អន្តរជាតិ
នយោបាយអន្តរជាតិ
ស៊ីមបាវ៉េ៖ អនាគតប្រធានាធិបតីដែលមានរហស្សនាមថា «ក្រពើ» វិលចូលស្រុកវិញ លោក Emmerson Mnangagwa ដែលមានរហស្សនាមថា ក្រពើ។ រូបថត AFP
× អតីតអនុប្រធានាធិបតីស៊ីមបាវ៉េ Emmerson Mnangagwa ត្រឡប់ចូលស្រុកវិញនៅថ្ងៃទី២២ ខែវិច្ឆិកា ដើម្បីត្រៀមចូលកាន់តំណែងប្រធានាធិបតី ជំនួសលោក រ៉ូបឺត មូហ្កាបេ ដែលលាលែងមួយថ្ងៃមុននេះ។ លោក Mnangagwa បានភៀសខ្លួនទៅកាន់បរទេស ក្រោមហេតុផលសុវត្ថិភាពផ្ទាល់ខ្លួន ក្រោយត្រូវលោក មូហ្កាបេ បណ្ដេញចេញពីតំណែង ដោយចោទប្រកាន់ថា មិនស្មោះត្រង់ចំពោះប្រធានាធិបតី។
មន្ត្រីបក្សកាន់អំណាចស៊ីមបាវ៉េ Zanu-PF បាននិយាយថា លោក Emmerson Mnangagwa ដែលកំពុងភៀសខ្លួននៅក្រៅប្រទេស នឹងធ្វើដំណើរចូលស្រុកវិញ ដើម្បីត្រៀមស្បថចូលកាន់តំណែងជាប្រធានាធិបតីថ្មី។ លោក Larry Mavhima សម្ព័ន្ធមិត្តរបស់អតីតប្រធានាធិបតីរូបនេះ និយាយថា លោក Mnangagwa អាចទៅដល់ស៊ីមបាវ៉េនៅថ្ងៃទី២២ ខែវិច្ឆិកា គឺមួយថ្ងៃក្រោយមេដឹកនាំចាស់វស្សា រ៉ូបឺត មូហ្កាបេ ចុះចេញពីតំណែង។
មានរហស្សនាមថា «ក្រពើ» លោក Mnangagwa ដែលរត់គេចទៅបរទេសក្រោយត្រូវលោក មូហ្កាបេ បញ្ឈប់ពីតំណែង រំពឹងថានឹងស្បថចូលកាន់តំណែងនៅថ្ងៃទី២២ ខែវិច្ឆិកា ឬថ្ងៃទី២៣ តែម្ដង។ លោកក៏មានភារៈដឹកនាំបក្ស Zanu-PF ចូលរួមក្នុងការបោះឆ្នោតទូទៅឆ្នាំ២០១៨ ដែរ។ លោក Mnangagwa ទទួលបានការគាំទ្រច្រើនពីសមាជិកបក្ស និងក្រុមយោធា ដែលក្រុមនេះហើយជាអ្នកបញ្ចប់ការកាន់អំណាចរយៈពេលជិតបួនទសវត្សរ៍របស់លោក មូហ្កាបេ នោះ។
ការលាលែងរបស់លោក មូហ្កាបេ កើតចេញពីមហិច្ឆតាដែលចង់ឲ្យប្រពន្ធរបស់ខ្លួនបន្តតំណែង និងបានមើលរំលងមន្ត្រីជើងចាស់ដែលធ្លាប់តស៊ូជាមួយគ្នាសម័យសង្គ្រាមដណ្ដើមឯករាជ្យពីអាណានិគមអង់គ្លេស។ ក្រុមយោធាបានអន្តរាគមន៍ចូលក្នុងនយោបាយ និងចាប់លោក មូហ្កាបេ ឃុំក្នុងផ្ទះជាងមួយសប្ដាហ៍ មុននឹងបញ្ចុះបញ្ចូលដោយជាមួយលក្ខខណ្ឌជាច្រើន ទើបលោក មូហ្កាបេ សម្រេចចិត្តចាកចេញពីអំណាច។
តាមពិតទៅ លោក មូហ្កាបេ ត្រូវបានប្រជាជនអាហ្វ្រិកចាត់ទុកជាអ្នករំដោះប្រទេសពីអាណានិគម និងពីក្រុមចក្រពត្តិលោកខាងលិច។ ប៉ុន្តែលោកក៏ជាអ្នកនយោបាយដែលបន្សល់ទុកមរតកដ៏អាក្រក់និងភាពហិនហោចសម្រាប់ប្រជាជាតិស៊ីមបាវ៉េដូចគ្នាដែរក្នុងរជ្ជកាលនយោបាយជិតបួនទសវត្សន៍មកនេះ។ ដោយសារមូលហេតុនេះ ប្រជាជនស៊ីមបាវ៉េភាគច្រើន មិនពេញចិត្តលោកឡើយ ប៉ុន្តែមិនអាចធ្វើអ្វីលោកបានដែរ។
ការចាកចេញរបស់លោក មូហ្កាបេ និងការឡើងកាន់អំណាចរបស់លោក Mnangagwa គឺជាសករាជថ្មីនៃទំព័រប្រវត្តិសាស្ត្ររបស់ស៊ីមបាវ៉េ ដែលធ្លាប់ឃើញមុខមេដឹកនាំតែមួយអស់ពេលរាប់សិបឆ្នាំមកហើយ។ ពលរដ្ឋស៊ីមបាវ៉េ ដែលរាំច្រៀងតាមដងផ្លូវសង្ឃឹមថា ស្ថានភាពប្រទេសជាតិនឹងប្រសើរឡើងជាងមុន ឯក្រុមបក្សប្រឆាំងរំពឹងថា ការបោះឆ្នោតនាពេលខាងមុខនឹងធ្វើឡើងដោយសេរី ត្រឹមត្រូវជាងសម័យកាលលោក មូហ្កាបេ ដែរ៕
Tag:
ស៊ីមបាវ៉េ
រ៉ូបឺត មូហ្កាបេ
Emmerson Mnangagwa
© រក្សាសិទ្ធិដោយ thmeythmey.com