនការដោះស្រាយបញ្ហាមីននេះ ដើម្បីកុំឲ្យប្រជាពលរដ្ឋមានការភ័យខ្លាចបន្តទៀត»។
តាមលោក ហេង រតនា ភាគីអាមេរិកមិនបញ្ជាក់ពីទំហំទឹកប្រាក់ជំនួយនោះទេ ប៉ុន្តែបើផ្អែកលើជំនួយបច្ចុចប្បន្ន ដែលស៊ីម៉ាកទទួលបានពីសហរដ្ឋាអាមេរិក ចំនួន២គម្រោង មានទឹកប្រាក់ជាង៣៥ម៉ឺនដុល្លារ ហើយលោក ក៏រំពឹងថាជំនួយរយៈពេល២ខែទៀតនេះ មានទំហំប្រមាណ៣៥ម៉ឺនដុល្លារនេះដែរ។
សូមបញ្ជាក់ថា កាលពីដើមសប្តាហ៍មុន សហរដ្ឋអាមេរិកបានប្រកាសផ្តាច់ជំនួយដល់អង្គការស៊ីម៉ាក ដែលការផ្តាច់ជំនួយនេះ ជាគោលនយោបាយកាត់បន្ថយចំណាយក្រសួងការបរទេសរបស់រដ្ឋបាលលោក ដូណាល់ ត្រាំ។ យ៉ាងណាបើគោលនយោបាយនេះ ត្រូវអនុម័តមែននៅចុងឆ្នាំ២០១៧នេះ រាជរដ្ឋាភិបាលកម្ពុជា នឹងធានារ៉ាប់រងផ្ដល់ជំនួយជំនួសអាមេរិក ក្នុងការបោសសម្អាតសំណល់ជាតិផ្ទុះពីសង្គ្រាមអាមេរិក។ ជំនួយរបស់អាមេរិក ផ្តល់ដល់ស៊ីម៉ាកក្នុងមួយឆ្នាំៗ មានទឹកប្រាក់ពី២លាន ទៅ២,១ លានដុល្លារ។ នេះបើតាម អគ្គនាយកស៊ីម៉ាកដដែល។
គួរបញ្ជាក់ថា អាមេរិកបានទម្លាក់គ្រាប់បែកប្រមាណ ២លាន ៧សែនតោន ក្នុងអំឡុងសង្គ្រាមនាទសវត្ស១៩៧០ រវាងកងទ័ពសាធារណរដ្ឋកម្ពុជា ដែលគាំទ្រដោយសហរដ្ឋអាមេរិក និងកងទ័ពតស៊ូរបស់ខ្មែរក្រហម ក្រោយពេលពួកគេធ្វើរដ្ឋប្រហារទម្លាក់សម្តេច នរោត្តម សីហនុ នាថ្ងៃទី១៨ ខែមីនា ឆ្នាំ១៩៧០៕
Tag:
CMAC
ជំនួយ
គ្រាប់បែក
© រក្សាសិទ្ធិដោយ thmeythmey.com