ជាតិ
នយោបាយជាតិ
អាសនៈ CNRP នឹងត្រូវបែងចែកក្នុងរយៈពេល២សប្តាហ៍យ៉ាងយូរ
× ក្រោយតុលាការកំពូលប្រកាសរំលាយគណបក្សសង្គ្រោះជាតិបានជាងមួយម៉ោងរួចមក ប្រមុខរាជរដ្ឋាភិបាលកម្ពុជា បានថ្លែងតាមរយៈវីដេអូ ដែលបានផ្សាយតាមបណ្តាញទូរទស្សន៍ ធំៗក្នុងស្រុក និងតាមទំព័រហ្វេសប៊ុក ដោយពន្យល់ថា អាសនៈរបស់ CNRP នឹងត្រូវបែងចែក យ៉ាងយូរក្នុងរយៈពេល២សប្តាហ៍ខាងមុខ។
អាសនៈរបស់គណបក្សសង្គ្រោះជាតិ នឹងត្រូវបែងចែកទៅគណបក្សផ្សេង យ៉ាងយូរ២សប្តាហ៍ទៀត ទាំងអាសនៈក្នុងរដ្ឋសភា និងក្រុមប្រឹក្សាឃុំ-សង្កាត់។ នេះបើតាមប្រសាសន៍របស់នាយករដ្ឋមន្ត្រី នៅយប់ថ្ងៃទី១៦ វិច្ឆិកានេះ។ ក្រៅពីប្រកាសអំពីកាលបរិច្ឆេទកំណត់ថ្ងៃបែងចែកអាសនៈបក្សសង្គ្រោះជាតិហើយនោះ សម្តេច ហ៊ុន សែន ក៏មិនភ្លេចបន្តអំពាវនាវដល់សកម្មជនបក្សសង្គ្រោះជាតិ ឱ្យចូលរួមក្នុងគណបក្សនយោបាយរបស់សម្តេចដែរ។ សម្តេចបញ្ជាក់ថា ឱកាសនៅមានសម្រាប់សកម្មជនគណបក្សសង្គ្រោះជាតិ មុនថ្ងៃបែងចែកអាសនៈ ហើយពួកគេអាចនៅរក្សាដំណែងរបស់ខ្លួនគេជាដដែល។
យ៉ាងណាក៏ដោយ បើតាមប្រសាសន៍របស់សម្តេច ហ៊ុន សែន ឱកាសនេះ សម្រាប់តែសមាជិកបក្សសង្គ្រោះជាតិ ដែលមិនស្ថិតក្នុងបញ្ជីឈ្មោះ ដែលតុលាការសម្រេចផ្អាកសកម្មភាពនយោបាយរយៈពេល៥ ឆ្នាំតែប៉ុណ្ណោះ។
គួររម្លឹកថា នៅរសៀលថ្ងៃទី១៦ វិច្ឆិកានេះ តុលាការកំពូលបានសម្រេចរំលាយបក្សប្រឆាំង ក្រោមហេតុផលថា គណបក្សសង្គ្រោះជាតិ ពិតជាបានឃុបឃិតជាមួយបរទេស ក្នុងគោលបំណងចង់ផ្ដួលរំលំរដ្ឋាភិបាល ដែលជាបដិវត្តពណ៌ ខុសច្បាប់រដ្ឋធម្មនុញ្ញនៃប្រទេសកម្ពុជា។ ក្រៅពីរំលាយគណបក្សប្រឆាំងនេះ តុលាការកំពូលក៏សម្រេចផ្អាកសកម្មភាពថ្នាក់ដឹកនាំនយោបាយរបស់គណបក្ស ចំនួន១១៨នាក់ ក្នុងរយៈពេល៥ឆ្នាំ តាមសំណើរបស់ក្រសួងមហាផ្ទៃផងដែរ ។ តុលាការបិទផ្លូវតវ៉ាលើករណីនេះ ដោយដាក់ឲ្យអនុវត្តសាលដីកា ចាប់ពីថ្ងៃទី១៦ វិច្ឆិកា តទៅ៕
© រក្សាសិទ្ធិដោយ thmeythmey.com