មេទ័ពនុយក្លេអ៊ែរអាមេរិក៖ យោធានឹងមិនស្ដាប់បញ្ជាលោក ត្រាំ បើសិនជាបញ្ជាខុសច្បាប់

អន្តរជាតិ

មេទ័ពនុយក្លេអ៊ែរអាមេរិក៖ យោធានឹងមិនស្ដាប់បញ្ជាលោក ត្រាំ បើសិនជាបញ្ជាខុសច្បាប់

19, Nov 2017 , 8:59 pm

រូបភាព

ឧត្តមសេនីយ៍ John Hyten មេបញ្ជាកម្លាំងយុទ្ធសាស្រ្តអាមេរិកដែលគ្រប់គ្រងនុយក្លេអ៊ែរទាំងអស់ (រូបភាព៖ Reuters)

ដោយ: តន ចាន់រិទ្ធារ៉ា

ការប្រើប្រាស់ពាក្យសម្ដីគំរាមខ្លាំងៗនាពេលកន្លងមករបស់ប្រធានាធិបតី ដូណាល់ ត្រាំ ធ្វើឲ្យគេបារម្ភថា សង្គ្រាមនុយក្លេអ៊ែរអាចផ្ទុះឡើងដោយចៀសមិនរួច ព្រោះជាប្រធានាធិបតីលោក ត្រាំ ជាអ្នកកាន់សោរនុយក្លេអ៊ែរតែម្ដង។ ប៉ុន្តែមេបញ្ជាការកម្លាំងនុយក្លេអ៊ែររបស់អាមេរិក បានអះអាងថា បញ្ជាវាយប្រហារនុយក្លេអ៊ែររបស់លោក ត្រាំ នឹងត្រូវបដិសេធ បើសិនវាជាបញ្ជាខុសច្បាប់ ដ្បិតកងទ័ពមិនមែនអង្គុយស្ដាប់តាមបញ្ជាប្រធានាធិបតីឡើយ។

ក្នុងសប្ដាហ៍នេះ នៅឯវិមានកាពីតូល ព្រឹទ្ធសភាអាមេរិកបានជជែកដេញដោលគ្នាខ្លាំងលើសិទ្ធិធ្វើសង្គ្រាមនុយក្លេអ៊ែររបស់ប្រធានាធិបតី ដូណាល់ ត្រាំ ខណៈដែលភាពតានតឹងជាមួយកូរ៉េខាងជើងលើកម្មវិធីនុយក្លេអ៊ែរ អាចបែកផ្កាភ្លើងក្លាយជាសង្គ្រាមមែននោះ។ សមាជិកព្រឹទ្ធសភាអាមេរិក ទាំងក្រុមប្រជាធិបតេយ្យ ទាំងក្រុមសាធារណរដ្ឋ សុទ្ធតែមានមន្ទិលលើបញ្ហានេះ ព្រោះលោក ត្រាំ មានអំណាចខ្លាំងលើបញ្ហានេះក្នុងនាមជាអគ្គបញ្ជាការកំពូលកងទ័ពអាមេរិក។

ស្របពេលអ្នកនយោបាយអាមេរិកកំពុងជជែកគ្នា មេទ័ពនុយក្លេអ៊ែរអាមេរិក គឺឧត្តមសេនីយ៍ John Hyten និយាយថា លោកនឹងមិនស្ដាប់បញ្ជារបស់លោក ត្រាំ ទាំងងងឹតងងល់ឡើយ។ លោក John Hyten គឺជាមេបញ្ជាការកម្លាំងយុទ្ធសាស្ត្រ (STRATCOM) ដែលគ្រប់គ្រងលើអាវុធនុយក្លេអ៊ែររបស់អាមេរិកទាំងអស់ ពោលគឺយន្តហោះទម្លាក់គ្រាប់បែកយុទ្ធសាស្ត្រ មីស៊ីលអន្តរទ្វីបបំពាក់នុយក្លេអ៊ែរ និងមីស៊ីលអន្តរទ្វីបបំពាក់លើនាវាមុជទឹក។

អំឡុងពេលចូលរួមវេទិកាសន្តិសុខអន្តរជាតិនៅកាណាដានៅថ្ងៃទី១៨ ខែវិច្ឆកា លោកឧត្តមសេនីយ៍ Hyten បានលើកឡើងពីច្បាប់សង្គ្រាមដែលហាមឃាត់ការប្រើប្រាស់កម្លាំងហួសហេតុដើម្បីឆ្លើយតបការវាយប្រហាររបស់សត្រូវ និងការបង្ករបួសដោយមិនចាំបាច់។ បើតាមសារព័ត៌មាន RT លោក Hyten បញ្ជាក់ថា បញ្ហាទាំងនេះ គឺជាកត្តាសំខាន់ក្នុងការសម្រេចចិត្តចុចប៊ូតុងនុយក្លេអ៊ែរ ដែលមិនមែនជារឿងសាមញ្ញឡើយ។

ឆ្លៀតឱកាសនោះ ឧត្តមសេនីយ៍អាមេរិករូបនេះក៏ពន្យល់ពីដំណាក់កាលមុនឈានដល់ការប្រើប្រាស់នុយក្លេអ៊ែរ។ «ក្នុងនាមជាមេបញ្ជាការ STRATCOM ខ្ញុំមានតួនាទីផ្ដល់យោបល់ឲ្យប្រធានាធិបតី ឯគាត់ចេញបញ្ជាថាត្រូវធ្វើអ្វី។ ប្រសិនបើជាបញ្ជាខុសច្បាប់ ខ្ញុំនឹងប្រាប់វីញថា លោកប្រធានាធិបតី នេះជាបញ្ជាខុសច្បាប់។ ហើយយើងនឹងមានជម្រើសផ្សេងទៀតដើម្បីឆ្លើយតបស្ថានការណ៍ទាំងអស់។ វាមិនមែនជារឿងស្មុគស្មាញឡើយ»។ នេះជារៀបរាប់របស់លោក Hyten ។

ប្រមុខកម្លាំងនុយក្លេអ៊ែរអាមេរិកដដែលនេះ ក៏បានបង្ហើបដែរថា យោធាអាមេរិកបានត្រៀមខ្លួនរួចស្រេចដើម្បីស្ដាប់បញ្ជាដ៏កម្រនេះពីមាត់លោក ត្រាំ ។ លោកឧត្តមសេនីយ៍ Hyten សង្កតធ្ងន់ថា យើងមិនមែនជាមនុស្សល្ងង់ទេ ហើយយើងបានគិតជាច្រើនណាស់លើបញ្ហានេះ ព្រោះជាអ្នកទទួលខុសត្រូវ យើងត្រូវតែគិតដល់សេណារីយ៉ូបែបនេះ៕