ក្រុមអ្នកវិភាគកីឡាបាល់ទាត់នៅអង់គ្លេសសរសើរ Manchester City ថាលេងបាល់បានល្អបំផុតក្នុងប្រវត្តិសាស្ត្របាល់ទាត់នៃក្របខណ្ឌ Premier League សម្រាប់ការបង្ហាញខ្លួននៅរដូវកាលថ្មីនេះ។
«ពួកគេកំពុងលេងបាល់ទាត់ល្អបំផុតក្នុងប្រវត្តិសាស្ត្របាល់ទាត់នៃក្របខណ្ឌកំពូលអង់គ្លេស។ ខ្ញុំគិតថាយើងកំពុងសម្លឹងមើលក្រុមដែលបង្ហាញខ្លួនល្អឥតខ្ចោះក្នុងរដូវកាលនេះ»។ នេះជាការលើកឡើងរបស់លោក Garth Crooks អ្នកវិភាគរបស់ BBC ដែលសរសើរក្រុម Manchester City បន្ទាប់ពីពួកគេបានយកឈ្នះ Leicester City ២-០ នាកាប្រកួតក្របខណ្ឌ Premier League កាលពីថ្ងៃសៅរ៍ទី១៨ ខែវិច្ឆិកា ដែលជាជ័យជម្នះទី១៦ជាប់ៗគ្នា និងការចាប់ផ្តើមដ៏ល្អបំផុតនៅក្នុងរដូវកាល ២០១៧-២០១៨នេះ។
Garth Crooks អ្នកវិភាគកីឡាបាល់ទាត់របស់ BBC
ចំណែក អតីតសមាជិកក្រុម Arsenal លោក Martin Keown ដែលធ្លាប់ឆ្លងកាត់ការប្រកួតមិនដែលចាញ់ជាមួយក្រុមនេះកាលពីរដូវកាល ២០០៣-២០០៤ ជឿជាក់ថាកូនក្រុមរបស់លោក Pep Guardiola អាចនឹងប្រៀបធៀបជាមួយក្រុមកាំភ្លើងធំបាន។
លោក Martin Keown អតីតខ្សែការាពារ Arsenal
អតីតខ្សែការពារជម្រើសជាតិអង់គ្លេស វ័យ៥១ឆ្នាំរូបនេះ បានប្រាប់ Football Focus ថា៖« «ខ្ញុំរីករាយណាស់ដែលបានចូលរួមជាមួយក្រុមដែលប្រកួតមិនចាញ់សោះក្នុងមួយរដូវកាល។ ខ្ញុំសង្ឃឹមថា Man City នឹងមិនធ្វើនោះទេ ប៉ុន្តែយ៉ាងណា ពួកគេហាក់ដូចជាដើរផ្លូវនេះហើយ។ ខ្ញុំមិនដឹងថា តើក្រុមមួយណានឹងបញ្ឈប់ភាពមិនដែលចាញ់របស់ពួកគេបាននោះទេ»។
ដោយឡែក អ្នកចាត់ការថ្មី Leicester លោក Claude Puel ក្រោយដឹកនាំក្រុមចាញ់ ២-០ ក្នុងផ្ទះខ្លួនឯង ក៏បានហៅក្រុមរហស្សនាមមេឃខៀវនេះថាជាក្រុមល្អបំផុតនៅអឺរ៉ុបផងដែរ។
លោក Claude Puel អ្នកចាត់ការក្រុម Leicester ដែលសរសើរ Man City ថាក្រុមល្អបំផុតនៅអឺរ៉ុប
សូមបញ្ជាក់ថា ការប្រកួតពានលំដាប់ទី១អង់គ្លេស បានឆ្លងកាត់ការប្រកួតសប្តាហ៍ទី ១២ហើយ។ ក្នុងនោះក្រុមដែលដឹកនាំដោយអ្នកចាត់ការទូទៅសញ្ជាតិអេស្ប៉ាញ វ័យ៤៦ឆ្នាំ បានជួយក្រុមដែលមានមូលដ្ឋានក្នុងទីក្រុង Manchester ឈរនៅកំពូលតារាងមាន៣៤ពិន្ទុ បន្ទាប់ពីប្រកួតឈ្នះ១១លើក និងស្មើ១លើកមិនស្គាល់ចាញ់ នាំមុខក្រុមលេខ២ Manchester United ដល់ទៅ៨ពិន្ទុ៕