ជាតិ
សេដ្ឋកិច្ច
ធនាគារពិភពលោកថា កំណើនសេដ្ឋកិច្ចកម្ពុជាបន្តរឹងមាំ ជាមួយវត្តមានមុខទំនិញនាំចេញថ្មីៗ
× ភ្នំពេញ៖ របាយការណ៍ចុងក្រោយរបស់ធនាគារពិភពលោក បានបង្ហាញថា កំណើនសេដ្ឋកិច្ចរបស់កម្ពុជានៅតែមានភាពរឹងមាំ ជាមួយនឹងការលេចឡើងនូវការនាំចេញទំនិញប្រភេទផ្សេង ក្រៅពីសម្លៀកបំពាក់ ដូចជា គ្រឿងម៉ាស៊ីន គ្រឿងបន្លាស់ជាដើម។
បើទោះកំណើនសេដ្ឋកិច្ចកម្ពុជានឹងធ្លាក់ចុះខ្លះមកត្រឹម ៦,៨ នៅឆ្នាំ២០១៧ បើធៀបនឹង ៧ភាគរយនៅឆ្នាំ២០១៦ ប៉ុន្តែសេដ្ឋកិច្ចកម្ពុជានៅតែមានភាពរឹងមាំដោយសារកំណើននៃការនាំចេញស្បែកជើង គ្រឿងម៉ាស៊ីនអគ្គិសនី បរិក្ខារ និងគ្រឿងបន្លាស់យានយន្ត។ នេះរបាយការណ៍ប្រចាំឆមាសរបស់ធនារគារពិភពលោក (World Bank) ដែលចេញផ្សាយនៅថ្ងៃទី២២ខែវិច្ឆិកានេះ។ របាយការណ៍នេះ អះអាងថា ពិពិធកម្មនាំចេញខាងលើនេះ ព្រមទាំងលំហូរដ៏ល្អនៃវិនិយោគផ្ទាល់ពីបរទេស (FDI) ធ្វើឲ្យទស្សនវិស័យរយៈពេលមធ្យមសម្រាប់សេដ្ឋកិច្ចកម្ពុជា នៅតែមានភាពវិជ្ជមាន។
ការលេចឡើងនូវមុខទំនិញថ្មីៗទាំងនេះ បានជួយយឹតយោងការថយល្បឿនក្នុងវិស័យវាយនភណ្ឌ និងសំណង់ នៅឆ្នាំ២០១៧ នេះ។ ការនាំចេញទំនិញផ្នែកកម្មន្តសាល ដូចជា គ្រឿងអេឡិចត្រូនិក និងគ្រឿងបន្លាស់ជាដើម បានកើនឡើងដល់ ៨,៧ភាគរយនៃការនាំចេញសរុបនៅឆ្នាំ២០១៦ ដែលកើនឡើងពីចំនួនតិចជាង ២ភាគរយនៅឆ្នាំ ២០១០ ។
លោកស្រី Inguna Dobraja នាយិការគ្រប់គ្រងធនាគារពិភពលោកប្រចាំកម្ពុជា បានមានប្រសាសន៍ដូច្នេះថា៖«ប្រទេសកម្ពុជាស្ថិតនៅត្រង់ចំណុចមួយដែលបោះជំហ៊ានឡើងក្នុងខ្សែសង្វាក់តម្លៃក្នុងវិស័យកម្មន្តសាល ដែលផ្លាស់ប្ដូរពី ការកើនឡើងតែផ្នែកកាត់ដេរ មកកើនផ្នែកអគ្គិសនី និងគ្រឿងបន្លាស់យានយន្ត ហើយនោះគឺជាការអភិវឌ្ឍនមួយប្រកបដោយក្ដីសង្ឃឹម»។ លោកស្រីបន្តទៀតថា៖«ដើម្បីទទួលជោគជ័យក្នុងការបង្កើនការវិនិយោគ និងពង្រីកការនាំចេញច្រើនប្រភេទទំនិញ កម្ពុជាចាំបាច់ត្រូវធ្វើកំណែទម្រង់រចនាសម្ព័ន្តឲ្យកាន់តែស៊ីជម្រៅជាងនេះបន្ថែមទៀត ដែលជួយដោះស្រាយថ្លៃចំណាយខ្ពស់លើថ្លៃអគ្គិសនី និងភស្តុភារ ព្រមទាំងបញ្ហាគម្លាតជំនាញ»។
សម្រាប់ឆ្នាំ២០១៨ World Bank ព្យាករថា កម្ពុជានឹងមានកំណើនសេដ្ឋកិច្ច ៦,៩ភាគរយ។ ប៉ុន្តែការព្យាករនេះប្រឈមនឹងហានិភ័យ ដូចជា ការធ្លាក់ចុះដែលអាចកើតឡើងនៃសេដ្ឋកិច្ចនៅក្នុងតំបន់ ជាពិសេស នៅក្នុងប្រទេសចិន និងភាពមិនប្រាកដប្រជាដែលអាចកើនឡើងទាក់ទងនឹងការបោះឆ្នោតនាពេលខាងមុខ៕
© រក្សាសិទ្ធិដោយ thmeythmey.com