កីឡាអន្តរជាតិ
ជាតិ
នយោបាយជាតិ
មួយថ្ងៃក្រោយតុលាការរំលាយ CNRP សភាបន្តសម័យប្រជុំធម្មតារបស់ខ្លួន
× តំណាងរាស្ត្រគណបក្សប្រជាជនកម្ពុជា ចំនួន៦៥រូប បន្តសម័យប្រជុំរបស់ខ្លួន ពោលគឺត្រឹមតែមួយថ្ងៃប៉ុណ្ណោះបន្ទាប់ពីគណបក្សសង្គ្រោះជាតិដែលបានឈ្នះកៅអីចំនួន៥៥ពីការបោះឆ្នោត ត្រូវរំលាយដោយសាលដីកាតុលាការកំពូល។
កិច្ចប្រជុំសភា ដែលមានការចូលរួមពីសំណាក់សម្តេចនាយករដ្ឋមន្ត្រី ហ៊ុន សែន ផងដែរនោះ ផ្តោតលើរបៀបវារៈសំខាន់ចំនួន៣ គឺ ការបោះឆ្នោតជ្រើសតាំងសមាជិកបន្ថែមចំនួន០២រូប សម្រាប់គណៈកម្មាធិការនានានៃរដ្ឋសភា ការពិភាក្សា និងអនុម័តសេចក្ដីព្រាងច្បាប់ស្ដីពី ហិរញ្ញវត្ថុ សម្រាប់ការគ្រប់គ្រងឆ្នាំ២០១៨ និងការពិភាក្សា និងអនុម័តសេចក្ដីព្រាងច្បាប់មួយចំនួនទៀត។
សេចក្តីព្រាងច្បាប់ផ្សេងទៀតដែលត្រូវពិភាក្សា និងអនុម័តនោះ មានដូចជាកិច្ចព្រមព្រៀងរវាងកម្ពុជា និងសឹង្ហបុរី ស្ដីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។ កិច្ចព្រមព្រៀងរវាងកម្ពុជា និង ចិន ស្ដីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។ កិច្ចព្រមព្រៀងរវាងកម្ពុជា និងប្រ៊ុយណេ ស្ដីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល ។ កិច្ចព្រមព្រៀងរវាង កម្ពុជា និង ថៃ ស្ដីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល ។
ការពិភាក្សា និងអនុម័តសេចក្ដីព្រាងច្បាប់ស្ដីពី ការទូទាត់ថវិកាទូទៅ របស់រដ្ឋសម្រាប់ការគ្រប់គ្រងឆ្នាំ២០១៦ ក៏ជារបៀបវារៈនៃកិច្ចប្រជុំផងដែរ។
នេះអាចចាត់ទុកជាថ្ងៃដំបូងនៃដំណើរការកិច្ចប្រជុំសភា ដោយមិនចាំបាច់រង់ចាំមើលវត្តមានតំណាងរាស្ត្រគណបក្សសង្គ្រោះជាតិ ដែលស្ថិតក្នុងចំណោមមន្ត្រីជាន់ខ្ពស់ CNRP ១១៨រូប ដែលតុលាការកំពូលពិន័យមិនឲ្យធ្វើនយោបាយ៥ឆ្នាំ៕
© រក្សាសិទ្ធិដោយ thmeythmey.com