កីឡាជាតិ
ជាតិ
ស្វាយរៀងត្រូវការឈ្នះដើម្បីដណ្តើមកំពូលតារាង ខណៈទ័ពត្រូវការឈ្នះដើម្បីរក្សាតំបន់Top 4
× ក្រោយបឹងកេតឡើងឈរកំពូលតារាងបណ្តោះអាសន្ន ក្រុមព្រះខ័នរាជស្វាយរៀង ត្រូវការឈ្នះក្រុមមជ្ឈមណ្ឌលកំចាត់មីនកម្ពុជា(ស៊ីម៉ាក់) នៅល្ងាចនេះ ដើម្បីបន្តឈរកំពូលតារាង ក្នុងសប្តាហ៍ទី២០។ ជាមួយគ្នានេះ ក្រុមក្រសួងការពារជាតិ ក៏ត្រូវការឈ្នះគីរីវង់សុខសែនជ័យដែរ ក្នុងការរក្សាតំបន់ Top 4 របស់ខ្លួន។ ចំណែកក្រុមខេមបូឌានថាយហ្គឺរ ត្រូវបើកទ្វារកីឡដ្ឋានខេត្តសៀមរាប ស្វាគមន៍ ក៏ដូចជាសងសឹក អគ្គស្នងការនគរបាលជាតិ(ប៉ូលិស)។
ក្រុមព្រះខ័នរាជស្វាយរៀង ត្រូវបើកទ្វារកីឡដ្ឋានខេត្តស្វាយរៀង ស្វាគមន៍ក្រុមភ្ញៀវស៊ីម៉ាក់ នៅម៉ោង៦ល្ងាច ថ្ងៃអាទិត្យ ទី១៩ វិច្ឆិកា នេះ។ សម្រាប់ការស្វាគមន៍នេះដែរ ក្រុមព្រះខ័នរាជស្វាយរៀងត្រូវការឈ្នះស៊ីម៉ាក់ដាច់ខាត ដើម្បីបាន៣ពិន្ទុ ឡើងទៅឈរកំពូលតារាងបណ្តោះអាសន្ន ប្រចាំសប្តាហ៍ទី២០ នៃពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧។ នាការប្រកួតជើងទី១ ព្រះខ័នរាជស្វាយរៀង បានលត់ស៊ីម៉ាក់ក្នុងលទ្ធផល ៧-០។
ជាមួយគ្នានេះ ក្រុមឈរលេខរៀងទី៤ ក្រសួងការពារជាតិ ក៏ត្រូវការឈ្នះគីរីសុខសែនជ័យដាច់ខាតដែរដើម្បីពង្រឹងទីតាំងរបស់ខ្លួន សម្រាប់ការបើកទ្វារកីឡដ្ឋានស្តាតចាស់ ស្វាគមន៍ក្រុមភ្ញៀវ ដែលខ្លួនធ្លាប់យកឈ្នះ ២-០ ក្នុងជើងទី១ នាម៉ោង៦ល្ងាចនេះ។ តែយ៉ាងណា សម្រាប់ការប្រកួតនេះ ទ័ពអាចមានប្រៀបខ្ពស់ ក្នុងការយកឈ្នះ ព្រោះគីរីសុខសែនជ័យ ជាក្រុមឈរបាតតារាង ដែលមិនធ្លាប់ស្គាល់ជ័យ ជម្នះ។
មុនការប្រកួតរវាងពីរគូខាងលើ ក្រុមខេមបូឌានថាយហ្គឺរ ត្រូវបើកទ្វារកីឡដ្ឋានខេត្តសៀមរាប សងសឹកក្រុមអគ្គស្នងការនគរបាលជាតិ ដែលពួកគេបានចាញ់ ៥-២ ក្នុងជើងទី១ នាវេលាម៉ោង៣:៣០នាទីនេះ៕
Tag:
បាល់ទាត់
ទ័ព
ស្វាយរៀង
Cambodian League 2017
© រក្សាសិទ្ធិដោយ thmeythmey.com