អន្តរជាតិ
នយោបាយអន្តរជាតិ
សហភាពអាហ្វ្រិក៖«វីរភាពទាមទារឯករាជ្យរបស់លោក មូហ្កាបេ នឹងត្រូវគេចងចាំជានិច្ច»
× ប៉ុន្មានម៉ោងប៉ុណ្ណោះក្រោយមេដឹកនាំផ្តាច់ការស៊ីមបាវ៉េ រ៉ូបឺត មូហ្កាបេ ប្រកាសចាកចេញពីតំណែងព្រោះរងសម្ពាធខ្លាំង សហភាពអាហ្វ្រិកបានចេញមុខស្វាគមន៍ការសម្រេចចិត្តនេះ។ ស្ថាប័ននេះក៏បានបញ្ជាក់ផងដែរថា មេដឹកនាំស៊ីមបាវ៉េវ័យ៩៣ឆ្នាំនេះ នឹងត្រូវបានគេចងចាំជាអ្នកតស៊ូរំដោះអាហ្វ្រិកពីនឹមអាណានិគមបរទេសផងដែរ។
ស្របពេលដែលប្រជាជនស៊ីមបាវ៉េបន្តប្រារព្ធពិធីអបអរសាទរការចាកចេញពីតំណែងរបស់ប្រធានាធិបតី រ៉ូបឺត មូហ្កាបេ ដែលកាន់ ៣៧ ឆ្នាំមកនោះ គេឃើញសហភាពអាហ្វ្រិកចេញសេចក្តីថ្លែងការណ៍ស្វាគមន៍ការផ្ទេរអំណាចនេះដែរ។
ទីភ្នាក់ងារព័ត៌មាន AFP ដកស្រង់សម្តីប្រធានគណៈកម្មការសហភាពអាហ្វ្រិកលោក Moussa Faki Mahamat ដូច្នេះថា៖ «សហភាពអាហ្វ្រិកស្វាគមន៍ការសម្រេចចិត្តរបស់លោក មូហ្កាបេ ដែលព្រមផ្ទេរអំណាចដោយសន្តិវិធី ក្នុងនាមជាប្រមុខរដ្ឋក្រោយចំណាយពេលវេលាច្រើនឆ្នាំបម្រើជាតិ»។
តំណាងអង្គការតំបន់នេះក៏បានលើកឡើងពីកិច្ចខិតខំប្រឹងប្រែង និងតស៊ូរបស់លោកក្នុងការរំដោះប្រទេសជាតិពីនឹមអាណានិគមផងដែរកន្លងមក។ បុព្វហេតុការពារជាតិរបស់លោកនឹងត្រូវមនុស្សគ្រប់គ្នាចងចាំទៅអនាគត។
«ប្រធានាធិបតី មូហ្កាបេ នឹងត្រូវគេចងចាំជានិច្ចជាអ្នកប្រយុទ្ធរំដោះតំបន់អាហ្វ្រិក និងជាបិតាឯករាជ្យរបស់ប្រទេសស៊ីមបាវ៉េទាំងមូលផងដែរ»។ នេះជាការលើកឡើងរបស់លោក Moussa ក្នុងសេចក្តីថ្លែងការណ៍របស់ខ្លួន។
បន្ទាប់ពីគ្រប់គ្រងអំណាចអស់រយៈពេល ៣៧ ឆ្នាំមក រជ្ជកាលនយោបាយរបស់លោក មូហ្កាបេ ត្រូវបានបញ្ចប់ថ្ងៃអង្គារទី ២១ ខែវិច្ឆិកាម្សិលមិញនេះ ដោយលោក មូហ្កាបេ បង្ខំចិត្តលាលែងពីតំណែងក្នុងពេលដែលសភាប្រជុំរកដកតំណែងលោកជាប្រធានាធិបតីផង។ ការលាលែងពីតំណែងនេះ ក៏កើតឡើងបន្ទាប់ពីក្រុមយោធាដណ្តើមអំណាច និងចាប់លោកឃុំក្នុងផ្ទះ។ មកចុងសប្តាហ៍កន្លងទៅ គណបក្សកាន់អំណាច ZANU PF សម្រេចដកហូតដំណែងលលោកជាប្រធានបក្សទៀត។
ទោះជាយ៉ាងនេះក្តី សហភាពអាហ្វ្រិកមិនចាត់ទុកការអន្តរាគមន៍របស់យោធាជារដ្ឋប្រហារឡើយ។ ស្ថាប័ននេះចាត់ទុកថា វាជាការបញ្ចេញឆន្ទៈស្របច្បាប់របស់ពលរដ្ឋស៊ីមបាវ៉េប៉ុណ្ណោះ។
លោក Moussa បានបន្ថែមដូច្នេះ៖«សហភាពអាហ្វ្រិកទទួលស្គាល់ថា ប្រជាជនស៊ីមបាវ៉េបញ្ចេញឆន្ទៈរបស់ខ្លូនក្នុងការចង់បានការផ្ទេរអំណាចដោយសន្តិវិធីដែលអាចរក្សាបាននូវលទ្ធិប្រជាធិតេយ្យនៅក្នុងប្រទេស»៕
Tag:
សហភាពអាហ្វ្រិក
រូបឺត មូហ្កាបេ
Moussa Faki Mahamat
© រក្សាសិទ្ធិដោយ thmeythmey.com