កីឡាអន្តរជាតិ
ជាតិ
នយោបាយជាតិ
សភាជាន់ទាប និងជាន់ខ្ពស់ថា តុលាការកំពូលបានអនុវត្តតាមគោលការណ៍នីតិរដ្ឋ សម្តេច ហេង សំរិន ប្រធានរដ្ឋសភា (ឆ្វេង) និងសម្តេច សាយ ឈុំ ប្រធានព្រឹទ្ធសភា
× ព្រឹទ្ធសភា និងរដ្ឋសភារបស់កម្ពុជា បានចេញសេចក្តីថ្លែងការណ៍រៀងៗខ្លួន ដោយបង្ហាញជំហរគាំទ្រសាលដីកាតុលាការកំពូលកាលពីថ្ងៃទី១៦ ខែវិច្ឆិកា ក្នុងការរំលាយគណបក្សសង្គ្រោះជាតិ និងហាមឃាត់ការធ្វើនយោបាយរយៈពេល៥ឆ្នាំរបស់មន្ត្រីជាន់ខ្ពស់ CNRP ១១៨រូប។
ស្ថាប័ននីតិបញ្ញត្តិទាំងពីរ បានបញ្ជាក់ពីការយកចិត្តទុកដាក់របស់ខ្លួនក្នុងការតាមដានដំណើរសវនាការជំនុំជម្រះរបស់តុលាការកំពូល តាមបណ្តឹងរបស់ក្រសួងមហាផ្ទៃ ដែលចោទប្រកាន់គណបក្សសង្គ្រោះជាតិ ពាក់ព័ន្ធនឹងអំពើក្បត់ជាតិ។
«សាលដីកានេះ នឹងពង្រឹងពង្រីកស្មារតីគោរព និងអនុវត្តតាមរដ្ឋធម្មនុញ្ញ និងច្បាប់ជាធរមានរបស់រដ្ឋ ស្របតាមគោលការណ៍នីតិរដ្ឋ និងលទ្ធិប្រជាធិបតេយ្យ សេរីពហុបក្ស»។ នេះជាការគូសបញ្ជាស់របស់ សម្តេច សាយ ឈុំ ប្រធានព្រឹទ្ធសភា ដោយអះអាងថា សាលដីកាតុលាការជាន់ខ្ពស់កាលពីម្សិលមិញ ជាដំណាក់កាលប្រវត្តិសាស្ត្ររបស់កម្ពុជា។
សម្តេច សាយ ឈុំ ដែលជាអនុប្រធានគណបក្សប្រជាជនកម្ពុជាផងដែរនោះ បានអះអាងថា៖ «ព្រឹទ្ធសភា ចាត់ទុកថា អ្នកនយោបាយ និងគណបក្សដែលដាក់ខ្លួនបម្រើផលប្រយោជន៍បរទេស ពិតជាធ្វើឲ្យខូចខាតដល់ផលប្រយោជន៍របស់ប្រជាជាតិខ្មែរយ៉ាងធ្ងន់ធ្ងរបំផុត»។
ក្នុងអត្ថន័យស្រដៀងគ្នា រដ្ឋសភាដែលដឹកនាំដោយសម្តេច ហេង សំរិន បានលើកឡើងថា តុលាការកំពូលជាស្ថាប័ន មានសមត្ថកិច្ចតែមួយគត់ក្នុងការសម្រេចសេចក្តីរំលាយគណបក្សណាមួយដែលប្រព្រឹត្តផ្ទុយនឹងរដ្ឋធម្មនុញ្ញ រួមទាំងច្បាប់ស្តីពីគណបក្សនយោបាយ និងច្បាប់ពាក់ព័ន្ធនានា។
តាមរយៈសេចក្តីថ្លែងការណ៍របស់ខ្លួន រដ្ឋសភា បានអះអាងថា ស្ថាប័ននីតិបញ្ញត្តិមួយនេះនៅតែបន្តបំពេញតួនាទីស្របតាមរដ្ឋធម្មនុញ្ញ ច្បាប់ និងបទបញ្ជាផ្ទៃក្នុងរដ្ឋសភា ជានិច្ច។
ជាមួយគ្នា គ្រប់បណ្តាស្ថាប័នរដ្ឋ សុទ្ធតែបានបង្ហាញជំហររបស់ខ្លួនក្នុងការគាំទ្រ សាលដីកាតុលាការកំពូលកាលពីថ្ងៃទី១៦ ខែវិច្ឆិកា លើការរំលាយគណបក្សសង្គ្រោះជាតិ និងការហាមឃាត់សិទ្ធិនយោបាយ៥ឆ្នាំរបស់មន្ត្រីជាន់ខ្ពស់១១៨រូបរបស់គណបក្សមួយនេះ៕
Tag:
រដ្ឋសភា
ព្រឹទ្ធសភា
CNRP
តុលាការកំពូល
© រក្សាសិទ្ធិដោយ thmeythmey.com