កីឡាជាតិ
ជាតិ
អគ្គិសនីកម្ពុជាជាក្រុមទី១ឡើងវគ្គ១/២ពានរង្វាន់ សម្តេច ហ៊ុន សែន ក្រោយទម្លាក់នគរបាលជាតិ
× ក្រុមបាលទាត់អគ្គិសនីកម្ពុជាបានកៅអីឡើងទៅវគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន ប្រចាំឆ្នាំ២០១៧ ក្រោយយកឈ្នះក្រុមអគ្គស្នងការនគរបាលជាតិ(ប៉ូលិស)ក្នុងលទ្ធផលសរុបទាំងពីរជើង ៣-១។ អគ្គិសនីកម្ពុជាជាក្រុមដំបូងគេដែលបានឡើងទៅវគ្គ១/២ ខណៈក្រុមដទៃទៀតត្រូវប្រជែងគ្នានៅល្ងាចនេះ។
សម្រាប់ការប្រកួតជើងទី២នៅកីឡដ្ឋានស្តាតចាស់កីឡាករ ទុំ សារ៉ាយ បានសម្រេចគ្រាប់បាល់នាំមុខ ១-០ សម្រាប់អគ្គិសនីកម្ពុជានៅនាទីទី៦ មុនកីឡាករ អ៊ុល រ៉ាវី រកគ្រាប់បាល់តាមស្មើ ១-១ ឲ្យអគ្គស្នងការនគរបាលជាតិនៅនាទីទី១១។ កីឡាករ លន់ ចំរើន ត្រូវអាជ្ញាកណ្តាលពិន័យកាតក្រហមនៅនាទីទី២៦ក្រោយប៉ះទង្កិចជាមួយកីឡាករអគ្គិសនីកម្ពុជា។ ទោះបីប៉ូលិសបានបាត់បង់សមាជិកម្នាក់នៅពាក់កណ្តាលវគ្គក៏ដោយ តែក្រុមនេះបានរក្សាលទ្ធផលស្មើ ១-១ រហូតចប់វគ្គទី១។
នៅនាទីទី៦៥ក្រុមអគ្គស្នងការនគរបាលជាតិទទួលបានបាល់ពិន័យ១១ម៉ែត្រពីក្រុមអគ្គិសនីកម្ពុជាដោយកីឡាករ ទិត្យ ឌីណា ទទួលភារៈសម្រេចឱកាសមាសនេះតែធ្វើមិនបានសម្រេច។ ឱកាសមាសបានធ្លាក់ទៅលើក្រុមអគ្គិសនីកម្ពុជាម្តងនៅនាទីទី៧៤ ដោយកីឡាករពាក់អាវលេខ២៧ទទួលបានបាល់ដាច់ម្នាក់ឯងតែធ្វើមិនបានសម្រេចដូចគ្នា។ កីឡាករ ម៉ាត់ នូរុណ ដែលដូរចូលជំនួសកីឡាករ ជិន ជុំ រកបាន១គ្រាប់បន្ថែមដើម្បីជួយឲ្យអគ្គិសនីនាំមុខ ២-១ នៅនាទីទី៨៦ហើយក៏ជាគ្រាប់បាល់ជ័យជម្នះ ២-១ សម្រាប់អគ្គិសនីផងដែរ។
តាមរយៈជ័យជម្នះ ២-១ ក្នុងជើងទី២ និងជ័យជម្នះ ១-០ ក្នុងជើងទី១បានជួយឲ្យក្រុមអគ្គិសនីកម្ពុជាទទួលបានកៅអីឡើងទៅលេងវគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន ប្រចាំឆ្នាំ២០១៧ ជាមួយជ័យជម្នះសរុបទាំងពីរជើង ៣-១៕
Tag:
Hun Sen Cup 2017
អគ្គិសនីកម្ពុជា
ប៉ូលិស
© រក្សាសិទ្ធិដោយ thmeythmey.com